Isikil 7 - Hanunuu

Arani yi ti Katapusan Israil

¹ Nagbagaw ti Panginuun sa kangku,

² “Anak tawu, aku, ti Panginuun Diyus, magbagaw magkun sa nasyun Israil, ‘Imaw yi inda ti katapusan buu daga Israil.

³ Katapusan yi niyu, dahil iparanas yi niku kang pangagalit sa kanyu. Pihuun niku kamu angay sa kanyu manga buruwatun. Pabayadun niku kamu sa tanan niyu mayagting pag binwat.

⁴ Balaw gid niku kamu kaawaan. Pabayadun gid niku kamu sa kanyu manga buruwatun ag sa kanyu mayagting manga binwat, hampay maalaman niyu aku ti Panginuun.’

⁵ “Aku, ti Panginuun Diyus, magbagaw magkun waya gid: Rumas-ug ti sunud-sunud pag kadamhakan.

⁶ Imaw yi inda ti katapusan! Katapusan yi niyu inda,

⁷ kamu pag manga mag-uli sa daga Israil. Imaw yi inda kanyu kadamhakan. Arani yi gid ti udas magkaragulu kamu. Tapus yi ti masulung niyu pag sirang sa kabantudan.

⁸ Udyi dumugay iparanas yi niku sa kanyu kang masyadu pag pangagalit. Pihuun niku kamu angay sa kanyu manga buruwatun. Pabayadun niku kamu sa tanan niyu mayagting pag binwat.

⁹ Balaw gid niku kamu kaawaan. Pabayadun niku kamu sa kanyu buruwatun ag sa kanyu mayagting pag manga binwat. Bag-u maalaman niyu aku, ti Panginuun, imaw ti magparusa sa kanyu.

¹⁰ “Arani yi gid ti sirang kadamhakan! Masyadu yi gid ti kadautan hanggan ti magpadayaw manga tawu.

¹¹ Kanda kahigpitan bumalik sa kanda bilang parusa sa kanda kadautan. Unman may masawad sa kanda, ag ti tanan nida kayamanan malyam.

¹² Hu, arani yi gid ti sirang kaparusahan. Danga magbaya ti magbili, ngatay magkaruku ti magpabili, dahil kang pangagalit matanggap tanan.

¹³ Nu may manga manugnigusyu waya masawad balaw yi sida makabalik sa kanda nigusyu, dahil kang sinabi tungkul sa mangyari sa buu nasakupan Israil balaw yi maulit. Una si unu ti magbuwat kadautan balaw makaribri sa kay buhi.

¹⁴ Una waya ipatunug nida ti budyung sa pag-alistu sa tanan sa paglaban, unman may manguyug sa paglaban, dahil kang pangagalit malakawan tanan.

¹⁵ “Ti manga tawu sa luwas banwa mamatay sa girahan. Ti patayak sa sulud banwa mamatay sa sakit ag lun-us.

¹⁶ Ti manga makaribri sa kamatayan ag makapalagiw tabug sa manga bantud manlumi ga uni manga kalampati, dahil sa kanda manga kasalanan.

¹⁷ Manlumuy kanda manga kamang ag mangirug kanda manga tuud.

¹⁸ Mansulung sida saku ag kuridun nida kanda manga buhuk sa ulu sa pagpakakit nida karukuan. Madala gid sida ag mangay-a.

¹⁹ Ipanyamut nida kanda manga pilak ag manga gintu sa manga baklayan parihu sa usa ka mauring pag bagay. Balaw inda makaribri sa kanda sa sirang ipakakit niku kang pangagalit. Balaw inda makabusug sa kanda dahil imaw inda kay dahilan nida pagkakasala.

²⁰ Nagpadayaw waya sida sa kanda marinu pag manga pamarinu, ag ginamit nida inda sa pagbuwat mayagting pag manga diyus-diyusan nida. Nakan buwatun niku kanda manga kayamanan mauring pag manga bagay para sa kanda.

²¹ Ipaagaw niku inda sa day-uhan ginan sa daut manga nasyun, ag kanda inda uringan.

²² Pabay-anan lang niku sida habang pag-uringan ag pagtakawan nida manga kasiyuhan kang pagmahalun pag rugar.

²³ “Bihagun kang nasakupan dahil pirmi lang may magmaratyan ag kahigpitan sa kanda banwa.

²⁴ Ipaagaw niku kanda manga balay sa pinakadaut pag manga nasyun. Paapasun niku ti pagpadayaw nida makapangyarihan pag manga tawu, ag pauringan niku kanda manga simbahan.

²⁵ Rumas-ug sa kanda ti kadalaan ag manhanap kahusayan, dapat unman nida inda makitan.

²⁶ Rumas-ug sa kanda ti sunud-sunud pag manga kadamhakan ag daut pag manga barita. Manhagad sida tultulanun sa manga purupita dapat unman sida may matanggap. Balaw sida patigayunun manga manughandug tungkul sa kasuguan, unman diman sida tamyawun manga paggurangunun.

²⁷ Manrukuan ti hari ag maduraan siya pag-asa, ag mangirkirug ti manga tawu sa kadalaan. Pihuun niku sida angay sa kanda manga buruwatun ag angay diman sa kanda magpihu sa iba. Bag-u maalaman nida aku ti Panginuun.”