Isikil 6 - Hanunuu

Ti Tultulanun Laban sa manga Bantud Israil

¹ Nagbagaw ti Panginuun sa kangku,

² “Anak tawu, pagpasrangu kawu sa manga bantud Israil ag sabihan nimu inda laban sa kanda:

³ Kamu pag manga bantud Israil, manga luung ag manga ratag, patingihi niyu ti pagsabihun Panginuun Diyus: Padarahan niku kamu girahan, ag panggub-un niku kanyu manga simbahan sa abwat pag manga rugar.

⁴ Magkaragba kanyu manga harandugan hanggan ti manga harandugan pagsunugan manga kamangyan, ag panmatyun niku kanyu manga kasimanwa sa atubangan niyu manga diyus-diyusan.

⁵ Wayakun niku kanyu manga bangkay sa atubangan niyu manga diyus-diyusan ag wayakun niku kanyu manga but-ul sa sangput niyu manga harandugan.

⁶ Ti kada banwa niyu ipadamhak. Magkaratumpag kanyu manga simbahan sa abwat pag manga rugar, manga diyus-diyusan, manga harandugan, hanggan ti manga harandugan pagsunugan manga kamangyan, ag ti iba waya parihu sa inda pag pinanmuwat niyu.

⁷ Magkaramatay kanyu manga kasimanwa, ag maalaman niyu aku ti Panginuun.

⁸ “Dapat balaw niku kamu tabuhun matyun. Dahil ti iba sa kanyu makaribri sa girahan ag mawayak sa iba manga nasyun

⁹ bilang manga bihag. Alalahanun nida aku ati, ag maisip nida pinaruku nida aku sa kanda nag-uragin ag pagpalabi-labi sa manga diyus-diyusan. Kayagtingan nida kanda sadili dahil sa kanda daut ag mayagting pag pinanbuwat.

¹⁰ Ag maalaman nida aku ti Panginuun, ag tutuu aku sa kang paandam buwatun niku inda pag kadamhakan sa kanda.”

¹¹ Bag-u magkun ti Panginuun Diyus sa kangku, “Suntukan kanmu kamang, lupkan kanmu lulud, ag pagringgit, ‘Ay, Ay!’ sa pagpakakit kanmu magkaruku ag magkagalit sa nasakupan Israil, dahil sa kanda kadautan ag mayagting pag binwat. Nakan ngani magkaramatay sida sa panab-anan girahan, lun-us ag sakit.

¹² Ti manga ati sa arayu mamatay sa sakit. Ti asan sa arani mamatay sa girahan. Ag ti masawad mamatay sa lun-us. Sa inda pag paraan maungdan nida kang pangagalit sa kanda.

¹³ Ag maalaman nida aku ti Panginuun nu ti manga bangkay nida manga kasimanwa mawayak kaibahan sa kanda manga diyus-diyusan sa sangput nida manga harandugan, sa manga bantud, sa tagudtud manga bantud, sa puun daraka pag manga kayu, ag sa puun maraybung pag manga kayu insina, nu naan maghandug sida kamangyan sa kanda manga diyus-diyusan.

¹⁴ Parusahan niku sida una naan sida pag mangulian, ag buwatun niku mapanglaw kanda daga ginan sa pangawakawaan sa kanaway atabug sa Dibra sa salatan. Bag-u maalaman nida aku ti Panginuun.”