Isikil 5 - Hanunuu

Ti Pararas-ugun Kadamhakan sa Hirusalim

¹ Magkun waya gid ti Panginuun sa kangku, “Anak tawu, pagbuul kawu matarum pag baladaw, gamita inda pangurid sa kanmu buhuk hanggan bungut. Bag-u kiluha kanmu buhuk hanggan bungut, tungaa inda sa tulu ka bahagi.

² Kay un-an pag bahagi ipauli nimu sa daga pinaganit kanmu ginuhitan Hirusalim, paulian kay usa ka bahagi buhuk sa daga pinaganit, ag sunuga inda siyun sa karaw-an banwa. Paulian kay usa ka bahagi sa palibut banwa ag pamulud-puluda nimu baladaw. Kay nasawad pag bahagi sarwagan sa durus, dahil kalatun niku kang nasakupan sa panab-anan baladaw.

³ Dapat pagsawad kawu ka pira lang pag buhuk ag saputa inda sa kanmu rutay.

⁴ Bag-u bul-i inda pira ka bilug ag yamtan sa apuy hampay masunug. Sitay ginan pag-umumpisa ti apuy ag umirub sa buu Israil.

⁵ “Aku, ti Panginuun Diyus, magbagaw magkun imaw tunda ti patabgan Hirusalim, ti binwat niku pag banwa pinakamahalaga pag rugar sa kalibutan.

⁶ Linabag niya kang manga sugu, ag mas daut waya siya kaysa iba pag manga nasyun sa kay palibut. Dinayu niya kang manga sugu ag manga surundanun.

⁷ Nakan aku, ti Panginuun Diyus, magbagaw magkun: Kamu pag manga taga Hirusalim, mas daut waya kamu kaysa iba pag manga nasyun sa kanyu palibut. Unman niyu sinunud kang manga sugu ag manga surundanun, unman diman ngani niyu sinunud ti manga surundanun manga nasyun sa kanyu palibut.

⁸ Nakan aku, ti Panginuun Diyus, laban sa kanyu. Parusahan niku kamu sa atubangan manga nasyun.

⁹ Dahil sa kanyu mayagting pag manga pagbuwatun, buwatun niku sa kanyu ti balaw waya niku nabwat ag ti balaw yi niku buwatun uman.

¹⁰ Kan-un manga gurang kanda manga anak, ag kan-un manga anak kanda manga gurang. Parusahan gid niku kamu, ag ti manga masawad sa kanyu wayakun niku sa buu kalibutan.

¹¹ Aku, ti buhi pag Panginuun Diyus, magsumpa kang ipadamhak kamu sa unman may pangaawa dahil inuringan niyu kang Balay Diyus sa panab-anan pagsamba sa manga diyus-diyusan hanggan pagbuwat mayagting pag manga bagay.

¹² Tungaun niku kamu sa tulu ka bahagi. Kay usa ka bahagi magkaramatay sa panab-anan lun-us hanggan manga durungugun siyun sa banwa. Kay usa waya ka bahagi magkaramatay sa panab-anan baladaw sa luwas banwa. Ag ti masawad pag bahagi sarwagan sa durus, wayakun niku sa buu kalibutan, ag lagsun sida niku baladaw.

¹³ “Nu mangyari yi inda madura yi kang masyadu pag pangagalit sa kanyu, ag makabalus yi aku. Nu maipasamit yi niku sa kanyu kang pangagalit, maalaman niyu aku, ti Panginuun, nagpakihampang sa kanyu dahil sa kang masyadu pag pangagalit sa kanyu.

¹⁴ Dautun niku kanyu banwa ag puyaan kamu manga nasyun sa kanyu sangput ag manga maglawuy sa kanyu rugar.

¹⁵ Pakay-ahun, puyaan, ag tamirian kamu manga nasyun sa kanyu kalibut. Bumaliw kamu paandam sa kanda sa udas parusahan niku kamu sa kang masyadu pag pangagalit. Aku, ti Panginuun, ti magbagaw inda.

¹⁶ Padarahan niku kamu lun-us parihu sa ugyung rumuris sa kanyu. Umamat di ti lun-us tugka sa unman yi kamu may makaun.

¹⁷ Bukud sa lun-us padaran-an diman niku kamu maraisug pag manga hayup ag panmatyun nida kanyu manga anak. Magkaramatay diman kamu sa manga sakit ag sa girahan. Aku, ti Panginuun, ti magbagaw inda.”