Isikil 48 - Hanunuu

Ti Paghuray Daga sa manga Linahi

¹ Magkun waya ti Panginuun Diyus, inda ti listahan manga linahi Israil hanggan ti natanggap nida pag manga daga: Ti daga lahi ni Dan ati sa salatan. Ti katugkaan inda ginan sa Hitlun atabug sa Libu Hamat tugka sa Hasar Inan asan sa katugkaan Damasku hanggan Hamat sa salatan. Ti bulang daga lahi ni Dan ginan sa butlakan tugka sa isalpan Israil.

² Ti daga lahi ni Asir ati sa kanaway daga lahi ni Dan, bag-u kay bulang inda ginan diman sa butlakan tugka sa isalpan Israil.

³ Ti daga lahi ni Niptali ati sa salatan daga lahi ni Asir, bag-u kay kadaka inda ginan diman sa butlakan tugka sa isalpan Israil.

⁴ Ti daga lahi ni Manasis ati sa kanaway daga lahi ni Niptali, bag-u kay kadaka inda ginan diman sa butlakan tugka sa isalpan Israil.

^5-7 Kay sunud waya manga daga imaw kay lahi ni Ipraim, ni Rubin, hanggan ni Huda, kay kadaka inda ginan diman sa butlakan tugka sa isalpan Israil.

⁸ Ti daga sa salatan Huda pakan-an niyu sa Panginuun bilang ipinablag pag pamakaun. Kay aba inda 12 ka kilumitru, bag-u kay bulang inda ginan diman sa butlakan tugka sa isalpan Israil parihu sa manga linahi Israil. Ti Balay Diyus ipatindug sa karaw-an sa inda pag daga.

⁹ Ti huray daga niyu ipakaun sa Panginuun hampay patindugan Balay Diyus 12 ka kilumitru kay aba ag lima ka kilumitru kay bulang.

¹⁰ Kay katunga inda pag daga pakan-an sa manga manughandug. Kay aba inda ginan sa butlakan atabug sa isalpan 12 ka kilumitru, bag-u kay bulang inda ginan sa salatan tugka sa kanaway lima ka kilumitru. Sa karaw-an inda imaw ti Balay Diyus Panginuun.

¹¹ Inda pag daga para sa pinili pag manga manughandug, imaw ti manga linahi ni Saduk, matinupadun magsirbi sa kangku ag unman nagpatlikud sa kangku parihu sa binwat iba manga lahi ni Libi nagpaamut sa manga Israilita nagpatlikud sa kangku.

^12-13 Inda pag daga ipinablag pag pakaun para sa manga manughandug, ag inda ti pinakabanal pag daga. Sa tupad inda imaw ti daga para sa iba manga lahi ni Libi, 12 ka kilumitru kay aba ag lima ka kilumitru kay bulang.

¹⁴ Kailangan balaw gid nida inda ipabili ngatay ibalyu una di diit pag bahagi, dahil imaw inda ti pinakamayad pag daga ag banal inda para sa Panginuun.

¹⁵ Ti nasawad pag daga 12 ka kilumitru kay aba ag kay bulang duwa may tunga ka kilumitru para sa tanan. Mahimu inda ulian tawu ag paharaban nida manga hayup. Sa karaw-an inda imaw ti banwa

¹⁶ duwa ka kilumitru parihu kay aba ag bulang.

¹⁷ Magkasangputan inda marayaw pag rugar 125 ka mitrus parihu kay aba ag bulang.

¹⁸ Sa luwas banwa may imaw tanman kay aba lima ka kilumitru atabug sa butlakan ag lima diman ka kilumitru tag sa isalpan. Ati inda sa katugkaan banal pag daga. Ti manga patubas sa inda pag daga para karan-unun manga manugtarabahu sa banwa.

¹⁹ Una si unu ti manugtarabahu sa banwa ginan sa tuhay-tuhay pag linahi Israil mahimu makatanman sa inda pag daga.

²⁰ Nakan ti kabuuhan daga ipakaun niyu sa Panginuun bilang ipinablag pag pamakaun, kaibahan yi ti banal pag daga hanggan ti banwa, 12 ka kilumitru kudradu.

^21-22 Ti nasawad pag daga, sa butlakan hanggan sa isalpan banal pag daga ag sa banwa, para yi sa takinan. Inda pag manga daga may bulang 12 ka kilumitru ag aput inda tugka sa katugkaan Israil sa butlakan ag sa isalpan. Nakan sa karaw-an daga para sa takinan imaw kang banal pag daga, ti Balay Diyus, ti daga manga lahi ni Libi, hanggan ti banwa. Ti daga para sa takinan ati sa karaw-an daga para sa lahi ni Huda hanggan daga para sa lahi ni Binhamin.

²³ Inda ti manga daga matanggap manga nasawad pag manga linahi: Ti daga lahi ni Binhamin ati sa kanaway daga takinan, bag-u kay bulang inda ginan sa butlakan tugka sa isalpan Israil.

²⁴ Ti daga lahi ni Simyun ati sa kanaway daga lahi ni Binhamin, bag-u kay bulang inda ginan diman sa butlakan tugka sa isalpan Israil.

^25-27 Kay sunud waya pag manga daga imaw ti magkaapu manga lahi ni Isakar, ni Sabulun, hanggan ni Gad, kay bulang inda ginan diman sa butlakan tugka sa isalpan Israil.

²⁸ Ti katugkaan sa kanaway pag daga para sa lahi ni Gad ginan sa Tamar atabug sa may bulbugan Miriba Kadis diritsu sa may bululusan danum Ihiptu tugka sa Dagat Miditiranyu.

²⁹ Imaw tunda ti manga daga matanggap manga linahi Israil bilang kanda maranahun. Aku, ti Panginuun Diyus, ti may sabi inda.

Ti manga Lakawan Daka banwa Hirusalim

^30-34 Ti upat ka alad batu masangputan sa banwa Hirusalim may imaw tig-tulu ka sabian. Ti manga sabian sa salatan baliwa pag alad batu pag-ingarnan Rubin, Huda, ag Libi. Ti manga sabian sa butlakan baliwa pag alad batu pag-ingarnan Husi, Binhamin, ag Dan. Ti manga sabian sa kanaway baliwa pag alad batu pag-ingarnan Simyun, Isakar, ag Sabulun. Ag ti manga sabian sa isalpan baliwa pag alad batu pag-ingarnan Gad, Asir, ag Niptali. Ti kada alad batu may aba 2,250 mitrus,

³⁵ nakan kay kabuuhan sukat alad batu 9,000 mitrus. Ag ginan sa inda pag udas ti banwa pag-ingarnan, “Ati Ti Panginuun!”