Isikil 47 - Hanunuu

Ti Bulbugan Magbulus ginan sa Balay Diyus

¹ Bag-u dinara aku tawu pabalik sa may sabian Balay Diyus, ag ati may nakitan aku danum magbulus atabug sa butlakan ginan sa sirung sabian Balay Diyus. (Ti Balay Diyus maatubangan sa butlakan.) Bag-u linmiku ti danum pasikun, sa kanaway baliwa harandugan.

² Bag-u dinara aku tawu sa luwas Balay Diyus. Ati kami lakaw sa dalan sa salatan. Ag ipinalibut niya aku ati sa luwas atabug sa lakawan sa butlakan. Ati nakitan niku ti danum magbulus ginan sa kanaway baliwa dalan.

³ Naglakaw kami atabug sa butlakan sa saruy danum, ag diritsu kay magsukat. Pagka manga 1,000 yi ka luk-an siku kanmi linakaw, ipinadipay niya aku sa danum tugka lang sa kang marabuku kay danum.

⁴ Nansukat maan ti tawu manga 1,000 ka luk-an siku ag ipinadipay maan niya aku sa danum tugka yi sa kang tuud. Nagsukat maan gid siya manga 1,000 ka luk-an siku ag ipinadipay maan niya aku sa danum tugka yi sa kang awak.

⁵ Nagsukat waya gid siya manga 1,700 ka luk-an siku, dapat unman yi niku inda madipay dahil masyadu yi abasad ti danum sa sapa. Kailangan yi inda languyun.

⁶ Magkun ti tawu sa kangku, “Anak tawu, tandai kaayad kanmu nakitan.” Bag-u dinara niya aku pabalik lakaw sa tunda pag saruy sapa.

⁷ Pagka maglawuy kami ati, may nakitan aku mayamu gid pag manga puun kayu sa baliw-baliw pangpang.

⁸ Bag-u magkun siya sa kangku, “Inda pag danum magbulus sa buu daga sa butlakan atabug sa Karatagan Hurdan atabug sa Dagat Namatay. Pag ras-ug danum sa Dagat Namatay, bumaliw tunda masarap pag danum, ag balaw maasin.

⁹ Una naan tag pagbumulus tunda pag danum, mayamu gid manga isda hanggan iba waya manga hayup sa danum ti magkarabuhi, dahil pinasarap inda ti maasin pag danum.

¹⁰ Mayamu ti man-ngisda sa Dagat Namatay ginan sa In Gidi atabug sa In Iglaim. Ti baybay dagat mapnu manga lambat pag-ipainit sa init. Yumamu ti tuhay-tuhay pag manga isda sa Dagat Namatay parihu sa Dagat Miditiranyu.

¹¹ Dapat ti manga dalaag sa palibut maasin di, hampay may mabul-an asin ti manga tawu.

¹² Tumubu sa baliw-baliw saruy sapa ti tuhay-tuhay pag manga kayu magburak. Balaw malayung kanda manga labung ag balaw matabu kanda manga burak. Manburak inda kada bulan dahil pagbulusan danum ginan sa Balay Diyus. Kanda manga burak para karan-unun ag kanda manga labung para pamulung.”

Ti manga Katugkaan Daga

¹³ Magkun waya gid ti Panginuun Diyus, “Imaw inda ti manga katugkaan daga kanyu hurayun sa 12 ka linahi Israil bilang kanda maranahun. Pakan-an niyu duwa ka huray ti lahi ni Husi.

¹⁴ Kailangan pari-parihu kanyu paghuray sa daga, dahil nagsumpa aku sa kanyu manga ginurang ipakaun niku inda sa kanda ag manahun niyu.

¹⁵ Imaw inda ti katugkaan: “Ti katugkaan sa salatan ginan sa Dagat Miditiranyu atabug sa Hitlun, sa Libu Hamat, sa Sidad,

¹⁶ sa Biruta, sa Sibraim ati sa katugkaan Damasku ag Hamat tugka sa Hasir Hatikun ati sa katugkaan Hauran.

¹⁷ Nakan ti katugkaan sa salatan ginan sa Dagat Miditiranyu tugka sa Hasar Inan ati sa katugkaan Damasku ag Hamat sa salatan.

¹⁸ “Ti katugkaan sa butlakan ginan sa katugkaan Hauran ag Damasku atabug sa Sapa Hurdan (ti maghiwalay sa Gilyad ag sa daga Israil) atabug sa Dagat Namatay tugka sa Tamar. Imaw tunda ti katugkaan sa butlakan.

¹⁹ “Ti katugkaan sa kanaway ginan sa Tamar atabug sa bulbugan Miriba Kadis diritsu sa bululusan danum sa Ihiptu tugka sa Dagat Miditiranyu. Imaw tunda ti katugkaan sa kanaway.

²⁰ “Ti katugkaan sa isalpan imaw mismu ti Dagat Miditiranyu tugka sa rugar maatubangan sa Libu Hamat. Imaw tunda ti katugkaan sa isalpan.

²¹ “Hurayun niyu inda pag manga daga para sa kada niyu linahi.

²² Manahun niyu inda hanggan manga day-uhan mag-ulian kaibahan niyu, kanda manga anak nianak sa Israil. Kilalan-un niyu sida ga tutuu manga Israilita, ag hurayan diman niyu sida maranahun daga ginan sa linahi Israil.

²³ Nu naan sida pag linahi mag-uli, ati diman sida pag hurayan nida daga. Aku, ti Panginuun Diyus, ti may sabi inda.”