Isikil 46 - Hanunuu

¹ Magkun waya gid ti Panginuun Diyus, “Ti dalan atabug sa sulud sarakahan maatubangan sa butlakan kailangan saradu sa sulud unum ka sirang tig buruwat, dapat bukasan inda sa Sirang Pamahari hanggan sa udas Pista Un-an Bulan.

² Ti takinan lumakaw sa sarakahan maatubangan sa butlakan bag-u tumindug siya sa tupad sabian habang maghandug ti manga manughandug kay handug pagsunugun hanggan kay handug para sa mayad pag pakiusa. Mansamba sa kangku ti takinan ati sa may sabian, pagkatapus manluwas siya, dapat ti sabian balaw saraduhan tugka sa yumabi.

³ Sa kada Sirang Pamahari hanggan sa kada Pista Un-an Bulan, ti nasakupan Israil mansamba diman sa kangku ati sa atubangan sabian.

⁴ Sa kada Sirang Pamahari, manhandug ti takinan sa kangku usa ka lalaki pag karanidu ag unum ka anak karanidu unman may alangan bilang handug pagsunugun.

⁵ Ti handug pamakun amutan sa lalaki pag karanidu tunga sa saku arina, dapat dipindi ti takinan nu pira kay ipaamut pag arina sa kada anak karanidu. Sa kada tunga saku arina ipaamut niya sa manga handug karanidu, manhandug diman siya usa ka galun lana ulibu.

⁶ “Sa kada Pista Lapus Lati, ti takinan manhandug usa ka tudu baka, usa ka lalaki karanidu, ag unum ka anak karanidu lalaki, unman may alangan tanan.

⁷ Ti handug pasalamat ipaamut takinan sa tudu baka ag sa lalaki karanidu tig tunga saku arina, dapat dipindi siya nu pira kay ipaamut pag arina sa kada anak karanidu. Sa kada tunga saku arina ipaamut niya sa manga handug hayup, manhandug diman siya usa ka galun lana ulibu.

⁸ Nu mansulud ti takinan para manhandug, ati siya lakaw sa sarakahan pag dalan, ag ati diman siya pag lumuwas.

⁹ “Nu mansamba sa kangku ti nasakupan Israil sa Balay Diyus sa udas manga pista, ti manga mansulud sa sabian sa salatan kailangan sa kanaway pag lumuwas, bag-u ti manga mansulud sa sabian sa kanaway lumuwas sa sabian sa salatan. Kailangan unman may lumuwas sa sabian sinuldan niya. Kailangan sa iba pag sabian siya lumuwas nu mansulud siya sa baliw.

¹⁰ Dumungan ti takinan sa pagsulud ag pagluwas nida.

¹¹ “Sa udas tuhay-tuhay pag manga pista, ti handug pasalamat ipaamut sa tudu baka hanggan sa lalaki pag karanidu tig tunga saku arina, dapat dipindi sa manughandug nu pira kay ipaamut pag arina sa kada anak karanidu. Sa kada tunga saku arina ipaamut niya sa manga handug hayup, manhandug diman siya usa ka galun lana ulibu.

¹² Nu manhandug ti takinan handug pagsunugun ngatay handug pagpakiusa angay sa kinabubut-un, bukasan para sa kanya ti lakawan maatubangan sa butlakan. Bag-u manhandug siya manga handug parihu sa kay pag-isagda sa Sirang Pamahari. Pagluwas niya, isaradu yi ti sabian.

¹³ “Kada surip, kailangan may pag-isagda sa kangku usa ka timpu karanidu unman may alangan bilang handug pagsunugun.

¹⁴ Ipaamut sa inda pag karanidu ti handug pasalamat upat ka kilu arina, ag usa ka litru lana ulibu panlahuk sa arina. Inda pag surundanun tungkul sa handug pasalamat kailangan tupadun tugka aban.

¹⁵ Nakan kada surip, kailangan may pag-isagda sa kangku karanidu, arina, hanggan lana ulibu bilang sirang-sirang handug pagsunugun, tugka aban.”

¹⁶ Magkun waya gid ti Panginuun Diyus, “Nu ti takinan mamakaun maranahun daga sa usa niya ka manga anak, tunda pag daga para lang sa manga linahi niya tugka aban.

¹⁷ Dapat nu ipakaun niya inda sa usa niya ka suruguun, sa suruguun yi inda tugka lang sa Timpu Pagpalpas ag Pagbalik. Sa inda pag timpu, iuli suruguun ti daga sa takinan. Ti manga anak lang gid takinan ti makaapu sa kay daga tugka aban.

¹⁸ Ti takinan balaw dapat maggipit sa pagbuul daga manga tawu. Nu mamakaun siya daga sa kay manga anak, kailangan kanya lang gid pag daga ti ipakaun, hampay kang nasakupan balaw maduraan daga.”

¹⁹ Pagkatapus tunda, dinara aku tawu sa banal pag manga sulud-sulud manga manughandug maatubangan sa kanaway. Ati kami lakaw sa saruy dalan pag sabian. Ipinakakit niya sa kangku ti rugar ati sa isalpan inda pag manga sulud-sulud.

²⁰ Magkun siya sa kangku, “Sitaay pag rugar ti manga manughandug magtama handug bayad sa kasalanan, handug sa paglumpiyu, hanggan handug pasalamat. Sitaay nida inda pagtamaun hampay maamanan nida ti pagdara manga handug sa luwas sarakahan. Sa panab-anan inda mapinsala ti manga tawu sa kabanalan.”

^21-22 Bag-u dinara niya aku sa luwas sarakahan, ag ipinakakit sa kangku ti upat ka suuk inda. Sa kada suuk may dariit pag sarakahan 40 ka luk-an siku kay aba ag 30 ka luk-an siku kay bulang. Pari-parihu kay ka daka manga sarakahan.

²³ Ti kada usa inda magkasangputan manga arababa pag alad batu, bag-u sa saruy alad batu may manga arapyan.

²⁴ Bag-u magkun ti tawu sa kangku, “Inda ti manga kusina nu naan ti manga magsirbi sa Balay Diyus magtama manga handug manga tawu.”