Isikil 45 - Hanunuu

Ti Paghuray Daga

¹ Magkun waya ti Panginuun, “Nu hurayun yi niyu ti daga sa kada linahi Israil, pakan-i niyu aku huray bilang ipinablag pag pamakaun sa kangku. Kay aba inda 12 ka kilumitru ag kay lapad sampulu ka kilumitru. Inda pag daga pagbaliwun banal.

² Sa inda pag daga, paghanda kamu 500 ka luk-an siku parihu kay aba ag kay lapad para patindugan Balay Diyus, ag sa palibut Balay Diyus may bakanti rugar 50 ka luk-an siku kay lapad.

^3-4 Kay katunga daga para sa kangku, 12 ka kilumitru kay kaabaan ag lima ka kilumitru kay lapad, pasamanan para sa manga manughandug magsirbi sa kang banal pag Balay. Patindugan inda nida manga balay hanggan Balay Diyus imaw ti pinakabanal pag rugar.

⁵ Kay katunga waya pag daga, 12 ka kilumitru kay aba ag lima ka kilumitru kay lapad, para sa manga Libita. Inda kanda apuun, hampay may manga banwa sida ulianan.

⁶ “Sa katpadan daga para sa kangku, pagpasaman kamu daga 12 ka kilumitru kay aba ag duwa may tunga ka kilumitru kay lapad. Inda buwatun banwa nu naan makaulian ti una si unu pag manga Israilita.

⁷ Hurayan diman duwa ka huray daga ti takinan Israil. Kay usa ka huray ginan sa isalpan katugkaan daga para sa kangku hanggan daga buwatun banwa atabug sa Dagat Miditiranyu, bag-u kay usa waya ka huray ginan sa katugkaan butlakan atabug sa Sapa Hurdan. Ti katugkaan inda sa butlakan hanggan sa isalpan pantay sa katugkaan manga daga hinuray sa manga linahi Israil.

⁸ Inda pag manga daga ti bumaliw huray manga takinan Israil.” “Kang manga takinan balaw yi man-api sa kang nasakupan. Pahintulutan nida ti nasakupan Israil umapu daga niku pag-ipakaun sa kanda angay sa kanda linahi.

Manga Kasuguan para sa manga Takinan Israil

⁹ Dahil aku, ti Panginuun Diyus, magkun: Kamu pag manga takinan Israil, subra yi kanyu pagbuwatun! Apasi yi niyu kanyu mag-unuunu ag pagpan-api, ag buwata niyu ti matadlung ag hustu. Danga yi niyu pagbul-a ti daga niku nasakupan.

¹⁰ Gamita niyu ti hustu pag timbangan, sukatan, ngatay takalan.

¹¹ Ti ‘humir’ imaw dapat ti basihan panukat sa pagbilang. Ti usa ka ‘humir’ sampulu ka ‘ipa’ ngatay sampulu ka ‘bat’.

¹² Ti ‘sikil’ imaw ti dapat basihan sa pagsukat buyat. Ti usa ka ‘sikil’ 20 ka giras, ag 60 ka ‘sikil’ usa ka ‘mina.’

Ti Bukudtangi pag manga Handug hanggan ti Bukudtangi pag manga Sirang

¹³ “Imaw inda pag manga handug ti kailangan niyu ipakaun sa takinan Israil: Ikan-um pag bahagi niyu patubas tirigu hanggan sibada,

¹⁴ ika-100 pag bahagi niyu lana ulibu (kay takalan inda ‘bat’; ti sampulu ka ‘bat’ usa ka ‘humir’ ngatay usa ka ‘kur’),

¹⁵ ag ti usa ka karanidu sa kada 200 ginan sa kanyu hayup. Inda pag manga handug para sa pasalamat sa kangku, manga handug pagsunugun hanggan handug para sa mayad pag pakiusa, hampay mapatawad ti manga kasalanan niyu. Aku, ti Panginuun Diyus, ti magsabi inda.

¹⁶ Ti tanan Israilita mandara inda pag manga handug para gamitun takinan Israil.

¹⁷ Katungkulan waydi takinan ti pagpakaun manga handug pagsunugun, handug pasalamat, handug irinmun, handug sa paglumpiyu, hanggan handug para sa mayad pag pakiusa sa udas manga pista parihu sa Pista Pag-umpisa Bulan, manga Sirang Pamahari, ag iba waya manga pista pag-idaus manga Israilita. Sagdaan inda pag manga handug hampay mapatawad ti manga kasalanan nasakupan Israil.”

Ti manga Pista

¹⁸ Magkun waya gid ti Panginuun Diyus, “Sa un-an pag sirang un-an pag bulan, pagsagda kamu tudu baka unman may alangan para malumpiyu ti Balay Diyus.

¹⁹ Ti manughandug ti kailangan bum-ul inda kay dugu para sa paglumpiyu ag payidan niya ti bakalan sabian Balay Diyus, ti upat ka suuk harandugan, hanggan ti bakalan sabian sa sulud pag sugkadan.

²⁰ Kainda diman ti buwatun niyu sa ikapitu pag sirang sa imaw diman pag bulan para sa kan una si unu ti nagkasala balaw sinadya ngatay nagsalan balaw niya alam. Sa panab-anan inda malumpiyu niyu ti Balay Diyus.

²¹ “Sa ika-14 pag sirang un-an pag bulan, idaus niyu ti Kapistahan sa Pag-alaala sa Karibrihan. Idaus niyu inda sa sulud pitu ka sirang, ag pagkaun lang kamu tinapay unman may pamadaka.

²² Sa un-an pag sirang niyu pagdaus, manhandug ti takinan tudu baka bilang handug sa paglumpiyu para sa kay sadili hanggan sa tanan Israilita.

²³ Kada sirang sa sulud pitu ka sirang niyu pagdaus, manhandug sa kangku ti takinan pitu ka tudu baka ag pitu ka lalaki karanidu unman may alangan bilang handug pagsunugun. Mansagda diman siya usa ka lalaki kambing bilang handug sa paglumpiyu.

²⁴ Sa kada tudu baka hanggan kada lalaki karanidu kailangan may kaibahan inda handug pagparangal sa kangku, kay kayamuun manga tunga saku arina hanggan manga usa ka galun lana ulibu.

²⁵ Kainda diman ti ihandug takinan sa Pista Pagpatindug manga Payag, umpisa sa ika-15 pag sirang sa ika-7 pag bulan. Ag sa sulud diman pitu ka sirang, manhandug siya parihu diman pag manga handug kay ihinandug sa Kapistahan sa Pag-alaala sa Karibrihan: manga handug sa pagpalumpiyu, manga handug pagsunugun, manga handug pasalamat, hanggan lana ulibu.”