Isikil 44 - Hanunuu

Manga Surundanun sa Balay Diyus

¹ Dinara maan aku tawu sa luwas pag lakawan Balay Diyus, maatubangan sa butlakan, dapat saradu inda.

² Magkun ti Panginuun sa kangku, “Inda pag lakawan kailangan pirmi saradu. Danga gid inda pagbukasi hampay unman may lumakaw sitay, dahil aku, ti Panginuun, ti Diyus Israil, maglakaw sitay.

³ Ti takinan lang Israil ti makatukaw sa inda pag lakawan hampay kumaun ihinandug sa kangku, dapat ati siya lumakaw sa sarakahan pag lakawan, ag ati diman siya lumuwas.”

⁴ Bag-u dinara aku tawu sa atubangan Balay Diyus. Ati kami lakaw sa salatan. Nakitan niku ati ti kadayawan Panginuun maghamuy sa kay Balay Diyus, ag napayuk-ub aku.

⁵ Magkun waya gid ti Panginuun sa kangku, “Anak tawu, patingihi gid kaayad ti tanan niku sabihun sa kanmu tungkul sa tanan surundanun sa kang Balay. Alama kaayad nu si unu ti makasulud sa Balay Diyus ag ti unman makasulud.

⁶ Sabihi ti kalaban pag nasakupan Israil aku, ti Panginuun Diyus, magkun: ‘Nasakupan Israil, apasi yi niyu ti tanan mayagting niyu pagbuwatun.

⁷ Pag-ipasulud niyu sa kang Balay ti manga day-uhan unman magsarig sa kangku. Sa panab-anan inda pag-uringan niyu kang Balay habang maghandug kamu karan-unun, taba, hanggan dugu. Balaw labut sa kanyu mayagting manga buwat, paglabagun waya niyu kang kasunduan sa kanyu.

⁸ Sa halip kamu ti pumanguna sa banal pag manga bagay sa kang Balay, pag-ipabahala ngap niyu sa iba tawu.

⁹ Nakan aku, ti Panginuun Diyus magkun, unman may manga day-uhan unman magsarig sa kangku ti makasaka sa kang banal pag Balay, una ti manga day-uhan mag-uli kaibahan niyu.’

¹⁰ “Nu tungkul sa manga lahi ni Libi nagpatlikud sa kangku ag nagkuyug sa iba manga Israilita nagsamba sa kanda manga diyus-diyusan, mangagwanta sida dahil sa kanda kasalanan.

¹¹ Mahimu sida makasirbi sa kang banal pag Balay bilang manga manugguwardiya sa sabian ag manug-iyaw manga handug ag iba waya pag manga handug sa manga tawu. Ag mahimu diman sida makasirbi sa manga tawu sa Balay Diyus.

¹² Dapat dahil nagsamba sida sa manga diyus-diyusan habang magsirbi sa manga tawu, ag dahil diman siyun nagkasala ti nasakupan Israil, magsumpa aku mangagwanta sida dahil sa kanda kasalanan. Aku, ti Panginuun Diyus, ti magsabi inda.

¹³ Kainda ginan balaw yi niku sida pahintulutan sumirbi sa kangku bilang manga manughandug. Unman diman sida makapakialam sa kang banal pag manga bagay ngatay sa banal niku pag manga handug. Kailangan nida mag-agwanta sa kakay-ahan dahil sa kanda mayagting pag manga binwat.

¹⁴ Buwatun yi lang niku sida manga manug-awat sa tanan buruwatun sa Balay Diyus.

¹⁵ “Dapat ti manga manughandug ginan sa lahi ni Libi hanggan manga linahi ni Saduk, ti matinupadun sa pagsirbi sa kang banal pag Balay katpung nagpatlikud sa kangku ti manga Israilita, mahimu di makasirbi sa kangku. Sida ti manhandug sa kangku taba ag dugu. Aku, ti Panginuun Diyus, ti magsabi inda.

¹⁶ Sida lang ti makasaka sa kang banal pag Balay hanggan makapakarani sa kang harandugan sa pagsirbi sa kangku. Sida lang ti makabuwat sa kang manga pag-ipabuwat sa Balay Diyus.

¹⁷ Nu magsulud sida sa lakawan atabug sa sulud sugkadan Balay Diyus, kailangan mansulung sida rutay linu. Danga sida magrutay dilana habang magsirbi sida sa sulud sugkadan ngatay sa sulud mismu Balay Diyus.

¹⁸ Kailangan magsulung diman sida turban linu hanggan salwal buwat diman sa linu. Balaw dapat sida magsulung rutay makapahulas sa kanda.

¹⁹ Nu magluwas sida sa luwas pag sugkadan nu naan ati ti manga tawu, kailangan ubahun dapu nida kanda manga rutay ginamit sa pagsirbi bag-u ipauli ati sa banal pag manga sulud-sulud, bag-u di manrutay sida panulungun lang pag manga rutay. Sa panab-anan inda, ti pagkabanal nida rutay balaw makaapiktu sa manga tawu.

²⁰ “Kailangan balaw sida magpakalbu kanda ulu ngatay magpaaba kanda buhuk, nu unman puldan lang nida inda pirmi.

²¹ Balaw diman sida mahimu uminum makalangu nu atag sida sa sulud pag sugkadan.

²² Balaw diman sida kailangan mag-asawa sa manga balu ngatay sa babayi tinayakan niya asawa. Kanda asawan-un tunda lang manga daraga manga Israilita, ngatay manga balu asawa manga manughandug.

²³ Kailangan tudluan nida kang nasakupan nu unu ti banal ag ti balaw banal, nu unu ti malumpiyu ag ti mauring.

²⁴ Nu may manga mag-aratwan, ti manga manughandug ti humusay ag magpasya angay sa kang manga kasuguan. Kailangan tupadun manga manughandug kang manga sugu ag manga surundanun tungkul sa manga pista kang pag-ipatupad, ag pakabanalun nida ti manga Sirang Pamahari.

²⁵ Balaw dapat nida pag-uringan kanda sadili sa panab-anan paghiyaput sa bangkay purya lang nu ti namatay kay ama ngatay ina, kay anak ngatay kay patar-ari lalaki, ag kay unman waya may asawa pag patar-ari babayi.

²⁶ Nu makahiyaput siya bangkay, kailangan niya ti paglumpiyu ag mangalagad dap pitu ka sirang,

²⁷ bag-u siya makasulud sa sulud pag sugkadan Balay Diyus sa pagsirbi ati, kailangan maghandug dap siya manga handug sa paglumpiyu para sa kay sadili. Aku, ti Panginuun Diyus, ti magsabi inda.”

²⁸ Magkun waya ti Panginuun, “Aku lang kanda maranahun. Unman may daga maranahun ti manga manughandug Israil, dahil aku mismu ti mangayaw sa kanda manga pangangailangan.

²⁹ Kanda karan-unun ginan sa manga handug pasalamat, manga handug sa paglumpiyu, ag manga handug bayad sa kasalanan. Ag ti manga bagay itinigana para sa kangku bumaliw kanda.

³⁰ Ti pinakamarinu pag un-an ani niyu ag ti bukudtangi niyu pag manga pamakaun sa kangku para yi sa manga manughandug. Pakan-i diman niyu manga pinakamarinu pag arina ti manga manughandug, hampay papaladan kanyu magtal-anakan.

³¹ Ti manga manughandug kailangan unman kumaun una hintay pag manuk sa tungud ngatay hayup namatay ngatay minatay iba ka hayup.”