Isikil 43 - Hanunuu

Binmalik sa Balay Diyus ti Makamaskihan Kadayawan Diyus

¹ Pagkatapus tunda, dinara maan aku tawu sa lakawan sa butlakan.

² Ag ati nakitan niku ti kadayawan Diyus Israil magras-ug ginan sa butlakan. Kay tunug niya pagras-ug ga magpaywas danum mabaskug, ag ti daga magkarayawan niya kadayawan.

³ Inda kang nakitan pag pangakakitun parihu diman sa tunda pag pangakakitun nakitan niku katpung ipinadamhak Diyus ti banwa Hirusalim, ag parihu diman sa nakitan niku pag pangakakitun ati sa saruy Sapa Kibar. Pagka nakitan niku inda, napayuk-ub aku sa daga.

⁴ Bag-u nagsulud ti kadayawan Panginuun sa Balay Diyus. Ati inda lakaw sa dalan sa butlakan.

⁵ Ipinatindug aku Ispiritu ag dinara sa sulud sugkadan. Ati nakitan niku ti Balay Diyus hinamuyan kadayawan Panginuun.

⁶ Habang matindugan ti tawu sa kang tupad, may nasaydan aku busis ginan sa Balay Diyus

⁷ magkun sa kangku, “Anak tawu, imaw inda kang tukawan hari ag ti tarat-an niku manga lulud. Sitay aku pag mag-uli kaibahan sa manga Israilita sa unman may katapusan. Balaw yi gid mauman ipakay-a manga Israilita ngatay nida manga hari kang banal pag ngaran sa panab-anan pagsamba sa manga diyus-diyusan ngatay sa pagsamba sa manga tinawu-tawu nida manga hari nagkaramatay yi.

⁸ Katpung sa kabag-u nagpatindug sida harandugan para sa kanda manga diyus-diyusan sa tupad niku harandugan, alad batu lang kay tab-anan. Inuringan nida kang banal pag ngaran sa panab-anan sa inda pag manga mayagting buwat. Nakan sa kang pangagalit, ipinadamhak niku sida.

⁹ Taynguna, kailangan umapas yi sida sa pagsamba sa manga diyus-diyusan hanggan sa manga tinawu-tawu nida manga hari namatay, ag mangulian aku kaibahan nida tugka aban.”

¹⁰ Magkun waya ti busis, “Anak tawu, imustara nimu sa nasakupan Israil ti ipinakakit niku sa kanmu pag Balay Diyus. Tultulan sa kanda ti histuda inda hampay mangay-a sida sa kanda manga kasalanan.

¹¹ Nu mangay-a sida sa tanan nida manga binwat, mustarahan sa kanda kay pagbuwat inda, hanggan kay manga lakawan ag manga mustara. Suratan nimu ti manga surundanun sa pagbuwat habang magbantay sida hampay masunud gid nida inda mayad.

¹² Ag imaw inda ti un-an pag kasuguan Balay Diyus: Kailangan banal gid kay sangput sa tungud bantud nu naan pag ipinatindug ti Balay Diyus.

Ti Harandugan

¹³ “Imaw inda ti sukat harandugan angay sa garamitun sukatan: Sa sangput harandugan may ga kanal 20 purgada kay bulang ag 20 purgada diman kay kaabasad ag may sanipa sa sangput unum ka purgada kay abwat.

^14-17 May tulu ka ugpu salug ti harandugan. Kay sa sirung gid pag ugpu salug 27 ka luk-an siku parihu kay aba ag bulang, ag 3 ka luk-an siku kay abwat. Kay sa karaw-an pag ugpu salug 24 ka luk-an siku parihu kay aba ag bulang, ag 4 ka luk-an siku kay abwat. May kanal sa palibut 20 ka purgada kay damul ag may sanipa sa palibut sampulu ka purgada kay lapad. Sa kay tungud pag ugpu 20 ka luk-an siku kudradu, ag pitu ka luk-an siku kay abwat, ag siyun pag pagsunugun ti manga handug. Ti upat ka suuk inda ga sungay hayup. May agdan pasulud sa harandugan sa butlakan baliwa inda.”

¹⁸ Magkun waya gid ti busis sa kangku, “Anak tawu, inda ti pagsabihun Panginuun Diyus: Nu matapus yi nakan ti harandugan, italaga inda sa panab-anan pagsagda manga handug pagsunugun hanggan pagwidwisik dugu manga hayup pag-isagda.

¹⁹ Ti manga manughandug magsirbi sa kangku, ginan sa lahi ni Libi hanggan manga linahi ni Saduk, pakan-an tudu baka ihandug nida bilang handug sa paglumpiyu.

²⁰ Pagbuul kawu dugu inda ag payidan sa upat ka ga sungay pag manga suuk harandugan hanggan sa manga suuk sa ikadwa pag palapag harandugan hanggan sa sanipa inda. Sa panab-anan inda malumpiyuhan ti harandugan.

²¹ Bag-u bul-un nimu ti tudu baka handug sa paglumpiyu, ag sunugun nimu inda sa rugar surunugan sa luwas Balay Diyus.

²² Sa ikadwa pag sirang, pagsagda kawu lalaki pag kambing unman may alangan bilang handug sa paglumpiyu sa harandugan, parihu sa binwat nimu sa tudu baka.

²³ Pagkatapus pagbuul kawu usa ka anak tudu baka hanggan usa ka karanidu unman may alangan,

²⁴ bag-u ihandug nimu sa atubangan Panginuun. Widwisikan inda asin manga manughandug ag ihandug nida sa Panginuun bilang handug pagsunugun.

²⁵ “Kada sirang, sa sulud usa ka duminggu, pagsagda kawu usa ka lalaki pag kambing, usa ka tudu baka, usa ka karanidu unman may alangan bilang handug sa paglumpiyu.

²⁶ Sa panab-anan inda malumpiyu ti harandugan ag mahimu yi gamitun.

²⁷ Ginan sa ikawalu pag sirang, manhandug yi sa harandugan ti manga manughandug kanyu manga handug pagsunugun hanggan manga handug para sa mayad pag pakiusa. Bag-u tanggapun niku kamu. Aku, ti Panginuun Diyus, ti magbagaw inda.”