Isikil 42 - Hanunuu

Ti Banal pag manga Sulud-sulud

¹ Bag-u dinara aku tawu sa luwas sugkadan Balay Diyus. Ati kami lakaw sa may salatan pag dalan. Ag ati ipinakakit niya sa kangku ti manga sulud-sulud sa salatan baliwa sa sulud sugkadan ag abwat pag balay sa isalpan.

² Inda pag manga sulud-sulud maatubangan sa salatan 100 ka luk-an siku kay aba ag 50 ka luk-an siku kay bulang.

³ May agwat 20 ka luk-an siku inda pag manga sulud-sulud hanggan Balay Diyus, ag maatubangan inda sa may dalan batu sa luwas sugkadan. Inda pag manga sulud-sulud may tulu ka ugpu salug

⁴ ag sa harapan inda may imaw lakawan 10 ka luk-an siku kay bulang ag 100 ka luk-an siku kay kaabaan. Kay manga sabian inda maatubangan sa salatan.

⁵ Kay manga sulud-sulud sa ikatlu pag ugpu salug mas dariit kaysa ikadwa pag ugpu salug, bag-u ti manga sulud-sulud sa ikadwa pag ugpu salug mas dariit kaysa kabag-u pag ugpu salug, dahil kailangan may lakawan sa tungud pag ugpu salug.

⁶ Ti tulu ka ugpu salug unman may tulduk, balaw parihu sa manga sugkadan. Ag dahil turungbawan amat-amat magdariit ti manga sulud-sulud ginan sa tungud atag sirung.

⁷ Inda pag manga abwat balay masamanan sa luwas sugkadan lakaw sa alad batu 50 ka luk-an siku kay kaaba.

⁸ Dahil nu unman inda pag alad batu, ti katunga abwat balay 50 ka luk-an siku makitan ginan sa luwas sugkadan. Ti buu kaabaan abwat balay, 100 ka luk-an siku, mag-akitan ginan sa Balay Diyus.

⁹ May manga dalan tag sa sulud sa sirung ugpu salug sa inda pag abwat balay ginan sa luwas sugkadan sa butlakan.

¹⁰ May imaw diman manga sulud-sulud sa salatan alad batu sa sulud sugkadan. Inda pag manga sulud-sulud sa sulud tupad sugkadan arani diman sa abwat pag balay sa isalpan.

¹¹ May imaw diman lakawan atubangan inda pag sulud-sulud, parihu sa inda pag manga sulud-sulud sa salatan. Kay kaabaan ag bulang parihu diman, hanggan kanda manga lakawan ag kay sukat inda. Ti manga sabian manga sulud-sulud sa kanaway

¹² parihu diman sa manga sulud-sulud sa kanaway. May sabian sa ras-ugan mismu dalan pasulud sa inda pag abwat balay. May alad batu sa saruy lakawan inda nu magsulud kawu ginan sa butlakan.

¹³ Magkun ti tawu sa kangku, “Inda pag manga sulud-sulud sa kanaway ag sa salatan, sa tupad sulud sugkadan, banal pag manga sulud-sulud. Dahil ti manga manughandug maghandug sa Panginuun siyun pag mangaun manga Pinaka Banal pag manga handug. Gamitun diman nida inda pag manga sulud-sulud paraulian manga handug pasalamat, manga handug sa paglumpiyu, ag manga handug bayad sa kasalanan. Dahil inda pag sulud-sulud banal.

¹⁴ Nu magluwas yi ti manga manughandug sa inda pag banal sulud-sulud, balaw dapat sida magdiritsu sa luwas pag sugkadan. Kailangan ubahun dapu nida kanda manga ginamit rutay sa pagsirbi, dahil banal inda pag manga rutay. Kailangan man-ilis dap sida tuhay pag rutay bag-u sida umatag sa bahagi Balay Diyus para sa manga tawu.”

¹⁵ Pagkatapus masukat tawu sa sulud Balay Diyus, dinara niya aku sa luwas. Ati kami lakaw sa lakawan sa butlakan, bag-u sinukat niya ti kabuuhan bulang Balay Diyus.

¹⁶ Sinukat niya kayu panukat ti butlakan baliwa, ag 500 ka luk-an siku kay kaabaan inda.

^17-19 Sinukat diman niya ti sa salatan, sa kanaway, hanggan sa isalpan, ag parihu diman kay kaabaan inda 500 ka luk-an siku.

²⁰ Nakan ti Balay Diyus kudradu kay sukat, ag nasangputan alad batu imaw ti tab-anan sa banal pag rugar ag sa pangkaraniwan rugar.