Isikil 41 - Hanunuu

¹ Bag-u dinara aku tawu sa Banal pag Sulud-sulud Balay Diyus. Sinukat niya ti baliw-baliw alad batu lakawan Banal pag Sulud-sulud, bag-u ti kada alad batu may abwat 6 ka luk-an siku

² ag may damul 5 ka luk-an siku. Kay bulang lakawan 10 ka luk-an siku. Sinukat diman niya ti sakahan Banal pag Sulud-sulud, 40 ka luk-an siku kay aba ag 20 ka luk-an siku kay bulang.

³ Bag-u sinmulud ti tawu sa Pinaka Banal pag Sulud-sulud. Sinukat niya ti baliw-baliw alad batu lakawan Pinaka Banal pag Sulud-sulud, bag-u ti kada alad batu 12 ka luk-an siku kay ka abwat ag 3 ka luk-an siku kay damul inda. Sampulu ka luk-an siku kay bulang lakawan.

⁴ Sinukat niya ti Pinaka Banal pag Sulud-sulud, ag 20 ka luk-an siku inda kay aba ag bulang. Bag-u magkun ti tawu sa kangku, “Imaw inda ti Pinaka Banal pag rugar.”

⁵ Bag-u sinukat tawu ti alad batu Balay Diyus, ag 6 ka luk-an siku kay damul inda. Sa inda pag alad batu, may mahanayan manga sulud-sulud kay bulang 4 ka luk-an siku.

⁶ Inda pag manga sulud-sulud may tulu ka ugpu salug, ag ti kada salug may 30 ka sulud-sulud. Ti alad batu Balay Diyus amat-amat magnipis sa kada salug hampay makatungbaw ti manga sulud-sulud sa alad batu unman yi kailangan manga panhigut.

⁷ Inda pag manga sulud-sulud sa palibut Balay Diyus amat-amat magluang ginan sa un-an salug tugka sa ikatlu pag salug.

⁸ Nakitan niku ti Balay Diyus maulian sa abwat pag rugar 6 ka luk-an siku kay ka abwat, ag inda diman kay patakinan manga sulud-sulud sa saruy Balay Diyus.

⁹ Ti sa luwas pag alad batu manga sulud-sulud 5 ka luk-an siku kay damul. May bakanti rugar sa karaw-an manga sulud-sulud inda

¹⁰ ag sa iba ka sulud-sulud may bulang 20 ka luk-an siku, ag masangputan inda sa Balay Diyus.

¹¹ May duwa ka sabian pasulud sa tunda pag manga sulud-sulud sa saruy Balay Diyus. Inda pag manga sabian maatubangan sa bakanti rugar; kay usa sa salatan ag kay usa sa kanaway. Sa tupad bakanti rugar may lakawan kay bulang 5 ka luk-an siku.

¹² May nakitan aku usa ka abwat pag balay masranguhan sa sulud sugkadan Balay Diyus sa isalpan. Kay bulang inda 70 ka luk-an siku ag kay aba 90 ka luk-an siku, bag-u kay damul alad batu inda 5 ka luk-an siku.

¹³ Bag-u sinukat tawu ti Balay Diyus, ag 100 ka luk-an siku kay kaaba inda. Kay sukat ginan sa dayu Balay Diyus atabug sa baliw alad batu abwat balay sa isalpan 100 ka luk-an siku.

¹⁴ Kay bulang sa sugkadan sa butlakan, sa atubangan Balay Diyus, 100 diman ka luk-an siku.

¹⁵ Bag-u sinukat tawu ti bulang abwat pag balay sa isalpan, masranguhan sa sulud sugkadan sa dayu Balay Diyus, hanggan ti manga alad batu inda sa kada saruy, ag 100 diman inda ka luk-an siku. Ti Banal pag Sulud-sulud, ti Pinaka Banal pag Sulud-sulud, ag ti sugkadan Balay Diyus

¹⁶ pinakalupkupan tabla, ginan sa salug tugka sa dariit manga gaha. Ti tulu ka sulud-sulud sa baliw-baliw saruy lakawan pinakalupkupan diman tabla ginan sa salug tugka sa gaha. Inda pag manga gaha mahimu maisaradu.

¹⁷ Kay lingub sa tungud sabian pasulud sa Pinaka Banal pag Sulud-sulud pinakalupkupan diman tabla. Ti buu lingub sa sulud Balay Diyus

¹⁸ may pamarinu manga kirubin duwa kay uyahun ag manga kayu palma.

¹⁹ Kay usa ka uyahun kirubin ga tawu bag-u maatubangan inda sa kayu palma. Kay usa waydi ka kirubin uyahun liyun bag-u maatubangan diman inda sa baliw kayu palma. Inda pag manga pamarinu nakaukit sa buu lingub Balay Diyus

²⁰ ginan sa salug tugka sa tungud, hanggan sa luwas pag lingub Banal pag Sulud-sulud.

²¹ Kudradu kay sukat ti tulduk sa may sabian Banal pag Sulud-sulud. Sa atubangan sabian Pinakabanal pag Sulud-sulud may imaw ga

²² harandugan kayu, 3 ka luk-an siku kay abwat, bag-u 2 ka luk-an siku kay bulang ag aba. Ti tanan bahagi inda, suru, manga salug hanggan kay manga saruy pudu kayu. Magkun ti tawu sa kangku, “Imaw inda ti lamisa sa atubangan Panginuun.”

²³ Ti Banal pag Sulud-sulud hanggan ti Pinakabanal pag Sulud-sulud may tigudwa ka talakup:

²⁴ ti kada usa may duwa ka bahagi mahimu matipluk.

²⁵ Ti manga talakup Banal pag Sulud-sulud may pamarinu kirubin hanggan manga kayu palma inukit, parihu sa manga lingub. Ag sa luwas pag sarakahan may bubungan kayu.

²⁶ Sa kada saruy sarakahan may dariit pamarinu manga kayu palma. Ti manga sulud-sulud sa saruy Balay Diyus may bubungan diman.