Isikil 40 - Hanunuu

Ti Bag-u Balay Diyus

^1-2 Katpung ikasampulu pag sirang un-an pag bulan, ika-25 pag timpu nimi pagkabihag — ika-14 pag timpu ginan sa pagkadamhak Hirusalim — sinuldan aku kamaskihan Panginuun ag pinakakitan pangakakitun. Ag sa tunda pag ipinakakit, dinara niya aku sa abwat pag bantud Israil. Sa pagbantay niku sa kanaway baliwa, may nakitan aku abwat pag balay ga usa ka banwa.

³ Dinara aku Panginuun ati ag may nakitan aku usa ka tawu kay histuda ga magsiak pag galang. Matindugan siya sa may puwirtahan banwa bag-u may bitbit duwa ka panukat: kay usa linu pag higut ag kay usa kayu.

⁴ Magkun ti tawu sa kangku, “Anak tawu, pagpatingi kawu ag bantayi kaayad ti tanan ipakakit niku sa kanmu dahil imaw inda kay dahilan nu hayga dinara kawu sitay. Bag-u tultulan sa nasakupan Israil ti tanan nimu nakitan.”

Ti Lakawan sa may Sakahan

⁵ Nakitan niku ti Balay Diyus magkasangputan alad batu. Bin-ul tawu kay panukat kayu, 6 ka luk-an siku kay aba angay sa garamitun sukatan, bag-u sinukat niya ti alad batu. 6 ka luk-an siku kay abwat inda ag katunda diman kay damul.

⁶ Bag-u nag-atag ti tawu sa may sabian Balay Diyus masranguhan sa sakahan. Nandayik siya sa agdan ag sinukat niya ti sabian, ag 6 luk-an siku inda kay bulang.

⁷ Sa kada suuk dalan may tulu ka sulud-sulud may imaw guwardiya magbantay. Inda pag manga sulud-sulud may sukat 6 ka luk-an siku ag katunda diman kay bulang, ag kay damul alad batu sa karaw-an 5 ka luk-an siku. Sa baliw manga sulud-sulud may dalan atabug sa sarakahan masranguhan sa Balay Diyus. Inda pag dalan 6 diman ka luk-an siku kay kaaba.

⁸ Sinukat diman tawu ti sarakahan,

⁹ ag 8 ka luk-an siku kay kaaba inda. Ti damul alad batu baliw-baliw dalan sarakahan may sukat 2 ka luk-an siku.

¹⁰ Ti tulu ka sulud-sulud pararihu kay bulang ati sa may manga guwardiya, ag kay manga alad batu sa karaw-an nida parihu diman kay damul.

¹¹ Sinukat diman tawu kay abwat inda pag dalan sa butlakan, ag 10 inda ka luk-an siku. Kay abwat inda sabian 13 lang ka luk-an siku.

¹² Sa atubangan kada sulud-sulud nu naan ti manga guwardiya ati, may ababa pag alad batu 1 ka luk-an siku kay abwat ag 1 ka luk-an siku kay damul. Inda pag manga sulud-sulud 6 ka luk-an siku kay kaaba katunda diman kay bulang.

¹³ Pagkatapus, sinukat tawu ti buu bulang dalan atabug sa sugkadan sa luwas, ag 25 inda ka luk-an siku. Umpisa sa may dayu alad batu sulud-sulud kay pagsukat inda nu naan asan ti manga guwardiya, atabug sa baliw alad batu parihu diman pag sulud-sulud.

¹⁴ Sinukat niya ti alad batu ginan sa may sabian atabug sa sakahan masranguhan sa luwas sugkadan ag 60 inda ka luk-an siku kay kaaba.

¹⁵ Kay kaabaan dalan ginan sa sabian atabug sa sakahan 50 ka luk-an siku.

¹⁶ May dariit manga gaha sa kada sulud-sulud nu naan magbantay ti manga guwardiya ag katunda diman sa manga alad batu sa karaw-an inda manga sulud-sulud. Inda pag manga alad batu may pamarinu manga inukit kayu palma.

Ti Luwas Sugkadan Balay Diyus

¹⁷ Bag-u dinara aku tawu sa luwas sugkadan. Ati may nakitan aku 30 ka sulud-sulud mahatayan sa may dalan batu masangputan sa sugkadan.

¹⁸ Inda pag dalan batu sa sirung abut tugka sa saruy dalan pasulud sa sugkadan. Kay bulang inda pag dalan batu pantay sa tunda pag manga dalan.

¹⁹ Bag-u sinukat tawu kay lapad ginan sa may dalan pasulud sa luwas sugkadan tugka sa dalan atabug sa sulud sugkadan, ag 100 ka luk-an siku kay lapad inda.

Ti Lakawan sa may Salatan

²⁰ Bag-u sinukat tawu kay aba ag abwat sabian sa salatan. Inda pag sabian atabug sa luwas sugkadan.

²¹ Ti kada suuk dalan may imaw diman tulu ka sulud-sulud nu naan magbantay ti manga guwardiya. Kay bulang inda pag manga sulud-sulud ag manga alad batu sa karaw-an inda, hanggan sarakahan inda, parihu diman sa sabian sa butlakan. Kay kaabaan sabian sa butlakan 50 ka luk-an siku ag kay bulang 25 may tunga ka luk-an siku.

²² Kay manga gaha, sarakahan, ag pamarinu kayu palma parihu diman sa sabian sa butlakan. May pitu ka halintang patungud sa sabian, ag may sarakahan sa pudpud.

²³ Sa may sulud sabian may dalan masranguhan sa dalan sa salatan, parihu sa dalan sa butlakan. Sinukat diman tawu kay lapad duwa ka dalan, ag 100 inda ka luk-an siku.

Ti Lakawan sa Kanaway

²⁴ Bag-u dinara aku tawu sa kanaway, ag ati may nakitan aku sabian. Sinukat niya ti sarakahan inda ag ti manga alad batu sa sulud, ag parihu diman kay sukat inda sa iba.

²⁵ May manga gaha diman sa palibut sabian ag sarakahan parihu sa iba. Kay kaabaan dalan 50 ka luk-an siku ag kay bulang 25 may tunga ka luk-an siku.

²⁶ May pitu diman ka halintang patungud sa sabian ag may sarakahan diman sa pudpud. Ti manga alad batu sa sabian may manga pamarinu kayu palma.

²⁷ May imaw diman sabian sa sulud sugkadan, maatubangan sa kanaway. Sinukat tawu kay lapad inda ginan sa dalan atabug sa luwas dalan sa kanaway, ag 100 ka luk-an siku inda.

Ti manga Lakawan Atabug sa Sulud Sugkadan

²⁸ Bag-u dinara aku tawu sa sulud sugkadan. Ati kami lakaw sa dalan sa kanaway. Sinukat niya ti dalan, ag parihu diman inda kay ka daka sa iba.

²⁹ May imaw diman inda manga sulud-sulud, nu naan pag magbantay ti manga guwardiya. Kay ka daka inda pag manga sulud-sulud ag manga alad batu sa karaw-an inda, hanggan sarakahan, parihu diman kay ka daka sa iba. May manga gaha diman sa palibut dalan ag sakahan. Kay kaabaan dalan 50 ka luk-an siku ag kay abwat 25 may tunga ka luk-an siku.

³⁰ (Ti manga sarakahan manga dalan masangputan sa sulud sugkadan may aba 5 ka luk-an siku ag may abwat 25 may tunga ka luk-an siku.)

³¹ Ti sarakahan lakawan sa kanaway maatubangan sa luwas sugkadan, ag may pamarinu inda manga kayu palma inukitan sa baliw-baliw alad batu. May walu ka halintang patungud sa inda pag dalan.

³² Bag-u dinara maan aku tawu sa sulud sugkadan. Ati kami lakaw sa dalan sa butlakan. Sinukat niya ti dalan ag parihu diman inda kay ka daka sa iba.

³³ May imaw diman inda manga sulud-sulud nu naan pag magbantay ti manga guwardiya. Kay ka daka inda pag sulud-sulud ag manga alad batu, hanggan sarakahan, parihu diman kay ka daka sa iba. May manga gaha diman sa palibut dalan ag sarakahan. Kay kaabaan dalan 80 ka luk-an siku ag kay abwat 25 may tunga ka luk-an siku.

³⁴ Ti sarakahan inda masranguhan sa luwas sugkadan, ag may pamarinu inda manga kayu palma inukitan sa magkabaliw alad batu. May walu ka halintang patungud sa inda pag dalan.

³⁵ Bag-u dinara aku tawu sa sulud sugkadan. Ati kami lakaw sa dalan sa salatan. Sinukat niya ti dalan, ag parihu diman inda kay ka daka sa iba

³⁶ May imaw diman inda manga sulud-sulud, nu naan pag magbantay ti manga guwardiya. Kay ka daka inda pag manga sulud-sulud ag manga alad batu sa karaw-an inda, hanggan sarakahan, parihu diman kay ka daka sa iba. May manga gaha diman sa palibut dalan ag sarakahan. Kay kaabaan dalan 50 ka luk-an siku ag kay abwat 25 may tunga ka luk-an siku.

³⁷ Ti sarakahan inda maatubangan sa luwas sugkadan, ag may manga pamarinu manga kayu palma inukitan sa magkabaliw alad batu. May walu ka halintang patungud sa inda pag dalan.

Ti manga Sulud-sulud Pag-alistuhan manga Handug

³⁸ Bag-u may nakitan aku sulud-sulud may sabian, sa tupad sarakahan sa may lakawan sa salatan. Ati pag-ugasan ti manga handug surunugun.

³⁹ Sa kada saruy sarakahan may duwa ka lamisa nu naan pag-iyawun ti manga hayup bilang handug pagsunugun, handug sa paglumpiyu kasalanan, ag handug bayad sa kasalanan.

⁴⁰ May duwa waya gid ka lamisa sa kada saruy agdan pasulud sa dalan sa salatan.

⁴¹ Nakan may walu tanan ka lamisa pag-iyawan manga handug, upat sa sarakahan ag upat sa saruy dalan.

⁴² May upat diman ati ka lamisa buwat sa batu tinapyasan, nu naan pag-ipauli ti manga garamitun para sa pag-iyaw manga handug sunugun ag iba waya pag manga handug. Inda pag manga lamisa 30 ka purgada kay bulang ag 20 ka purgada kay abwat.

⁴³ Sa palibut alad batu sarakahan may manga sarab-itan tulu ka purgada kay aba. Ag nakitan niku sa manga lamisa ti manga taguban ihandug.

Ti manga Sulud-sulud manga Manug-asiwa

⁴⁴ May duwa ka sulud-sulud sa sulud sugkadan. Kay usa sa saruy dalan sa salatan bag-u maatubangan sa kanaway, ag kay usa sa saruy dalan sa kanaway ag maatubangan sa salatan.

⁴⁵ Magkun ti tawu sa kangku, “Ti sulud-sulud maatubangan sa kanaway para sa manga manughandug magdumara sa Balay Diyus,

⁴⁶ ag ti sulud-sulud maatubangan sa salatan para sa manga manughandug magpanguna sa harandugan. Inda sida manga linahi ni Saduk, ag sida lang sa manga lahi ni Libi ti pinahintulutan makapakarani sa kadayawan Panginuun para makasirbi sa kanya.”

⁴⁷ Bag-u sinukat tawu ti sulud sugkadan, ag 100 ka luk-an siku inda kay luag ag aba. Ti harandugan asan sa atubangan Balay Diyus.

Ti Balay Diyus

⁴⁸ Bag-u dinara aku tawu sa sarakahan Balay Diyus. Sinukat niya ti magkabaliw alad batu sa may dalan sarakahan, ag ti kada alad batu may abwat 5 ka luk-an siku ag kay damul 3 ka luk-an siku. Kay abwat dalan sarakahan 14 ka luk-an siku.

⁴⁹ Ti sarakahan 20 ka luk-an siku kay aba ag 11 ka luk-an siku kay bulang. May sampulu ka halintang patungud sa sarakahan, ag may tulduk sa kada saruy.