Isikil 4 - Hanunuu

Ipinakakit ni Isikil Nu Kabitay Sakupun ti Hirusalim

¹ Magkun waya gid ti Panginuun sa kangku, “Taynguna, kawu anak tawu, pagbuul kawu daga pinaganit ag paulian inda sa kanmu atubangan, ag guhitan asan ti Hirusalim.

² Bag-u buwata inda ga sa pagpalibutan manga kalaban. Paulii inda manga pan-gira: manga kampu, agdan sa alad batu, tinumpuk daga hampay madayik ti alad batu, hanggan manga kayu panrup-ag sa alad batu. Ag palibuti inda manga kampu.

³ Bag-u pagbuul kawu malapad pag baul, paulian inda sa tab-anan nimu ag sa banwa bilang alad batu. Pag-atubang kawu sa banwa ga sa paggirahun nimu inda. Bumaliw palatandaan inda sa nasakupan Israil girahun sida nida manga kalaban.

⁴ “Pagkatapus, pagpahuway kawu matagilidan sa wala baliwa bilang pinagkatanda pagpas-anun nimu ti kasalanan nasakupan Israil. Pas-anun nimu kanda kasalanan angay sa kayamuun manga sirang nimu pahuway.

⁵ Ti usa ka sirang katumbas usa ka timpu. Nakan sa sulud 390 ka sirang pas-anun nimu kanda kasalanan.

⁶ Pagkatapus, pagpalisud kawu sa sikun ag pas-ana diman nimu ti kasalanan nasakupan Huda sa sulud upatpulu ka sirang; ti usa ka sirang katumbas diman maan usa ka timpu.

⁷ Bantayi maan ti daga pinaganit, histuda Hirusalim pagsakupun, ag pagtultul kawu laban sa Hirusalim nakakalunkun kanmu kamang rutay.

⁸ Gapusun niku kawu lubid hampay balaw kawu makapalisud tugka matapus ti pagpakakit nimu pagsakup sa banwa.

⁹ “Taynguna, pagbuul kawu tirigu, sibada, manga butiran pag urupiun, balatung, dawa ag ispalta, bag-u paulian inda tanan sa usa ka sukadan ag imaw inda ti buwatun nimu tinapay. Inda kanmu kan-un sa sulud 390 ka sirang mahuwayan kawu matagilidan sa wala baliwa.

¹⁰ Manga duwa lang ka guhit may tunga pag karan-unun kanmu kan-un kada sirang sa itinagka pag manga udas.

¹¹ Ag manga tunga litru lang danum kanmu inmun kada sirang sa itinagka diman pag udas.

¹² Pagtama kawu tinapay kada sirang habang magbantay ti manga tawu. Tamaa inda parihu sa pagtama tinapay sibada. Gamita pamagba ti uga pag ugat tawu. Bag-u kan-a ti tinapay.

¹³ Dahil parihu diman sa kainda ti mangyari sa nasakupan Israil, mangaun sida manga karan-unun pagbaliwun mauring sa manga rugar nu naan ipabihag niku sida.”

¹⁴ Dapat magkun aku, “Panginuun Diyus, unman gid niku inuringan kang sadili ginan sa kang anak waya aku tugka kainda. Unman gid aku nakakaun hayup namatay ngatay minatay iba hayup. Unman diman aku nakakaun hayup pagbaliwun mauring.”

¹⁵ Nagsagut ti Panginuun, “Hu, ugat yi lang baka ti gamitun nimu pamagba sa halip ugat tawu.”

¹⁶ Magkun waya gid ti Panginuun, “Anak tawu, bawasan niku ti karan-unun sa Hirusalim. Takalun nasakupan Hirusalim kanda karan-unun hanggan danum bag-u mangaun sida ag manginum may kaaburiduhan ag may karukuan

¹⁷ dahil sa kakurangan sa karan-unun ag danum. Mamarantayan sida may kadalaan, ag amat-amat sida magkaramatay dahil sa kanda kasalanan.”