Isikil 39 - Hanunuu

Ti Pagkadamhak ni Gug hanggan Niya manga Sundalu

¹ Magkun ti Panginuun sa kangku, “Anak tawu, pagbagaw kawu laban sa kan Gug. Sabihi siya aku, ti Panginuun Diyus, magkun, ‘Kalaban niku kawu, Gug, takinan Misik ag Tubal.

² Lisudun niku kawu ag guyudun ginan sa arayu pag rugar sa salatan tugka sa makaras-ug kawu sa manga bantud Israil.

³ Bag-u bul-un niku kanmu armas,

⁴ maruris kawu ati sa manga bantud Israil ag ti tanan nimu sundalu, hanggan ti tanan kaibahan nimu pag manga nasyun. Ipatinduk niku kanyu manga bangkay sa tuhay-tuhay pag kalasi manuk magkaun bangkay hanggan sa maraisug pag manga hayup.

⁵ Midamhak gid kamu sa karatagan dahil aku, ti Panginuun Diyus, ti magsabi inda.

⁶ Sunugun niku ti Magug hanggan ti manga nasyun arani sa dagat, kay manga nasakupan inda magpangabuhi unman may pagkadalaan kadilikaduhan. Bag-u maalaman nida aku ti Panginuun.

⁷ Ipaalam niku sa kang nasakupan manga Israilita kuntay banal kang ngaran, ag balaw yi niku pahintulutan mangay-a waya inda. Bag-u maalaman manga nasyun aku ti Panginuun, ti banal pag Diyus Israil.

⁸ Rumas-ug gid inda pag udas kang pagsabihun. Aku, ti Panginuun Diyus, ti magsabi inda.

⁹ “ ‘Nu rumas-ug yi inda pag udas, tipunun nasakupan Israil mag-uli sa manga banwa kanyu manga armas — dariit ag daraka pag manga panangga, ti manga pamana, manga bastun, ag manga bangkaw — ag kanda inda gamitun pan-gatung sa sulud pitu ka timpu.

¹⁰ Balaw yi kailangan mangayu waya sida sa karatagan ngatay sa katalunan, dahil may manga armas yi sida pamagba. Nakan agawan diman nida tunda pag manga nangagaw sa kanda. Aku, ti Panginuun Diyus, ti magsabi inda.

¹¹ “ ‘Sa tunda pag udas, ilubung niku si Gug hanggan kay mayamu manga tawuhan ati sa Israil, sa Karatagan manga Manuglakaw, sa butlakan baliwa Dagat Namatay. Maluang inda pag lulubngan, nakan unman yi makalawuy ti manga maglakaw ati. Ag ingarnan yi inda Karatagan Gurupu ni Gug.

¹² “ ‘Pitu gid ka bulan ti paglubung manga Israilita sa kanda hampay malimpiyuhan ti daga.

¹³ Ti tanan nasakupan mangawat sa paglubung. Ag inda pag sirang unman gid malimtan manga Israilita, dahil sa panab-anan inda madayaw aku. Aku, ti Panginuun Diyus, ti magsabi inda.

¹⁴ Pagkalawuy pitu ka bulan, may manga tawu piliun bumuwat sa inda lang gid pag buruwatun: palibutun nida tunda pag rugar agud bantayan nu may bangkay waya nasawad, ag kanda inda ipalubung, hampay malimpiyuhan ti daga.

¹⁵ Nu may makitan nakan sida manga but-ul tawu, kanda inda tandaan agud makitan manga manuglubung ag mailubung nida sa “Karatagan Gurupu ni Gug.”

¹⁶ (May banwa diman ati sa kay arani ingarnan “Mayamu manga Tawu.”) Sa panab-anan inda malimpiyuhan nida ti daga.’ ”

^17-18 Magkun waya ti Panginuun Diyus sa kangku, “Anak tawu, tipuna ti tanan pag kalasi manga manuk hanggan maisug pag manga hayup ati sa manga bantud Israil, dahil mangalistu aku sa kanda mayamu pag manga handug. Mangaun sida nayi ag manginum dugu maisug manga sundalu hanggan manga takinan, parihu lang sa magkaun sida manga karanidu, manga baka hanggan kambing pinatabul ginan sa Basan.

^19-20 Sa inda pag handaan iinalistu niku para sa kanda, manpasawa-sawa sida sa kaun ag inum tugka sa mabusug gid sida ag magkaralangu. Manpasawa-sawa gid sida sa kaun manga kabayu, manga manugkabayu, hanggan maisug manga sundalu. Aku, ti Panginuun Diyus, ti magsabi inda.

²¹ “Ipakakit niku kang kadayawan sa manga nasyun. Nu parusahan yi niku ti manga nasyun, makitan nida nu kabitay aku, ti makamaskihan.

²² Ag ginan sa tunda pag sirang, maalaman nasakupan Israil aku ti Panginuun nida Diyus.

²³ Maalaman diman iba manga nasyun binihag ti nasakupan Israil dahil sa kanda manga kasalanan, dahil unman sida nagtupad sa kangku. Pinabay-anan niku sida girahun manga kalaban ag panmatyun.

²⁴ Binwat lang niku sa kanda ti angay sa kanda binwat balaw mayad ag daut. Pinabay-anan gid niku sida.”

²⁵ Magkun waya gid ti Panginuun Diyus, “Dapat taynguna, kaawaan niku ti nasakupan Israil, ti manga linahi ni Hakub, bag-u ibalik niku kanda mayad pag kahamtangan, hampay maparangalan kang banal pag ngaran.

²⁶ Nu mangulian yi sida sa kanda tahimik pag daga ag unman may pagkadalaan, kalimtan yi nida kanda kakay-ahan hanggan kanda magpudil sa kangku.

²⁷ Bul-un niku sida sa manga daga nida manga kalaban, bag-u sa panab-anan inda makitan mayamu manga nasyun kang pagkabanal.

²⁸ Bag-u maalaman niku nasakupan aku ti Panginuun nida Diyus. Dahil una ipinabihag niku sida sa iba manga nasyun, ibinalik di maan niku sida tanan sa kanda daga unman gid may nasawad una di usa.

²⁹ Balaw yi gid niku sida pabay-anan dahil ipadara niku kang Ispiritu sa kanda. Aku, ti Panginuun Diyus, ti magsabi inda.”