Isikil 38 - Hanunuu

Ti Tultulanun Laban sa kan Gug

¹ Magkun ti Panginuun sa kangku,

² “Anak tawu, pagbagaw kawu laban sa kan Gug taga Magug, imaw ti takinan Misik ag Tubal.

³ Sabihi siya aku, ti Panginuun Diyus, magkun: Gug takinan Misik ag Tubal, kalaban niku kawu.

⁴ Lisudun niku kawu ag banwitun, bag-u guyudun niku kawu hanggan ti tanan nimu manga sundalu, manga kabayu, manga manugkabayu hanggan kanmu manga mayamu sundalu may daraka ag dariit pag manga panangga ag pudu may baladaw.

⁵ Kumuyug sa kanda ti manga sundalu Pirsiya, Itiyupya hanggan Libya, may manga panangga ag hilmit,

⁶ hanggan diman ti Gumir ag Bit Tugarma sa salatan ag ti tanan nida manga sundalu. Mayamu pag manga nasyun ti kumuyug sa kanmu.

⁷ “Pag-alistu yi kawu, hanggan ti tanan nimu manga sundalu. Panguluhi sida sa paglaban.

⁸ Dahil aban suguun niku kamu giraha ti Israil, sa kadugayun panahun namung-aw dahil nawasak sa labanan. Dapat ipinatindug uman inda ag sa tunda diman pag udas nakabalik yi ti manga nasakupan inda sa bantud Israil ginan sa manga nasyun ag mag-ulian yi may kahusayan.

⁹ Kawu hanggan kanmu manga sundalu, ag kanmu kaibahan manga nasyun, man-gira sa Israil ga bagyu, ag palibutan niyu inda parihu sa pagsangput rurum.”

¹⁰ Magkun waya ti Panginuun Diyus, “Sa tunda pag panahun gumayak kawu daut.

¹¹ Sumabi kawu: Girahun niku ti Israil kay manga banwa inda unman may alad batu, sabian, talakup, ag kay manga nasakupan inda mag-ulian may kahusayan ag unman may pagkadalaan kadilikaduhan.

¹² Agawun niku kay manga kasiyunan inda pag mapung-aw banwa kaybi, taynguna punu yi manga tawu nagbalik ginan sa tuhay-tuhay pag manga nasyun. Mayamu kanda manga hayup hanggan manga kasiyunan, bag-u pagbaliwun nida kanda nasyun imaw ti pinakamahalaga pag nasyun sa kalibutan.

¹³ “Sumabi sa kanmu ti nasakupan Shiba ag Didan, hanggan ti manga manugnigusyu sa manga banwa Tarsis, ‘Tinipun yi aw nimu kanmu mayamu manga sundalu hampay bul-un ti manga pilak, gintu, hayup, ag manga kasiyunan manga Israilita?’

¹⁴ “Nakan Anak tawu, sabihi si Gug aku, ti Panginuun Diyus, magkun: Sa udas mangulian yi may kahusayan kang nasakupan manga Israilita, maalaman nimu inda.

¹⁵ Bag-u girahun nimu sida ginan sa arayu nimu pag rugar sa salatan, kaibahan kanmu mayamu sundalu masakyan sa kabayu.

¹⁶ Girahun nimu kang nasakupan manga Israilita parihu sa rurum magsangput sa kanda. Hu, Gug, ipagira niku sa kanmu kang banwa, hampay sa panab-anan nimu maipakilala niku sa manga nasyun kang kabanalan. Bag-u maalaman nida aku ti Panginuun.”

¹⁷ Magkun waya ti Panginuun Diyus, “Sa kabag-u pag panahun, ibinarita niku sa panab-anan niku manga suruguun purupita Israil, sa uryan panahun may ipagira aku sa Israil. Ag kawu ti pagtukuyun niku kaybi.

¹⁸ Dapat Gug, sa tunda pag sirang indaay ti mangyari sa kanmu: Nu girahun yi nimu ti Israil, magalit gid aku. Aku, ti Panginuun Diyus ti may sabi inda.

¹⁹ Ag sa masyadu niku pangagalit, pag-isumpa niku manlinug mabaskug sa daga Israil.

²⁰ Mangirkirug sa kang kadayawan ti tanan tawu sa kalibutan hanggan ti tanan pag kalasi hayup: ti maglakaw, ti maglayang, ti magyapang, ag ti maglanguy. Magkaragulhung ti manga bantud hanggan ti manga tagudtud, bag-u magkararup-ag ti manga alad batu.

²¹ Aku, ti Panginuun Diyus, magkun: Ipamatay niku kawu Gug, ati sa kang manga bantud, ag kanmu manga sundalu manmaratyan.

²² Parusahan niku kawu ag kanmu manga sundalu, hanggan ti kaibahan nimu pag manga nasyun. Parusahan niku kamu sarut ag pagmaratyan. Pauranan niku kamu mabaskug pag uran, yilu ga manga batu, ag maglabdaban asupri.

²³ Sa panab-anan inda ipakakit niku kang kapangyarihan ag kabanalan sa tanan nasyun. Bag-u maalaman nida aku ti Panginuun.”