Isikil 37 - Hanunuu

Ti Ratag may Mayamu pag manga But-ul

¹ Taynguna, sinuldan aku kamaskihan Panginuun ag dinara aku niya Ispiritu sa karaw-an ratag punu but-ul.

² Ipinalibut aku Panginuun ati, ag nakitan niku ti masyadu mayamu pag manga but-ul nagkarawatak ati sa ratag. Mamara gid pag manga but-ul.

³ Pinaingana aku Panginuun, “Anak tawu, mabuhi aw waya nguna inda pag manga but-ul?” Nagsagut aku, “Panginuun Diyus, kawu lang gid ti makaalam inda.”

⁴ Magkun maan siya sa kangku, “Sabihi inda pag mamara manga but-ul, ‘Pagpatingi kamu sa kang pagsabihun.’

⁵ Dahil aku, ti Panginuun Diyus, magkun sa kanda: Pakan-an niku kamu arup, ag mabuhi kamu.

⁶ Pakan-an niku kamu manga kusug hanggan manga nayi, ag saputun niku kamu sa lukub. Pakan-an niku kamu arup, ag mabuhi kamu. Bag-u maalaman niyu aku ti Panginuun.”

⁷ Nakan sinunud niku ti isinugu sa kangku. Mintaras magbagaw aku, nasaydan niku ti maglilitikan manga but-ul magsurugdungan ag nagsumag.

⁸ Nakitan diman niku nagkaimaw inda manga kusug hanggan manga nayi bag-u nasaput inda sa lukub, dapat unman waya mag-arup.

⁹ Magkun ti Panginuun sa kangku, “Anak tawu, sabihi ti durus aku, ti Panginuun Diyus, magkun: Durus, pag-uyup kawu ginan sa upat ka bahagi, sa pagpakaun arup sa inda pag manga namatay hampay mabuhi sida.”

¹⁰ Nakan sinunud niku kay isinugu sa kangku, ag nabuhi ti manga namatay. Tinmindug sida, ag masyadu sida mayamu, ga usa ka daka pag gurupu sundalu.

¹¹ Magkun waya ti Panginuun sa kangku, “Anak tawu, inda pag manga but-ul imaw ti nasakupan Israil. Magkun sida, ‘Mamara yi kanmi manga but-ul ag unman yi kami may pag-asa; ipinadamhak yi kami.’

¹² Nakan sabihi sida aku, ti Panginuun Diyus, magkun: Nasakupan niku, bukasan niku kanyu manga lulubngan ag buhiun niku kamu, bag-u ibalik sa daga Israil.

¹³ Bag-u maalaman niyu, Nasakupan niku, aku ti Panginuun, nu bukasan yi niku kanyu manga lulubngan ag buhiun kamu.

¹⁴ Ipakaun niku kang Ispiritu sa kanyu ag mabuhi kamu, bag-u pauliun niku kamu sa kanyu sadili daga. Bag-u maalaman niyu aku ti Panginuun. Nu unu kang pagsabihun, pagtupadun niku. Aku, ti Panginuun, ti magsabi inda.”

Inusa ti Huda ag Israil

¹⁵ Magkun ti Panginuun sa kangku,

¹⁶ “Anak tawu, pagbuul kawu usa ka pulud kayu bag-u suratan indaay: ‘Ti kaharian Huda.’ Bag-u pagbuul waya gid kawu usa ka pulud bag-u suratan indaay: ‘Ti kaharian Israil.’

¹⁷ Dugtunga inda pag duwa ka pulud kayu hampay bumaliw usa wadi kanmu paghiyaptan.

¹⁸ Nu paingan-un kawu nimu kasimanwa nu unu kay ibug sabihun tunda,

¹⁹ sabihi sida, ‘Imaw inda ti pagsabihun Panginuun Diyus: Dugtungun niku ti pulud kayu pahalimbawa sa Israil ag ti pulud kayu pahalimbawa sa Huda, ag bumaliw usa wadi kang paghiyaptan.’

²⁰ “Habang paghiyaptan nimu ti pulud kayu kanmu sinuratan, pakakitan inda sa manga tawu,

²¹ ag sabihi sida, ‘Inda ti pagsabihun Panginuun Diyus: Tipunun niku ti manga Israilita ginan sa tanan nasyun kinalatan nida, bag-u daran-un sida pabalik sa kanda sadili daga.

²² Usahun wadi niku sida ka nasyun sa daga Israil. Usa wadi ka hari ti humari sa kanda, ag unman yi sida madwa waya ka bahagi ngatay matunga sa duwa ka kaharian.

²³ Unman yi nida uringan kanda sadili sa panab-anan pagsamba sa kanda mayagting manga diyus-diyusan ngatay sa pagbuwat sa una hintay pag kasalanan. Dahil iribri niku sida sa tanan nida binwat kasalanan ag lumpiyuhun niku sida. Bumaliw nasakupan niku sida, ag aku kanda Diyus.

²⁴ Humari sa kanda ti hari ginan sa linahi niku suruguun si Dabid. Sida tanan may usa lang ka manug-alaga. Sundun nida mayad kang manga sugu ag manga surundanun.

²⁵ Mangulian sida sa daga niku ipinakaun sa kang suruguun sa kan Hakub, ti daga nu naan nangulian kanda manga ginurang. Ati sida hanggan kanda manga linahi pag mangulian tugka aban, bag-u humari sa kanda ti hari ginan sa linahi niku suruguun si Dabid sa unman may katapusan.

²⁶ Mamuwat aku usa ka kasunduan sa kanda kuntay bumaliw mayad kanda kahamtangan ag inda pag kasunduan pumarargu tugka aban. Pauliun niku sida sa kanda daga ag payamuun niku sida, bag-u ipatindug niku kang Balay Diyus sa kanda karaw-an sa unman may katapusan.

²⁷ Mangulian aku kaibahan nida. Diyus nida aku, ag sida kang nasakupan.

²⁸ Ag nu pumirmaminti yi kang banal pag Balay Diyus sa kanda sa unman may katapusan, maalaman manga nasyun aku, ti Panginuun, ti nagpabanal sa nasakupan Israil.’ ”