Isikil 36 - Hanunuu

Ti Tultulanun sa manga Bantud Israil

¹ Magkun ti Panginuun, “Anak tawu, pagbagaw kawu sa manga bantud Israil. Sabihi sida, ‘Manga bantud Israil, patingihi niyu ti pagsabihun Panginuun.

² Inda ti pagsabihun Panginuun Diyus: Magkun kanyu manga kalaban sa kanda yi kunu kanyu manga bantud.’

³ “Nakan anak tawu, sabihi ti manga bantud Israil kuntay aku, ti Panginuun Diyus magkun: Ginira kamu tuhay-tuhay pag manga nasyun una naan ginan baliwa, bag-u taynguna sida ti mag-apu sa kanyu. Pinuyaan nida kamu ag pagpakay-ahun.

^4-5 Nakan kamu pag manga bantud, manga luung, manga karatagan, manga daut manga rugar hanggan manga mapung-aw pag manga banwa ginira ag pinuyaan manga nasyun sa kanyu sangput, patingihi niyu kang pagsabihun. Aku, ti Panginuun Diyus magkun, masyadu gid kang pangagalit sa inda pag manga nasyun lalu yi gid sa Idum, dahil inagaw nida kang daga may kabayaan ag pagpamuya, dahil gustu gid nida apuun ti manga paraharaban inda.

^6-7 “Nakan anak tawu, pagbagaw kawu sa daga Israil. Sabihi ti manga bantud, manga tagudtud, manga luung hanggan manga karatagan kuntay aku, ti Panginuun Diyus magkun: Inagwanta niyu ti pagpakay-a manga nasyun sa palibut niyu. Nakan sa masyadu niku pangagalit aku, ti Panginuun Diyus, magsumpa kuntay mangay-a diman tunda pag manga nasyun.

⁸ Dapat kamu, pag manga bantud Israil, may manga kayu tumubu sa kanyu, bag-u bumurak inda para sa kang nasakupan manga Israilita, dahil arani yi sida muli.

⁹ Pagpatingi kamu! Alagaan niku kamu. Araduhun niku kanyu daga ag tanuman.

¹⁰ Payamuun niku kanyu manga nasakupan — ti buu nasakupan Israil. Ipatindug uman niku kanyu manga banwa nagkaradaut, ag ulianan maan inda niku nasakupan.

¹¹ Payamuun niku kanyu manga tawu hanggan kanyu manga hayup. Pauliun maan niku ti manga tawu sa kanyu parihu sa kabag-u, ag paunladun niku kamu subra waya sa kabag-u. Bag-u maalaman niyu aku ti Panginuun.

¹² Ibalik niku ti manga nasakupan manga Israilita sa kanda daga. Sida ti umapu sa daga, ag unman yi gid niyu bul-un uman kanda manga anak.”

¹³ Magkun waya ti Panginuun Diyus, “Magkun ti manga tawu sa kanyu pagmatyun niyu kanyu manga nasakupan hanggan pagduraun niyu ti manga anak sa kanyu nasyun.

¹⁴ Dapat kainda ginan, balaw yi gid panmatyun kanyu manga nasakupan. Ag balaw yi niyu duraun ti manga anak sa kanyu nasyun.

¹⁵ Balaw yi niku pahintulutan puyaan kamu ngatay pakay-ahun iba manga nasyun. Ag balaw yi niku pahintulutan midamhak kanyu nasyun. Aku, ti Panginuun Diyus, ti may sabi inda.”

¹⁶ Magkun waya gid ti Panginuun sa kangku:

¹⁷ “Anak tawu, katpung ti manga Israilita mag-ulian waya sa kanda daga, inuringan inda nida sa panab-anan nida daut pag ugali ag buwat. Sa kang magbantay, kanda ugali mauring parihu sa babayi magkadugu.

¹⁸ Nakan ipinaagum niku sa kanda kang pangagalit dahil sa kanda pagmaratyan sa daga Israil, hanggan dahil sa kanda pagsamba sa manga diyus-diyusan imaw ti nagpauring sa inda pag daga.

¹⁹ Pinanwayak niku sida sa iba manga nasyun. Binwat ngani niku ti angay sa kanda ugali ag pagpangabuhi.

²⁰ Una naan tag sida pag umatag pag manga nasyun, mag-ipakay-a kang banal pag ngaran. Dahil magkun ti manga tawu, ‘Manga nasakupan sida Panginuun, dapat pinaighit niya sida sa kay daga.’

²¹ Magkaaburidu gid aku sa kang banal pag ngaran pag-ipauli sa kakay-ahan nasakupan Israil una naan tag sida pag mag-atag pag manga nasyun.

²² Nakan sabihi ti nasakupan Israil aku, ti Panginuun Diyus, magkun: Nasakupan Israil, pag-ipabalik niku kamu sa kanyu daga balaw dahil sa karapat-dapat kamu pabalikun ati. Pagbuwatun niku inda dahil sa kang banal pag ngaran kanyu pagpakan-an kakay-ahan una naan tag kamu pag mag-atag pag manga nasyun.

²³ Aku, ti Panginuun Diyus magkun, ipakakit niku kang pagkabanal kaabwat-abwatan pag ngaran pinakan-an niyu kakay-ahan sa manga nasyun. Bag-u maalaman tunda pag manga nasyun aku ti Panginuun nu ipakakit niku kang pagkabanal sa kanda sa panab-anan niku buwatun sa kanyu.

²⁴ Dahil bul-un niku kamu sa tuhay-tuhay pag manga nasyun bag-u pabalikun sa kanyu sadili daga.

²⁵ Widwisikan niku kamu malumpiyu pag danum hampay lumumpiyu kamu sa tanan niyu uring, hanggan balaw yi kamu magsamba sa manga diyus-diyusan.

²⁶ Pakan-an niku kamu bag-u pag tagipusuun hanggan ispiritu. Kanyu maganit tagipusuun bumaliw masurundun pag tagipusuun.

²⁷ Pakan-an diman kamu niku Ispiritu hampay masunud niyu maayus kang manga sugu hanggan surundanun.

²⁸ Mangulian kamu sa daga ipinakaun niku sa kanyu manga ginurang. Kamu kang nasakupan ag aku kanyu Diyus.

²⁹ Lumpiyuhun niku kamu sa tanan niyu uring. Pakan-an niku kamu abunda pag ani, ag balaw yi kamu mangagwanta sa lun-us.

³⁰ Paburakun niku kayamu ti manga puun kayu hanggan paabundahun kanyu manga ani, hampay balaw yi kamu pakay-ahun iba manga nasyun dahil sa lun-us.

³¹ Bag-u maalala niyu kanyu daut ugali ag manga buwat, bag-u bugyahan niyu kanyu sadili dahil sa kanyu manga kasalanan ag balaw mayad pag manga buwat.

³² Dapat gustu niku maalaman niyu, Nasakupan Israil, pagbuwatun niku inda balaw dahil sa kanyu. Kailangan mangay-a gid kamu sa kanyu daut ugali. Aku, ti Panginuun Diyus, ti may sabi inda.”

³³ Magkun waya ti Panginuun Diyus, “Sa udas lumpiyuhun niku kamu sa tanan niyu manga kasalanan, pauliun maan niku kamu sa kanyu manga banwa, ag ipatindug uman niyu kanyu manga nagkaradaut pag manga rugar.

³⁴ Ti manga daga unman may pakinabang kaybi, taynguna araduhun yi. Ag ti tanan makakit inda

³⁵ sumabi, ‘Ti unman may pakinabang pag daga kaybi, taynguna nagbaliw parihu sa halamanan Idin. Ti manga nagkaradaut kaybi pag manga banwa, taynguna may manga alad batu yi ag pag-ulianan yi.’

³⁶ Bag-u maalaman manga nagkarasawad manga nasyun sa kanyu palibut aku, ti Panginuun, ti nagpatindug manga nagkaradaut ag nagtanum sa pangawakawaan pag daga. Aku, ti Panginuun, ti magsabi inda, ag buwatun gid niku inda.”

^37-38 Magkun waya gid ti Panginuun Diyus, “Patingihan maan niku ti pagpaawa-awa nasakupan Israil, ag inda kang buwatun sa kanda: Payamuun niku sida parihu kayamu sa manga karanidu pag-isagda sa Hirusalim sa udas pista. Nakan ti nagkaradaut pag manga banwa ulianan yi mayamu manga tawu. Bag-u maalaman nida aku ti Panginuun.”