Isikil 35 - Hanunuu

Ti Tultulanun Laban sa Idum

¹ Magkun ti Panginuun sa kangku,

² “Anak tawu, pagpasrangu kawu sa Bantud Siir, bag-u pagbagaw kawu laban sa kay manga nasakupan.

³ Sabihi sida aku, ti Panginuun Diyus magkun: Kalaban niku kamu, manga taga Bantud Siir. Parusahan niku kamu bag-u bumaliw mapung-aw kanyu rugar.

⁴ Magkaradaut kanyu manga banwa ag bumaliw mapung-aw inda. Bag-u maalaman niyu aku ti Panginuun.

⁵ Dugay yi kamu magkagalit sa taga Israil, ag pinabay-anan lang niyu sida girahun sa udas nida kakurian, sa udas pinarusahan yi sida dahil sa kanda manga kasalanan.

⁶ Nakan aku, ti Panginuun Diyus buhi, magsumpa ipamatay gid niku kamu una naan tabug kamu pag umatag. Hu, lagsun gid kamu manga manugmatay dahil nanmatay diman kamu.

⁷ Buwatun niku mapung-aw ti Bantud Siir, bag-u panmatyun niku ti tanan maglawuy ati.

⁸ Ti manga magkaramatay sa kanyu sa labanan mawayak kanda bangkay sa kanyu manga kabantudan, manga karatagan hanggan luung.

⁹ Buwatun niku mapanglaw kanyu rugar tugka aban. Unman yi may mangulian sa kanyu manga banwa. Bag-u maalaman niyu aku ti Panginuun.

¹⁰ “Magkun kamu ti Huda ag Israil bumaliw kanyu, bag-u apuun niyu inda una aku, ti Panginuun, kaibahan nida.

¹¹ Nakan aku, ti Panginuun Diyus buhi, magsumpa kuntay balusan niku kamu sa kanyu pangagalit, paghirak, ag kaarimputuhan ipinakakit niyu sa nasakupan niku. Bag-u maalaman nida aku ti Panginuun habang pagparusahan niku kamu.

¹² Sa inda pag palakaw, maalaman diman niyu aku, ti Panginuun, magdungug sa tanan niyu binwat kadautan sa manga bantud Israil. Dahil magkun kamu, ‘Daut yi inda ag pinahintulutan kita agawun inda!’

¹³ Nagpadayaw diman kamu ag una wadi unu kanyu pagbagawun laban sa kangku, bag-u nasaydan diman niku inda.

¹⁴ “Nakan aku, ti Panginuun Diyus magkun, makabaya ti buu kalibutan nu buwatun yi niku mapanglaw kanyu rugar,

¹⁵ dahil nagbaya kamu pagka namung-aw ti daga minana nasakupan Israil. Nakan katunda diman ti mangyari sa kanyu; bumaliw mapung-aw ti Bantud Siir hanggan ti buu Idum. Bag-u maalaman niyu aku ti Panginuun.”