Isikil 33 - Hanunuu

Binwat Diyus si Isikil Bantay sa Israil

¹ Magkun ti Panginuun sa kangku,

² “Anak tawu, sabiha inda sa kanmu manga kasimanwa: Nu ipagira niku sa manga kalaban ti usa ka rugar, ti manga nasakupan sa inda pag rugar manpili usa sa manga nasakupan nida bantay sa kanda banwa.

³ Nu makitan manga bantay magras-ug yi ti manga kalaban, patunugun niya ti budyung para pasandaman ti manga tawu.

⁴ Una si unu ti makadnug budyung dapat unman nagpansin inda, bag-u namatay siya pagka ginira sida, siya ti may saragtun sa kay kamatayan.

⁵ Dahil katpung nadnugan niya ti budyung unman siya pinansin. Nakan siya gid ti may saragtun sa kay kamatayan. Dahil nu namatingi lang siya, nairibri mana niya kay sadili.

⁶ Dapat nu nakitan diman bantay magras-ug yi kanda manga kalaban dapat unman niya pinatunug ti budyung hampay pasandaman ti manga tawu, bag-u ginira sida ag may namatay sa kanda, suktun niku ti bantay sa kanda kamatayan una namatay sida dahil diman sa kanda kasalanan.”

⁷ Magkun waya gid ti Panginuun, “Anak tawu, pinili niku kawu bantay sa nasakupan Israil, nakan patingihi inda kang pagsabihun, bag-u paandami ti manga tawu.

⁸ Nu sumabi aku sa daut pag tawu pihu gid siya mamatay dahil sa kay kasalanan bag-u unman nimu siya pinaandaman hampay bugyahan kay daut ugali, kawu kang suktun sa kay kamatayan.

⁹ Dapat nu pinaandaman nimu tunda pag daut tawu hampay bugyahan kay daut ugali, dapat unman siya nagpaniwala sa kanmu sinabi, mamatay siya dahil sa kay kasalanan, dapat kawu diman, ribri kanmu buhi.

¹⁰ “Anak tawu, magriklamu ti nasakupan Israil magkun, ‘Unman nimi maagwanta ti parusa sa kanmi manga kasalanan. Magpanlumuy yi kami, ga mamatay yi kami dahil sa inda pag parusa.’

¹¹ Taynguna sabihi sida, ‘Aku ti Panginuun Diyus buhi, magsumpa kuntay unman aku magbaya nu may mamatay daut pag tawu. Kang gustu pag-aman sida sa kanda daut ugali hampay mabuhi sida. Nakan kamu pag nasakupan Israil, pag-aman yi kamu sa kanyu daut ugali. Gustu aw lugud niyu mamatay?’

¹² “Anak tawu, sabihi kanmu manga kasimanwa nu ti matadlung pag tawu bumuwat kasalanan, ti mayad niya pag manga binwat unman makaribri sa kanya. Bag-u nu ti daut pag tawu bumugya sa kay daut pag ugali, balaw siya parusahan sa kay manga binwat daut.

¹³ Nu sumabi aku sa matadlung pag tawu pihu mabuhi siya, dapat sa uryan nagbuwat siya daut dahil magsarig siya sa kay mayad pag binwat sa kabag-u ti makaribri sa kanya, inda pag tawu mamatay dahil sa kay manga kasalanan. Balaw yi niku alalahanun kay mayad pag manga binwat.

¹⁴ Bag-u nu sumabi aku sa daut pag tawu pihu mamatay siya, dapat sa uryan nagpatlikud siya sa kay daut manga buwat ag nagbuwat sa hustu ag matadlung —

¹⁵ halimbawa, inuli niya ti ipinilinda sa kanya ngatay kay tinakaw, sinunud niya ti manga surundanun magpakaun buhi, bag-u unman siya nagbuwat daut — inda pag tawu pihu mabuhi; balaw siya mamatay.

¹⁶ Una unu pag kasalanan kay binwat unman yi alalahanun laban sa kanya. Dahil nagbuwat siya sa hustu ag matadlung, pihu mabuhi siya.

¹⁷ “Dapat kanmu kasimanwa, Isikil, magriklamu, ‘Balaw tama ti palakaw Panginuun.’ Dapat kanda ngap maaw pag palakaw ti balaw tama.

¹⁸ Nu ti matadlung pag tawu unman yi bumuwat kaayadan ag bumuwat yi siya kadautan, mamatay siya.

¹⁹ Ag nu ti daut pag tawu pumatlikud sa kay daut pag buwat ag bumuwat sa hustu ag matadlung, mabuhi siya.

²⁰ Nasakupan Israil, magsabi kamu, ‘Ti palakaw nimu balaw tama.’ Pihuun niku ti kada usa sa kanyu angay sa kanyu manga buwat.”

Ti Paliwanag tungkul sa Pagpadamhak sa Hirusalim

²¹ Katpung ikalima pag sirang sa ikasampulu pag bulan, katpung ikasampulu may duwa pag timpu nimi pagkabihag, may usa ka tawu nakapalagiw ginan sa Hirusalim nag-atag sa kangku ag magkun, “Nidamhak yi ti banwa Hirusalim!”

²² Katpung sa yabi unman waya nagras-ug tunda pag tawu, sinuldan aku Panginuun ag nakabagaw maan aku. Nakan pagka rinmas-ug tunda pag tawu sa surip, nakabagaw yi aku.

²³ Magkun ti Panginuun sa kangku,

²⁴ “Anak tawu, ti manga mag-uli ati sa daut manga banwa Israil magsabi magkun, ‘Usa lang si Abraham, bag-u ipinakaun sa kanya ti buu daga. Mayamu kita, nakan pihu apuun nita inda pag daga.’

²⁵ Sabihi nimu aku, ti Panginuun Diyus magkun: ‘Kanyu aw isip kamu ti umapu tunda pag daga una magkaun kamu taguban may dugu waya, ag magsamba sa kanyu manga diyus-diyusan, bag-u magpanmatay tawu?

²⁶ Magsarig kamu sa kanyu baladaw, magbuwat kamu manga mayagting pag manga bagay, bag-u magpanguragin, ag tugka taynguna mag-isip waya kamu apuun niyu ti daga?

²⁷ Aku ti Panginuun Diyus buhi, magsumpa kuntay pihu magkaramatay sa girahan tunda pag nasawad buhi sa daut manga banwa. Ti manga nasawad buhi sa manga karatagan kan-un maraisug manga hayup, bag-u ti iba asan sa kanda manga parataguan hanggan sa lukib magkaramatay sa sarut.

²⁸ Buwatun niku mapung-aw ti daga Israil, ag duraun niku ti pag-ipayabang niya pag kabisugan. Una kay manga kabantudan bumaliw mapung-aw hanggan unman yi may lumakaw ati.

²⁹ Nu buwatun yi niku mapung-aw ti daga dahil sa tanan mayagting manga bagay pagbuwatun manga nasakupan inda, maalaman nida aku ti Panginuun.’ ”

³⁰ Magkun ti Panginuun sa kangku, “Anak tawu, kanmu manga kasimanwa magtultul tungkul sa kanmu nu magtiripnan sida sa may alad batu banwa ngatay sa sabian nida balay. Magkun sida sa usa kag sa usa, ‘Abala, patingihan nita si Isikil nu unu kay sabihun ginan sa Panginuun!’

³¹ Nakan magpakarani kang nasakupan sa kanmu ag ga magkaibug gid sida magpatingi sa kanmu, dapat kay tutuu unman nida pagtupadun kanmu pagsabihun. Mayad lang sida magbagaw kuntay pagmahalun nida aku, dapat ti sa sulud nida tagipusuun imaw ti maramuun sa kuwarta.

³² Para sa kanda, parihu lang kawu sa usa ka manugkanta may marinu pag busis, magkanta karantahun tungkul sa pagmahal ag mayad magpatunug manga pamatunug. Magpatingi lang sida sa kanmu tultulanun, dapat unman nida inda pagtupadun.

³³ Dapat nu mangyari yi inda pag parusa sa kanda — maalaman nida kuntay may purupita gid waydi sa kanda karaw-an.”