Isikil 32 - Hanunuu

Ipinahalimbawa ti Hari Ihiptu sa Buaya

¹ Katpung un-an pag sirang ikasampulu may duwa pag bulan, katpung ikasampulu may duwa pag timpu nimi pagkabihag, magkun ti Panginuun sa kangku,

² “Anak tawu, paghirinangbitun kawu sa hari Ihiptu. Sabiha inda sa kanya: Mag-isip kawu parihu kawu sa liyun paatabug-paataytag sa manga nasyun. Dapat kay tutuu, parihu lang kawu sa buaya maglanguy-languy sa kanmu sadili sapa. Pagkalawkawun nimu manga lulud ti danum bag-u magkalubug inda.

³ Taynguna, inda ti pagsabihun Panginuun Diyus sa kanmu: Sarapun niku kawu sa atubang kayamuan tawu bag-u ipaguyud.

⁴ Iyamut niku kawu sa daga bag-u ipakaun sa manga manuk hanggan talun hayup.

⁵ Kanmu manga nayi wayakun niku sa manga kabantudan hanggan sa manga karatagan.

⁶ Diligun niku nimu dugu ti daga tugka sa manga bantud, bag-u pabulusun niku inda sa manga bululusan danum.

⁷ Nu duraun yi niku kawu, takluban niku madamul pag rurum ti langit, nakan unman yi rumayaw ti manga pamgasan hanggan ti init ag bulan.

⁸ Padulumun niku ti tanan magduag sa langit. Nakan dumulum gid sa buu nimu nasyun. Aku, ti Panginuun Diyus, ti magsabi inda.

⁹ “Maarimputu ti manga nasakupan manga nasyun balaw nimu kilala nu ipadamhak yi niku kawu.

¹⁰ Mayamu pag manga nasyun kang padalaun sa mangyari sa kanmu, hanggan kanda manga hari mangirkirug sa kadalaan. Mangirkirug gid ti kada usa sa kanda sa kadalaan nu iwasiwas niku kang baladaw sa kanda sa udas nimu pagkadamhak.

¹¹ Aku, ti Panginuun Diyus, magkun: girahun kawu baladaw hari Babilunya.

¹² Ipamatay niku kanmu manga nasakupan sa gira makapangyarihan pag manga tawu, pinakamaisug sa tanan pag nasyun. Rurisun gid nida ti tanan nasakupan sa Ihiptu hanggan ti manga bagay pag-ipadayaw inda pag nasyun.

¹³ Panmatyun niku ti tanan magharab pag hayup sa Ihiptu, sa may saruy sapa. Nakan unman yi may tawu ngatay hayup ti manlubug sa danum.

¹⁴ Bag-u palindagun niku ti danum sa Ihiptu, bag-u bumulus inda parihu sa pagbulus lana. Aku, ti Panginuun Diyus, ti magsabi inda.

¹⁵ Nu buwatun yi niku mapung-aw ti Ihiptu, bag-u ipadamhak ti tanan asan hanggan kay manga nasakupan, maalaman nida aku ti Panginuun.

¹⁶ “Imaw inda ti hinangbitun manga nasakupan manga nasyun para sa Ihiptu hanggan sa tanan niya manga nasakupan. Aku, ti Panginuun Diyus, ti magsabi inda.”

¹⁷ Katpung ikasampulu may duwa pag timpu, ika-15 pag sirang sa katida diman pag bulan, magkun ti Panginuun sa kangku,

¹⁸ “Anak tawu, manhimanglaw kawu para sa manga nasakupan Ihiptu hanggan sa manga nasakupan iba makamaskihan pag manga nasyun. Dahil ilagpak niku sida sa sirung daga bag-u makaibahan nida ati ti manga nagkaramatay yi.

¹⁹ Sabihi sida, ‘Mas palabi-labihun aw lugud kamu sa iba? Ilagpak diman kamu sa kaabasad-basadan ag makaibahan niyu ati ti manga unman magsarig sa Diyus

²⁰ ti nagkaramatay sa girahan.’ Mamatay ti manga taga Ihiptu dahil alistu yi ti baladaw manga kalaban sa pagmatay sa kanda. Ti Ihiptu hanggan kay nasakupan guyudun atabug sa kadamhakan.

²¹ Tanggapun sida may lubus pag kabayaan manga makapangyarihan pag manga takinan ti taga Ihiptu hanggan niya manga kakampi pag manga nasyun, ati sa rugar manga namatay. Sumabi sida, ‘Dinmugsun diman sida sitay! Kaibahan yi nida taynguna ti manga unman magsarig sa Diyus, ti nagkaramatay sa girahan.’

^22-23 “Ati diman ti nasyun Asirya magkapalibutan lulubngan niya manga sundalu nagkaramatay sa girahan. Kanda manga lulubngan ati sa pinaka-abasad baliwa. Inda pag manga nasakupan pagkadalaan kaybi manga tawu nagkaramatay sa girahan.

²⁴ “Ati diman ti nasyun Ilam. Kay lulubngan magkapalibutan lubung niya manga nasakupan. Nagkaramatay sida tanan sa girahan. Dinmugsun sida ati sa rugar manga namatay kaibahan iba manga unman magsarig sa Diyus. Dapat katpung buhi waya sida pinadala nida ti tanan manga tawu sa kanda, dapat taynguna pinakay-a sida kaibahan manga iba nagkaramatay yi.

²⁵ May parahuwayan ati ti nasyun Ilam, mayamu gid sa kanda ti nagkaramatay sa girahan. Kay lulubngan magkapalibutan lubung niya manga nasakupan. Sida tanan unman magsarig sa Diyus nagkaramatay sa girahan. Dahil katpung buhi waya sida pinadala nida ti tanan manga tawu sa kanda, dapat taynguna pinakay-a sida ag maulian kaibahan sa iba manga namatay sa girahan.

²⁶ “Ati diman ti nasyun Misik hanggan ti nasyun Tubal. Magkapalibutan diman nida lubung ti lulubngan niya manga nasakupan. Sida tanan unman magsarig sa Diyus nagkaramatay sa girahan. Dahil katpung buhi waya sida pinadala nida ti tanan tawu sa kanda.

²⁷ Dapat unman sida pinakan-an lubung parihu sa manga manuggira pag tawu unman magsarig sa Diyus, pagka ilinbung sida kanda baladaw sa kanda uluhan bag-u kanda panangga sa babaw dubdub nida. Pinarusahan sida dahil sa kanda kadautan katpung buhi waya sida pinadala diman nida ti manga tawu.

²⁸ “Bag-u kawu pag nasyun Ihiptu, mamatay diman ag miatag kaibahan sa manga unman magsarig sa Diyus nagkaramatay sa girahan.

²⁹ “Ati diman ti Idum sa rugar manga namatay, ti hari Idum hanggan tanan takinan inda. Makapangyarihan sida ati, dapat taynguna miatag sida sa rugar manga namatay kaibahan sa manga unman magsarig sa Diyus nagkaramatay sa girahan.

³⁰ “Ati diman ti tanan takinan manga rugar sa salatan hanggan ti manga taga Sidun. Dahil katpung buhi waya sida pinadala diman nida ti manga tawu sa kanda. Makamaskihan diman sida ati katpung, dapat taynguna pinakay-a sida bag-u miatag sa rugar manga namatay kaibahan sa manga unman magsarig sa Diyus nagkaramatay sa girahan.

³¹ Nu makitan hari Ihiptu inda pag manga nagkaramatay ati sa rugar manga namatay, makabaya siya hanggan kay manga sundalu dahil balaw lang maaw sida ti namatay sa girahan.

³² Una pinahintulutan niku sida kadalaan manga tawu katpung buhi waya sida mamatay sida bag-u miatag kaibahan sa manga tawu unman magsarig sa kangku, nagkaramatay sa girahan. Aku, ti Panginuun Diyus, ti magsabi inda.”