Isikil 31 - Hanunuu

Ipinahalimbawa ti Ihiptu sa Puun Kayu Sidru

¹ Katpung un-an pag sirang ikatlu pag bulan, ika-11 pag timpu nimi pagkabihag, magkun ti Panginuun sa kangku,

² “Anak tawu, sabiha inda sa hari Ihiptu hanggan sa kay nasakupan: “Sa kantapu nguna niku pag ipahalimbawa kanmu pagkamakamaskihan?

³ Ipahalimbawa maaw niku kawu sa Asirya, ti nasyun parihu sa kayu sidru sa Libanun. Inda pag kayu may marinu ag malangba manga sanga maghamuy sa kakayuhan bag-u abwat inda sa iba pag manga kayu.

⁴ Abunda inda sa danum ginan sa sirung pag bulbugan mag-awat magpadaka sa kanya. (Magbulus diman inda pag danum sa tanan puun kayu sa kapuruan.)

⁵ Nakan inda pag kayu mas abwat sa tanan pag kayu sa kapuruan. Kay manga sanga inmaraba ag linmangba waya gid dahil sa abunda pag danum.

⁶ Ti tanan kalasi manuk sa tungud pinmugad sa kay manga sanga, ti tanan pag kalasi hayup inmanak sa kay sirung manga sanga, bag-u ti tanan bantug pag manga nasyun nanpasirung sa kanya.

⁷ Marinu gid inda pag kayu ag malangba kay manga sanga, dahil kay manga gamut inmaput sa abasad ag abunda pag danum.

⁸ Una ti manga kayu sidru sa halamanan Diyus unman makatupung sa kanya, una ti kayu abitu hanggan manga kayu platanu unman miparihu sa karinuan niya manga sanga. Unman gid may makatupung kayu sa halamanan Diyus sa kay rinu inda pag kayu.

⁹ Pinarinu niku inda pag kayu may malangba manga sanga. Nakan nanhirak sa kanya ti tanan kayu sa halamanan Diyus.”

¹⁰ Nakan taynguna, magkun ti Panginuun Diyus, “Dahil ipinaabwat inda pag kayu kay sadili ag ipinadayaw sa iba malangba manga kayu, bag-u dahil nagpayabang siya,

¹¹ ipahintulut niku siya sa pinakamakamaskihan pag nasyun, imaw ti pumarusa sa kanya angay sa kay kadautan. Hu, dayuun niku siya;

¹² tabasun siya day-uhan, pinakamaisug sa tanan pag nasyun, bag-u pabay-anan. Magkarawayak ti manga naplud niya manga sanga sa manga bantud, manga ratag, hanggan sa luung. Tayakan siya manga kayu tunda magpasirung sa kanya.

¹³ Ti tanan kalasi manuk umapun sa kay naplid puun, bag-u manpahari ti manga talun hayup sa kay sirung manga sanga mawayakan.

¹⁴ Nakan kailangan unman yi may kayu umabwat waya hanggan lumangbaw sa iba maraybung manga kayu, una abunda waya inda sa danum. Dahil ti tanan kayu mamatay parihu sa tawu, bag-u miatag sa kaabasad-basadan daga.”

¹⁵ Parargu di gid ti pagbagaw Panginuun Diyus, “Rumas-ug ti sirang daran-un inda pag kayu sa rugar manga namatay, tabunan niku ti manga abasad pag manga bulbugan bilang tanda karukuan. Unman yi bumulus ti danum sa manga sapa hanggan unman yi may abunda pag danum. Dahil siyun, dumulum ti Libanun bag-u magkaralayung ti tanan kayu sa karatagan.

¹⁶ Mangirkirug sa kadalaan ti manga nasyun nu masaydan nida ti pagkadamhak tunda pag kayu sa udas darahun niku inda sa rugar manga namatay kaibahan manga namatay yi. Bag-u ti tanan kayu sa Idin hanggan ti tanan mayad ag marinu pag kayu Libanun napadanuman mayad makabaya ati sa sirung daga.

¹⁷ Ti manga nasyun magpasirung hanggan magkampi sa kanya miatag diman sa kanya sa manga rugar namatay kaibahan ati sa manga nagkaramatay sa gira.

¹⁸ “Hari Ihiptu, unman gid may kayu sa Idin ti makatupung sa kanmu karinuan hanggan kapangyarihan. Dapat ilagpak diman kawu sa sirung daga kaibahan manga kayu Idin. Ati magkaraibahan kamu sa manga tawu unman magsarig sa Diyus, manga nagkaramatay yi sa girahan. “Imaw inda ti mangyari sa hari Ihiptu hanggan sa kay nasakupan. Aku, ti Panginuun Diyus, ti magsabi inda.”