Isikil 30 - Hanunuu

Ti Pagparusa sa Ihiptu

¹ Magkun ti Panginuun sa kangku,

² “Anak tawu, tultulan nimu kang pagsabihun sa manga taga Ihiptu. Sabihun nimu aku, ti Panginuun Diyus, magkun: Paglumi kamu kabisug dahil sa kanyu pararas-ugun pag kadamhakan.

³ Dahil arani yi rumas-ug tunda pag sirang, ti sirang pagpihu Panginuun. Magal-um ag madulum tunda pag sirang para sa manga nasyun.

⁴ Girahun ti Ihiptu ag makurian ti Itiyupya. Mayamu ti mamatay sa Ihiptu ag pamul-un kanda manga kayamanan, bag-u dautun kanda manga patakinan.

⁵ Sa tunda pag labanan, magkaramatay ti kayamuan taga Itiyupya, Put, Lidya, Arabya, Libya, hanggan kang banwa Israilita magpangulian sa Ihiptu.

⁶ Aku, ti Panginuun Diyus magkun, midamhak gid ti manga kakampi Ihiptu ag madura kay pag-ipadayaw pag kapangyarihan. Magkaramatay kay manga nasakupan ginan sa Migdul tugka sa Aswan.

⁷ Bumaliw mapung-aw ti Ihiptu sa tanan pag nasyun hanggan kay manga banwa bumaliw pinakadaut sa tanan banwa.

⁸ Nu sunugun yi niku ti Ihiptu ag magkaramatay ti tanan magkampi sa kanya, maalaman niya manga nasakupan aku ti Panginuun.

⁹ “Sa tunda pag udas, manpadara aku manga manugtultul masakyan sa manga barku hampay padalaun ti manga taga Itiyupya balaw may paghintayun. Madala gid sida sa udas ipadamhak ti Ihiptu, dahil pihu gid rumas-ug tunda pag udas.”

¹⁰ Sinabi waya gid Panginuun Diyus, “Gamitun niku si Hari Nibukadnisar Babilunya hampay matyun ti kayamuan nasakupan Ihiptu.

¹¹ Siya hanggan kay manga sundalu, ti pinakamaisug sa tanan pag nasyun, ipadara niku sa Ihiptu hampay ipadamhak inda. Girahun nida inda, bag-u mawayak ti manga bangkay sa buu daga.

¹² Pamarahun niku ti Sapa Nilu, bag-u ipasakup niku ti Ihiptu sa daut pag manga tawu. Wasakun niku ti buu nasyun Ihiptu hanggan ti tanan asan sa panab-anan day-uhan. Aku, ti Panginuun, ti magbagaw inda.”

¹³ Magkun waya gid ti Panginuun Diyus, “Wasakun diman niku ti manga diyus-diyusan sa Mimpis. Unman yi may mamunu sa Ihiptu ag padalaun niku ti tanan nasakupan inda.

¹⁴ Buwatun niku mapung-aw ti Patrus sa kanaway, sunugun niku ti Suwan sa salatan, bag-u parusahan niku ti Tibis.

¹⁵ Ipasamit niku kang pangagalit sa Pilusiyum, ti marig-un pag darangpan Ihiptu, bag-u panmatyun niku ti kayamuan nasakupan Tibis.

¹⁶ Sunugun niku ti Ihiptu! Man-arunghung sa sakit ti Pilusiyum. Midamhak ti Tibis, ag pirmi madala ti Mimpis.

¹⁷ Magkaramatay sa labanan ti manga kalay-awan lalaki taga Hilyupulis hanggan Bubastis, bag-u bihagun ti masawad pag manga tawu sa inda pag manga banwa.

¹⁸ Nu ipadamhak yi niku ti kapangyarihan Ihiptu, bumaliw madulum inda pag sirang para sa Tapanis. Madura yi ti pag-ipadayaw pag kapangyarihan Ihiptu. Matabunan siya rurum hanggan ti manga nasakupan niya manga banwa bihagun.

¹⁹ Imaw inda kang parusa sa Ihiptu, bag-u maalaman niya manga nasakupan aku ti Panginuun.”

²⁰ Katpung ikapitu pag sirang un-an bulan, katpung ika-11 pag timpu nimi pagkabihag, magkun ti Panginuun sa kangku,

²¹ “Anak tawu, binari niku ti takyay hari Ihiptu. Bag-u unman gid inda may namugkus hampay umayad ag bumaskug hampay humiyaput maan baladaw.

²² Nakan sabiha nimu sa kanya aku, ti Panginuun Diyus magkun, kalaban niku siya. Bariun waya niku kay mayad pag baliw takyay hanggan kay daan bari hampay mabul-iwan niya kay baladaw.

²³ Ikalat niku ti manga taga Ihiptu sa tuhay-tuhay pag manga nasyun.

²⁴ Pabaskugun niku ti manga takyay hari Babilunya bag-u ipahiyaput niku sa kanya kang baladaw. Dapat bariun niku ti manga takyay hari Ihiptu, bag-u man-arunghung gid siya sa kay biyag ag ga mamatay yi sa atubangan hari Babilunya.

²⁵ Pabaskugun gid niku ti manga takyay hari Babilunya, dapat ti manga takyay hari Ihiptu bumaliw unman yi may kusug. Nu ipahiyaput yi niku ti baladaw sa hari Babilunya bag-u gamitun niya inda laban sa Ihiptu, maalaman manga taga Ihiptu aku ti Panginuun.

²⁶ Ikalat niku ti manga taga Ihiptu sa tuhay-tuhay pag manga nasyun, bag-u maalaman nida aku ti Panginuun.”