Isikil 3 - Hanunuu

¹ Magkun waya gid ti busis sa kangku, “Anak tawu, kan-a inda pag linuhut kasuratan, bag-u paglakaw kawu ag pagtultul sa nasakupan Israil.”

² Nakan nan-nganga aku, ag ipinakaun niya sa kangku ti maluhutan pag kasuratan.

³ Magkun siya sa kangku, “Ta, kan-a tunda tugka sa mabsug kawu.” Pagka kinaun yi niku, parihu inda ga daykut kay katagsing.

⁴ Sinabi niya rargu sa kangku, “Anak tawu, lakaw yi atag sa nasakupan Israil ag tultulan kang tultulanun para sa kanda.

⁵ Balaw niku kawu pag-ipadara sa nasakupan tuhay kay pamagaw ag makuri intindihun, nu unman sa nasakupan Israil.

⁶ Nu ipadara niku kawu sa nasakupan tuhay kanda pamagaw ag makuri intindihun, pihu mamatingi sida sa kanmu.

⁷ Dapat ti nasakupan Israil unman mamatingi sa kanmu, dahil balaw sida magkaibug magpatingi sa kangku. Tanan sida manga maganit kay ulu ag lapastangan.

⁸ Dapat buwatun niku kawu mas maganit ag mas dinglan kaysa kanda,

⁹ parihu kaganit sa tanang batu. Nakan danga gid kawu magkadala sa kanda una manga maglaban sida pag nasakupan.”

¹⁰ Magkun waya gid siya sa kangku, “Anak tawu, patingihi kaayad ag ingati sa kanmu tagipusuun ti tanan pagsabihun niku sa kanmu.

¹¹ Taynguna, pag-atag kawu sa kanmu manga kasimanwa ti kaibahan nimu sa pagkabihag, ag tultulan sa kanda, ‘Inda ti tultulanun ginan sa Panginuun Diyus!’ Buwata inda una mamatingi man sida ngatay unman.”

¹² Bag-u kinabyaw aku Ispiritu, ag may nadnugan aku busis magkurarug sa kang dayu magbagaw magkun, “Dayawun ti kadayawan Panginuun sa langit!”

¹³ Ag nadnugan diman niku ti tunug manga pakpak buhi pag manga linalang, hanggan ti ingay manga gulung sa kay tupad ga magkurarug.

¹⁴ Kinabyaw aku Ispiritu ag dinara tag sa arayu. Galit aku ag magtuhay kang naisipan, dapat pinigilan aku Panginuun.

¹⁵ Nakaras-ug aku sa Til Abib, sa saruy Sapa Kibar nu naan mag-uli ti manga bihag. Nadugay aku ati sa kanda sa sulud pitu ka sirang. Unman aku makaagwanta sa ati pag manga bagay kang nakitan.

Binwat Diyus si Isikil Bantay sa Israil

¹⁶ Pagkalawuy pitu ka sirang, magkun ti Panginuun sa kangku,

¹⁷ “Anak tawu, binwat niku kawu bantay sa nasakupan Israil. Nakan nu unu man pag paandam ti madnugan nimu sa kangku sabihun nimu sa kanda.

¹⁸ Nu sumabi aku ti usa ka daut pag tawu mamatay, ag unman nimu siya pinaandaman kuntay pagsisi sa kay daut pag buruwatun hampay maribri siya, mamatay ati pag daut tawu dahil sa kay kasalanan, dapat suktun niku kawu sa kay pagkamatay.

¹⁹ Dapat nu pinaandaman nimu siya ag unman siya magsisi sa kay daut pag buruwatun, mamatay siya dahil sa kay kasalanan, dapat unman kawu may saragtun sa kangku ag ribri kanmu buhi.

²⁰ Nu ti matadlung pag tawu pumatlikud sa matadlung pag buhi ag nagpakadaut, pabay-anan niku siya mamatay. Nu unman nimu siya pinaandaman, mamatay siya dahil sa kay kasalanan, ag balaw niku alalahanun ti mayad pag manga binwat niya. Dapat sagtun nimu kay pagkamatay.

²¹ Dapat nu pinaandaman nimu siya kuntay danga yi magbuwat daut ag namatingi siya, bag-u inmapas yi kay magbuwat daut, balaw siya mamatay ag kawu hanggan, ribri diman kanmu buhi.”

²² Sinuldan aku kamaskihan Panginuun ag magkun siya sa kangku, “Pag-atag kawu sa ratag, dahil ati may itultul aku sa kanmu.”

²³ Nakan nag-atag ngani aku sa ratag, ag nakitan niku ti kadayawan Panginuun parihu sa nakitan niku sa saruy Sapa Kibar, ag nanluhud aku.

²⁴ Bag-u sinuldan aku Banal Ispiritu, ipinatindug ag sinabihan, “Pag-uli kawu ag pagtalakup sa kanmu balay!

²⁵ Kawu, anak tawu, gapusun lubid hampay balaw kawu makakuyug sa kanmu manga kasimanwa.

²⁶ Ipahuput niku kanmu dila sa kanmu ngarus hampay unman kawu makapaandam sa inda pag maglaban nasakupan.

²⁷ Dapat sa udas manpakihampang aku sa kanmu, makabagaw yi kawu. Ag tultulan nimu sa kanda ti tultulanun ginan sa kangku, ti Panginuun Diyus. Ti iba sa kanda mamatingi, dapat ti iba unman, dahil manga maglaban sida pag nasakupan.”