Isikil 29 - Hanunuu

Ti Tultulanun Laban sa Ihiptu

¹ Katpung ikasampulu may duwa pag sirang sa ikasampulu pag bulan, katpung ikasampulu pag timpu nimi pagkabihag, sinabi sa kangku Panginuun magkun,

² “Anak tawu, pagpasrangu kawu sa Ihiptu, bag-u pagbagaw kawu laban sa hari Ihiptu hanggan sa buu niya nasakupan.

³ Sabihi siya aku, ti Panginuun Diyus, magkun: Kalaban niku kawu, hari Ihiptu. Parihu kawu sa daka pag buaya malanguyan sa sapa. Magsabi kawu, ‘Ti Sapa Nilu, aku ti nagbuwat inda para sa kang sadili.’

⁴ Dapat kaw-itun niku taga kanmu sag-ang, bag-u guyudun niku kawu ginan sa danum hanggan ti manga isda nakapakput sa kanmu manga siksik.

⁵ Iyamut niku kawu sa pangawakawaan hanggan ti manga isda, bag-u mihamyang kawu sa daga unman may manbuul sa kanmu ag manlubung. Ipatinduk niku kawu sa talun hayup hanggan sa manga manuk maglayang sa tungud.

⁶ Bag-u maalaman tanan mag-uli sa Ihiptu aku ti Panginuun. Dahil parihu lang kawu sa usa ka matpuk pag anyamu sinarigan nasakupan Israil.

⁷ Igu nanhiyaput sida sa kanmu nabka kawu, ag nabiyagan kanda manga takyay. Pagka napasalandig sida sa kanmu nabari kawu, nakan naplid sida ag nabari kanda barakang.

⁸ Nakan aku, ti Panginuun Diyus, magkun ipagira niku kawu sa manga tawu manmatay sa kanmu nasakupan hanggan sa kanda manga hayup.

⁹ Bumaliw mapung-aw pag rugar ti Ihiptu. Bag-u maalaman niyu aku ti Panginuun. “Dahil magkun kawu, ‘Ti Sapa Nilu, aku ti nagbuwat inda,’

¹⁰ kalaban niku kawu bag-u bumaliw mapung-aw yi inda ginan sa Migdul atabug sa Aswan, tugka sa katugkaan Itiyupya.

¹¹ Unman may tawu ngatay hayup ti lumakaw sitay, unman diman may mangulian sa sulud upatpulu ka timpu.

¹² Buwatun niku ti Ihiptu pinakamapung-aw sa tanan pag nasyun. Sa sulud 40 ka timpu, kay manga banwa bumaliw pinakamaruku sa tanan pag banwa. Bag-u ikalat niku ti manga taga Ihiptu sa tuhay-tuhay pag manga nasyun.”

¹³ Dapat sinabi diman Panginuun Diyus, “Pagkalawuy 40 ka timpu, tipunun niku ti manga taga Ihiptu ginan sa manga nasyun nu naan sida pag nagkarawatak.

¹⁴ Ibalik niku sida sa Patrus sa abagatnan Ihiptu, sa daga nida inighitan. Dapat bumaliw yi malumuy sida pag kaharian —

¹⁵ pinakamalumuy sa tanan pag kaharian. Ag udyi gid sida pumatupung uman sa iba pag manga nasyun. Buwatun niku sida malumuy gid pag kaharian hampay unman yi sida makasakup uman sa iba manga nasyun.

¹⁶ Unman yi gid mauman sumarig sa kanya ti nasakupan Israil sa Ihiptu. Ti nangyari sa Ihiptu manpaala-ala sa Israil sa kanda kasalanan sa paghagad awat sa Ihiptu. Bag-u maalaman manga Israilita aku, ti Panginuun Diyus.”

¹⁷ Bag-u katpung un-an pag sirang un-an bulan, katpung ika-27 nimi pagkabihag, magkun ti Panginuun sa kangku,

¹⁸ “Anak tawu, ti manga sundalu ni Hari Nibukadnisar Babilunya nanlaban sa manga sundalu Tiru tugka sa nagkarakalbu sida ag nagkalalupgas kanda manga labay. Dapat unman gid may naagaw si Nibukadnisar hanggan kay manga sundalu sa manga taga Tiru.

¹⁹ Nakan aku, ti Panginuun Diyus, magkun ipakaun niku sa kanya ti Ihiptu sa kan Nibukadnisar, ti hari Babilunya. Agawun niya ti tanan kayamanan Ihiptu bilang bayad sa kay manga sundalu.

²⁰ Ipakaun niku sa kanya ti Ihiptu bilang pirimyu niku sa kay pagsirbi, dahil binwat niya tunda hanggan niya manga sundalu para sa kangku. Aku, ti Panginuun Diyus, ti magsabi inda.

²¹ “Isikil, sa udas mangyari yi inda, pabaskugun maan niku ti Israil, bag-u maalaman manga Israilita tutuu kanmu manga sinabi. Bag-u maalaman nida aku ti Panginuun.”