Isikil 28 - Hanunuu

Ti Tultulanun Laban sa Hari Tiru

¹ Magkun ti Panginuun sa kangku,

² “Anak tawu, sabihi ti takinan Tiru aku, ti Panginuun Diyus, magkun: Sa kanmu pagkamarapadayaw pagkun kawu, ‘Usa ka diyus aku, matukawan sa tukawan hari sa karaw-an kadagatan.’ Dapat kay tutuu, una mag-isip kawu madunung parihu sa usa ka diyus, balaw kawu diyus nu unman tawu lang.

³ Mag-isip kawu mas madunung waya kawu kaysa kan Danyil, balaw may lihim unman nimu magkaalaman.

⁴ Sa panab-anan nimu kadunungan hanggan pan-unawa nagyaman kawu ag nakatipun gintu hanggan pilak sa kanmu burutangan kayamanan.

⁵ Sa panab-anan diman nimu kakayahan sa pagnigusyu, nadugangan waya gid kanmu kayamanan, ag dahil sa kanmu kayamanan nagpadayaw-dayaw kawu.

⁶ Nakan aku, ti Panginuun Diyus, magkun dahil mag-isip kawu madunung parihu sa usa ka diyus,

⁷ ipagira niku kawu sa taga iba rugar maraisug sa tanan nasyun. Wasakun nida kanmu marinu pag manga kagamitan kanmu naapu sa panab-anan nimu kadunungan. Ag madura kanmu kadayawan.

⁸ Balaw gid mayad kanmu patabgan pag kamatayan; iyamut nida kawu sa kaabasad-basadan dagat.

⁹ Malu, makasabi aw waya nimu, ‘Usa ka diyus aku,’ sa atubangan manga manmatay sa kanmu? Para sa kanda tawu lang kawu ag balaw usa ka diyus.

¹⁰ Mamatay kawu sa kamang manga day-uhan parihu sa kamatayan usa ka tawu unman magpaniwala sa kangku, Mangyari gid inda, dahil aku, ti Panginuun Diyus, ti magsabi inda.”

¹¹ Magkun waya ti Panginuun sa kangku,

¹² “Anak tawu, paghirinangbitun kawu laban sa hari Tiru. Sabihi siya aku, ti Panginuun Diyus, magkun: Kaybi usa kawu ka mustara kaayadan. Madunung kawu ag marinu gid.

¹³ Ati katpung ati kawu sa Idin, sa halamanan Diyus. Pinarinuan kawu tuhay-tuhay pag kalasi mahalaga pag batu: rubi, tupas, ismiralda, kirisulitu, uniks, haspir, sapiru, turkis hanggan biril. Pinarinuan diman kawu gintu iinalistu yi para sa kanmu sirang kapanganakan.

¹⁴ Pinili niku kawu bilang kirubin manugbantay sa kang banal pag bantud. Maglakaw kawu sa karaw-an magsinglaw manga batu.

¹⁵ Unman may ikasabi sa kanmu ugali ginan sa kanmu pagkalusad tugka sa uryan nagbuwat kawu daut.

¹⁶ Kanmu mayamu manga nigusyu imaw ti dahilan nimu pagkamaisug hanggan pagbuwat daut. Nakan pinalayas niku kawu ginan sa banal pag bantud niku; pinalayas niku kawu sa magsinglaw pag manga batu.

¹⁷ Nagpadayaw-dayaw kawu dahil sa kanmu karinuan, bag-u ginamit nimu sa kadautan kanmu kadunungan hampay maibantug kawu. Inda kay dahilan nu hayga iyinmut niku kawu sa daga, bag-u nagbaliw barantayan kawu iba manga hari.

¹⁸ Dahil sa kayamuun nimu kasalanan hanggan pandaraya sa pagnigusyu, inuringan nimu ti manga rugar nimu pagsambahan. Nakan sa atubangan manga magbantay sa kanmu, sinunug niku kanmu rugar hanggan kawu nairub tugka sa nagbaliw dapug sa daga.

¹⁹ Ti tanan magkilala sa kanmu pag nasyun nadiklahan sa kanmu nadangtan. Madala kanmu pinatabgan ag nadura yi kawu lubusan.”

Ti Tultulanun Laban sa Sidun

²⁰ Magkun ti Panginuun sa kangku,

²¹ “Anak tawu, pagpasrangu kawu sa Sidun bag-u sabiha nimu inda laban sa kanya.

²² Sabihi siya aku, ti Panginuun Diyus, magkun: Kalaban niku kawu, Sidun. Dayawun aku manga tawu nu parusahan yi niku kawu, bag-u maalaman nida aku ti Panginuun. Sa panab-anan inda, maipakakit niku sa kanda kang kabanalan.

²³ Padaran-an niku kawu sarut ag dahil siyun bumulus ti dugu sa kanmu sangput manga baklayan dalan. Palibutan kawu girahun, bag-u mayamu gid ti mamatay sa kanmu manga nasakupan. Bag-u maalaman nida aku ti Panginuun.

²⁴ “Bag-u madura yi ti manga kamalay-nasyun Israil magpuya sa kanda, magpanakit sa kanda ga matarum manga dugi. Bag-u maalaman nida aku ti Panginuun Diyus.”

²⁵ Magkun waya gid ti Panginuun Diyus, “Tipunun yi niku ti nasakupan Israil ginan sa manga nasyun nu naan pag nawayak sida. Sa panab-anan niku buwatun sa kanda, maipakakit niku kang kabanalan sa manga nasyun. Mangulian ti manga Israilita sa kanda sadili daga, ti daga ipinakaun niku sa kang suruguun si Hakub.

²⁶ Mangulian sida ati unman may pagkadalaan. Mamatindug sida manga balay ag mananum manga ubas. Unman yi may man-gulu sa kanda nu parusahan yi niku ti tanan nida kaarani pag manga nasyun magpuya sa kanda. Bag-u maalaman nida aku ti Panginuun nida Diyus.”