Isikil 27 - Hanunuu

Ti Hirinangbitun tungkul sa Tiru

¹ Magkun ti Panginuun sa kangku,

² “Anak tawu, manhinangbitun kawu tungkul sa Tiru,

³ ti banwa punduhan manga barku hanggan sinturu nigusyu manga mag-uli arani sa dagat. Sabiha nimu aku, ti Panginuun Diyus, magkun, ‘Tiru, magpadayaw kawu marinu ag unman gid may hintay.

⁴ Pinadaka nimu kanmu naakupahan sa kadagatan. Pinarinu gid kawu manga nagpatindug sa kanmu.

⁵ Parihu kawu sa daka pag barku binwat ginan sa kayu abitu ginan sa Sinir. Kanmu tuladuk binwat ginan sa kayu sidru ginan sa Libanun.

⁶ Kanmu bugsay binwat ginan sa kayu insina sa Basan. Bag-u kanmu salug binwat ginan sa kayu sipris ginan sa puru Kitim, bag-u pinahaklupan inda pamarinu ginan sa bangkil ilipanti.

⁷ Kanmu layag binurdahan linu ginan sa Ihiptu, ga bandira inda nu bantayun. Kanmu turda kulay bughaw ag kulay dungun ginan sa baybay Ilisa.

⁸ Kanmu manga tagabugsay taga Sidun ag taga Arbad, bag-u kanmu antigu pag manga tiripulanti ginan sa kanmu sadili tawuhan.

⁹ Manga antigu pag manga panday ginan sa Gibal ti maghiwat kanmu manga daut barku. Mag-atag sa kanmu ti iba ka manga tiripulanti sarakyan bag-u manugnigusyu.

¹⁰ Kanmu manga sundalu taga Pirsiya, Lidya ag Put. Pag-isab-it nida kanda manga panangga hanggan kalu sa kanmu lingub, bag-u nakapakaun inda kadayawan sa kanmu.

¹¹ Manga taga Arbad ag taga Hilik ti magbantay sa kanmu manga sangput alad batu, bag-u ti manga taga Gammad ti magbantay sa kanmu bantayaw. Pag-isab-it nida kanda manga panangga sangput sa kanmu habig lingub, bag-u nakapakaun inda kang-ud pag kadayawan sa kanmu.

¹² “ ‘Nakipagnigusyu sa kanmu ti Tarsis dahil mayamu kanmu kayamanan. Kanda ibinayad sa kanmu manga pilak, baul, lata hanggan timga.

¹³ Nakipagnigusyu diman sa kanmu ti Grisya, Tubal hanggan Misik. Kanda ibinayad sa kanmu manga panawuhun hanggan manga galang pag kagamitan.

¹⁴ Ti ibinayad waydi manga taga Bit Tugarma sa kanmu; manga kabayu pantarabahu, manga kabayu pan-gira hanggan manga mula.

¹⁵ “ ‘Nakipagnigusyu diman sa kanmu ti manga taga Didan, bag-u mayamu kanmu manga suki sa manga rugar arani sa dagat. Kanda ibinayad sa kanmu manga bangkil ilipanti hanggan maganit ag mabiru pag manga kayu.

¹⁶ “ ‘Nakipagnigusyu diman sa kanmu ti Aram dahil sa mayamu nimu pag manga kalakal. Kanda ibinayad sa kanmu manga ismiralda, pisahan ga dukut dungun ubi, manga binurdahan pisahan, manipis pag linu, kural hanggan manga batu rubi.

¹⁷ “ ‘Nakipagnigusyu diman sa kanmu ti Huda hanggan Israil. Kanda manga ibinayad sa kanmu manga tirigu ginan sa Minnit, igus, daykut, lana hanggan bulung panhaplas.

¹⁸ “ ‘Nakipagnigusyu diman sa kanmu ti Damasku dahil sa kanmu mayamu pag manga kayamanan hanggan manga kalakal. Kanda ibinayad sa kanmu ti manga intus ginan sa Hilbun bag-u dilana ginan sa Sahar.

¹⁹ Ti taga Dan hanggan taga Haban ginan sa Usal nakipagnigusyu diman sa kanmu. Kanda ibinayad sa kanmu manga baul hanggan manga kagamitan.

²⁰ “ ‘Ti ibinayad manga taga Didan sa kanmu manga pisahan pansapin sa turukawan sa babaw dayu manga hayup.

²¹ “ ‘Nakipagnigusyu diman sa kanmu ti manga taga Arabya hanggan ti tanan takinan sa Kidar. Kanda ibinayad sa kanmu manga karanidu bag-u manga kambing.

²² “ ‘Magnigusyu diman sa kanmu ti manga manugnigusyu Shiba hanggan Raama. Kanda ibinayad sa kanmu ti tanan pinakamarinu pag pamanglu, manga mahalaga pag manga batu hanggan gintu.

²³ “ ‘Magpangalakal diman sa kanmu ti manga taga Haran, Kani, Idin hanggan ti manga manugnigusyu sa Shiba, Asur ag Kilmad.

²⁴ Kanda ibinayad sa kanmu manga mahalaga pag manga rutay, manga malatuy pag pisahan, manga binurdahan pag pisahan hanggan manga pansapin sa salug marinu kay pagkatahi tuhay-tuhay kay kulay.

²⁵ “ ‘Ti manga barku Tarsis imaw ti manga manugkarga kanmu kalakal. Parihu kawu sa barku punu manga pangarga habang mayatawan sa kalawud-lawudan dagat.

²⁶ Dapat daran-un kawu nimu manga manugbugsay sa karaw-an dagat bag-u wasakun kawu mabaskug pag bagyu ginan sa butlakan.

²⁷ Ti manga kayamanan hanggan kalakal nimu, manga tiripulanti, taga bugsay hanggan manga manugpanday, una ti manga manugnigusyu ag ti tanan sundalu, tanan sida milunud sa karaw-an dagat sa udas wasakun kawu.

²⁸ “ ‘Mangirkirug sa kadalaan ti manga mag-uli arani sa dagat nu masaydan nida ti riringgitan manga tiripulanti magkalunud.

²⁹ Tayakan manga manugbugsay, manga tiripulanti hanggan manga takinan barku kanda manga sarakyan bag-u manindug sida sa baybay dagat,

³⁰ bag-u manlumi sida mabaskug dahil sa nangyari sa kanmu. Paulian nida galbuk kanda manga ulu bag-u pahuway sa dapug.

³¹ Kalbuhun nida kanda manga ulu bag-u manrutay saku habang maglumi sida mabaskug sa subra pag karukuan.

³² Sa kanda pagpanruku magkun sida: “Tiru, unman may nalunud sa kalalawdan parihu sa nangyari sa kanmu.

³³ Nanakayan kawu dara kanmu manga kalakal bag-u nakaawat inda sa manga pangangailangan kayamuan nasyun. Nagyaman ti manga hari sa kalibutan dahil sa kanmu kayamanan hanggan manga kalakal.

³⁴ Dapat taynguna wasak yi kawu, nagkaralunud sa kalalawdan kanmu manga kalakal, hanggan ti tanan nimu manga tiripulanti.

³⁵ Ti tanan mag-uli arani sa dagat nadulaw gid sa kanmu sinapit. Kanda manga hari nadala ag mag-akitan gid inda sa kanda manga uyahun.

³⁶ Magsagutsut ti manga manugnigusyu manga nasyun sa nadangtan nimu. Madala ti pinatabgan nimu, ag lubusan yi kawu madura tugka aban.” ’ ”