Isikil 26 - Hanunuu

Ti Tultulanun Laban sa Tiru

¹ Katpung un-an sirang pag bulan, katpung ika-11 pag timpu nimi pagkabihag, magkun ti Panginuun sa kangku,

² “Anak tawu, magbaya ti manga taga Tiru sa pagkadamhak Hirusalim. Magkun sida, ‘Nidamhak yi ti pinakaun-an pag dalan manga manugnigusyu manga nasyun. Bag-u taynguna kita maan ti abunda. Dahil nidamhak yi ti Hirusalim, kita maan ti abunda.’

³ Nakan aku, ti Panginuun Diyus, magkun labanan niku ti Tiru. Ipagira niku inda sa mayamu pag manga nasyun ga manga humbak maghuganas.

⁴ Dautun nida kay manga alad batu ag rup-agun kay manga bantayaw. Kayigun niku kay daga tugka sa batu wadi ti masawad.

⁵ Bumaliw parainitan wadi inda manga sarap manga manug-isda. Mangyari gid inda, dahil aku, ti Panginuun Diyus, ti magbagaw inda. Ipahintulut niku ti Tiru sa iba ka manga nasyun bag-u aghasun nida kay manga kasiyunan,

⁶ hanggan kay manga mag-ulian sa banwa panmatyun baladaw. Bag-u maalaman nida aku ti Panginuun.”

⁷ Magkun waya ti Panginuun Diyus, “Manga taga Tiru, ipagira niku sa kanyu si Hari Nibukadnisar taga Babilunya, hari manga hari. Man-gira siya ginan sa amihanan kaibahan kay mayamu pag sundalu, manga kalisa, manga kabayu, ag manga manugkabayu.

⁸ Ipamatay niya kanyu manga nasakupan sa kadak-anan banwa sa baladaw. Man-gira kay manga sundalu may manga dara panwayak alad batu, manga panangga, ag manga agdan sa alad batu.

⁹ Ipawayak niya kanyu manga alad batu sa daraka pag manga batang, bag-u iparup-ag kanyu manga bantayaw sa manga masu.

¹⁰ Matap-ukan kamu galbuk ginan sa manga lulud niya manga kabayu dahil sa masyadu mayamu pag kabayu kay gamitun. Magkarahalu kanyu manga alad batu dahil sa daguldul manga kabayu ag manga kalisa magpaslud sa kanyu manga daut puwirtahan banwa.

¹¹ Tatatataan niya manga kabayu ti tanan niyu manga karsada. Ipamatay niya kanyu manga nasakupan sa baladaw, bag-u kanyu manga matibay pag manga tulduk magkaragpu.

¹² Agawun nida kanyu manga kayamanan hanggan kanyu manga pamabili. Pandautun nida kanyu manga alad batu hanggan kanyu marinu pag balay, bag-u iyamut nida sa dagat ti manga batu, manga kayu hanggan ti tanan nasawad sa nagkararup-ag.

¹³ Paapasun niku kanyu manga magkarantahan hanggan pagpatunug manga alpa.

¹⁴ Buwatun yi lang niku inda pag rugar malapad pag batu parainitan manga sarap. Unman yi gid ipatindug utru kanyu banwa. Mangyari gid inda, dahil aku, ti Panginuun Diyus, ti magbagaw inda.”

¹⁵ Magkun waya gid ti Panginuun Diyus sa manga taga Tiru, “Ti manga mag-uli arani sa dagat mangirkirug sa kadalaan nu masaydan nida kanyu pagkadamhak ag pagkamatay, hanggan ti pag-arunghung manga nabiyagan.

¹⁶ Ti manga takinan manga rugar arani sa dagat dumugsun sa kanda tukawan hari bag-u man uba kanda panrutayun hari hanggan kanda pansulud pag rutay marinu. Ag manukawan sida sa daga, pagtakigan sa kadalaan dahil sa kanyu nadangtan.

¹⁷ Bag-u sabihun nida inda pag hirinangbitun para sa kanyu: ‘Kabitay kanmu pagkadamhak, kawu pag bantug banwa pag-ulian manga tawu, kanda karabuhian asan sa dagat. Makamaskihan gid kawu sa kadagatan ag magkadala sa kanmu ti tanan mag-uli sa arani dagat.

¹⁸ Bag-u taynguna, pagtakigan sa kadalaan ti manga mag-uli sa arani dagat dahil sa kanmu pagkadamhak.’ ”

¹⁹ Magkun waya gid ti Panginuun Diyus, “Tiru, bumaliw mapanglaw kawu pag banwa, unman yi may mag-uli. Palapawan niku kawu abasad pag danum.

²⁰ Italnud niku kawu sa kaabasad-basadan kaibahan manga tawu sa un-an pag panahun. Pumirmaminti kawu daut sa sirung daga kaibahan manga tawu niatag sa kaabasad-basadan. Udyi kawu makabalik sa rugar manga buhi.

²¹ Duraun yi niku kawu, ag madala kanmu patabgan. Malyam yi kawu; una hanapun, unman yi gid kawu makitan. Aku, ti Panginuun Diyus, ti magsabi inda.”