Isikil 25 - Hanunuu

Ti Tultulanun Laban sa Amun

¹ Magkun ti Panginuun sa kangku,

² “Anak tawu, pagpasrangu kawu sa Amun bag-u pagbagaw laban sa inda pag rugar.

³ Sabihi kay manga mag-ulian siyun pagpatingi sa kangku dahil aku, ti Panginuun Diyus, magkun, ‘Dahil nagbaya kamu pagka dinaut kang Balay hanggan sa pagkawayak Israil, bag-u sa pagkabihag nasakupan Huda,

⁴ ipasakup niku kamu sa manga tawu sa butlakan, bag-u nasakupan nida kamu. Mankampu sida sa kanyu bag-u kan-un nida kanyu manga burak kayu ag inmun kanyu gatas ginan sa kanyu hayup.

⁵ Buwatun niku paraharaban manga kamilyu ti banwa Raba, bag-u ti buu Amun buwatun niku pasturan manga karanidu. Bag-u maalaman niyu aku ti Panginuun.’

⁶ “Aku, ti Panginuun Diyus, magkun, ‘Dahil namalakpak kamu ag linmuksu-luksu sa kabayaan sa pagpuya sa Israil,

⁷ parusahan gid niku kamu. Ipabahala niku kamu sa iba manga nasyun mangaghas sa kanyu manga kasiyunan. Rurisun gid niku kamu tugka sa unman yi may masawad sa kanyu bumaliw usa ka nasyun. Bag-u maalaman niyu aku ti Panginuun.’ ”

Ti Tultulanun Laban sa Muab

⁸ Magkun ti Panginuun Diyus, “Ti Muab, pag-ingarnan diman Siir, magkumun ti Huda parihu lang diman sa iba ka nasyun.

⁹ Nakan ipagira niku ti manga banwa sa katugkaan Muab, kaibahan yi ti manga magpanguna nida pag manga banwa parihu sa Bit Hisimut, Baal Miyun, hanggan Kiryataim — ti manga banwa nida pag-ipadayaw.

¹⁰ Ipasakup diman niku sida sa manga tawu sa butlakan, ag apuun sida, parihu sa manga taga Amun. Nu kabitay ti manga taga Amun balaw yi masabi usa ka nasyun, katunda diman ti Muab.

¹¹ Parusahan gid niku ti Muab, bag-u maalaman nida aku ti Panginuun.”

Ti Tultulanun Laban sa Idum

¹² Magkun ti Panginuun Diyus, “Nagbalus ti Idum sa Huda, ag dahil siyun nagkasala ti Idum.

¹³ Nakan aku, ti Panginuun Diyus, magkun parusahan niku ti Idum ag panmatyun kay nasakupan hanggan manga hayup. Buwatun niku inda mapanglaw ginan sa Timan tugka sa Didan, bag-u magkaramatay ti manga mag-ulian sa gira.

¹⁴ Manbalus aku sa Idum sa panab-anan niku nasakupan manga Israilita. Parusahan nida ti manga taga Idum angay sa kang masyadu pag pangagalit, bag-u maalaman manga taga Idum nu kabitay aku magbalus. Aku, ti Panginuun Diyus, ti magbagaw inda.”

Ti Tultulanun Laban sa Pilistiya

¹⁵ Magkun ti Panginuun Diyus, “Naggayak ti Pilistiyu sa pagpadamhak sa Huda dahil magkaibug sida bumalus ag dugay yi kanda durumtan.

¹⁶ Nakan aku, ti Panginuun Diyus, magkun parusahan niku ti manga Pilistiyu. Panmatyun niku ti manga Kirita ag ti iba waya pag manga mag-ulian sa arani dagat.

¹⁷ Sa kang pangagalit balusan gid niku sida ag parusahan. Bag-u nu mabalusan yi niku sida, maalaman nida aku ti Panginuun.”