Isikil 24 - Hanunuu

Ti Pahalimbawa sa Kardiru Pagkalawangun

¹ Pagka ikasampulu pag sirang sa ikasampu pag bulan, katpung ikasiyam pag timpu nimi pagkabihag, magkun ti Panginuun sa kangku,

² “Anak tawu, suratan ti pitsa taynguna pag sirang dahil kainda yi pag sirang umumpisa ti paggira hari Babilunya sa Hirusalim.

³ Bag-u tultulan inda pag pahalimbawa sa manga maglaban pag nasakupan Israil, bag-u paalami sida aku, ti Panginuun Diyus, ti magsabi inda: “Pagpauli kawu danum sa kardiru bag-u sapyaan.

⁴ Paulii inda mayad pag bahagi taguban — manga alip-ip ag manga balangbang. Lakayan diman kay manga but-ul.

⁵ Ti pinakamayad lang pag taguban karanidu ti kanmu gamitun. Pakuluhi kaayad ti taguban hanggan ti manga but-ul.

⁶ Dahil aku, ti Panginuun Diyus, magkun: Kaawaawa ti banwa Hirusalim, ti manga mag-ulian siyun manga manmamatay. Parihu inda sa kardiru pagkalawangun ag unman paglinisan. Nakan bul-a tig usa-usa kay sukad inda, danga magpili.

⁷ Dahil kay pagmatay alam tanan. Ti dugu manga minatay niya pinabay-anan lang sa manga batu makitan tanan. Unman gid niya inda tinabunan daga.

⁸ Nakitan niku inda pag dugu ag pinabay-anan niku inda makitan tanan. Tunda pag manga dugu ga magringgit sa kangku ibalus niku sida.

⁹ “Nakan aku, ti Panginuun Diyus, magkun: ‘Kaawaawa ti banwa Hirusalim kay manga mag-ulian siyun manmamatay! Aku mismu ti mantumpuk kayu pamagba hampay irubun sida.

¹⁰ Sigi, dugangi waya gid niyu ti pamagba ag tutdi. Sapyaan ti taguban tugka sa mak-atan ti manga but-ul.

¹¹ Bag-u padnaan sa baga ti kardiru unman may sukad tugka sa bumaga diman. Sa panab-anan inda, malinisan ti kardiru ag masunug ti manga kalawang.

¹² Dapat una waya unhun nimu, ti kalawang unman gid mab-ul apuy.’

¹³ “Hirusalim, kanmu binwat kahalayan ti nagpauring sa kanmu. Sinikap niku linisun kawu, dapat dayu kawu magpalinis. Nakan pumirmaminti kawu mauring tugka sa unman madura kang pangagalit sa kanmu.

¹⁴ Aku, ti Panginuun, magkun rinmas-ug yi ti kaudasan pagparusa niku ag unman may makaampara sa kangku. Balaw gid niku kamu kaawaan ag balaw yi mabag-u kang isip. Pihuun niku kamu angay sa kanyu pangabuhi ag binwat. Aku, ti Panginuun Diyus, ti magbagaw inda.”

Ti Pagkamatay kan Isikil Asawa

¹⁵ Magkun ti Panginuun sa kangku,

¹⁶ “Anak tawu, sa usa ka pidpiraw bul-un niku ti pagmahalun gid nimu pag babayi. Dapat danga nimu siya paglumii ngatay pagrukui.

¹⁷ Mahimu lang kawu umarup aba dapat danga pagpakakitan magkaruku kawu. Danga paglukasa kanmu taung hanggan lapak. Danga pagtabuni kanmu uyahun. Danga diman kawu magkaun karan-unun pagkan-un manga magpanruku sa namatay.”

¹⁸ Nakan pagka surip sinabi niku inda sa manga tawu, bag-u pagka yabi namatay kang asawa. Ag pagka sa sunud pag surip sinunud niku ti isinugu sa kangku.

¹⁹ Bag-u nagpaingana ti manga tawu sa kangku, “Unu lugud kanmu ibug sabihun sa kanmu pagbuwatun tunda?”

^20-21 Nagsagut aku sa kanda, “Magkun ti Panginuun Diyus sa kangku tultulan niku inda sa nasakupan Israil: Alistu yi aku hampay uringan kang Balay Diyus kanyu darangpan, kanyu pag-ipadayaw, kanyu pagmahalun ag pagbayaun. Mamatay sa girahan kanyu manga anak natayak sa Hirusalim.

²² Ag buwatun niyu ti binwat ni Isikil. Danga niyu pagtabuni kanyu uyahun, bag-u danga kamu magkaun karan-unun pagkan-un manga magpanruku sa namatay.

²³ Danga diman niyu paglukasa kanyu taung hanggan manga lapak. Danga kamu maglumi ngatay magpanruku. Manlumuy kamu dahil sa manga kasalanan niyu ag mandarangpan sa usa kag sa usa.

²⁴ Si Isikil bumaliw halimbawa sa kanyu. Nu unu kay pagbuwatun, buwatun diman niyu. Nu mangyari yi inda pag parusa maalaman niyu aku ti Panginuun Diyus.”

²⁵ Magkun waya ti Panginuun sa kangku, “Anak tawu, sa udas dautun niku ti Balay Diyus kanda darangpan, kanda pag-ipadayaw, pagmahalun ag pagbayaun, bag-u panmatyun yi niku kanda manga anak,

²⁶ may usa ka tawu makapalagiw ginan sa Hirusalim manultul inda sa kanmu.

²⁷ Sa tunda pag udas, makabagaw yi maan kawu ag makaharampangan kamu duwa. Bumaliw paandam kawu sa manga tawu, bag-u maalaman nida aku ti Panginuun.”