Isikil 23 - Hanunuu

Ti Duwa ka Magtar-ari Babayi Daut

¹ Magkun ti Panginuun sa kangku,

² “Anak tawu, ati katpung may duwa ka magtar-ari babayi.

³ Katpung kalay-awan waya sida, magpabili sida kanda bilug sa Ihiptu. Pagpabay-anan lang nida ti manga lalaki manpasawa-sawa sa kanda manga bilug.

⁴ Kay ngaran panganay si Uhula, ag kay arian si Uhuliba. Inasawa niku sida duwa ag may manga anak kami. Si Uhula ti Samarya, ag si Uhuliba ti Hirusalim.

⁵ “Una kang yi asawa si Uhula, magparargu di gid siya sa pagpabili kay bilug, ag maglagas gid siya sa kay manga katagbu manga taga Asirya arani sa kanya.

⁶ Manga marinu sida ag kalay-awan pag manga lalaki. Manga kapitan sida ag manga kumandir sundalu, pari-parihu kay rutay ga malatuy, ag manga manugkabayu waya.

⁷ Nangulid si Uhula sa tanan manugpamahala Asirya, ag inuringan niya kay sadili sa pagsamba sa kanda manga diyus-diyusan.

⁸ Unman gid siya inmapas sa pagpabili sa kay bilug ginan kaybi ati waya siya sa Ihiptu. Katpung kalay-awan waya siya nag-ulid yi siya, bag-u ti manga lalaki nagpasawa-sawa sa kay bilug.

⁹ “Nakan ipinakaun niku siya sa kamang niya manga katagbu taga Asirya paglagsun gid niya.

¹⁰ Inubahan nida siya, minatay baladaw, ag binihag kay manga anak. Ti nangyari pagparusa sa kanya nagbaliw lilibakan manga kababayihan.

¹¹ “Una waya nakitan ni Uhuliba ti nangyari sa kay patar-ari, nagparargu di gid siya sa pagpabili sa kay bilug, ag nagbaliw mas daut waya siya pag babayi kaysa kay patar-ari.

¹² Naglagas diman siya sa manga taga Asirya pag manga marinu ag kalay-awan pag manga lalaki. Inda sida manga kapitan ag manga kumandir sundalu may marinu pag rutay pansundalu, ag manga manugkabayu waya.

¹³ Nakitan niku parihu siya sa kay patar-ari; inuringan diman niya kay sadili.

^14-15 “Nag-amat di gid kay pagpabili ni Uhuliba sa kay bilug. Naibug diman siya sa manugkalisa pag manga takinan sa Babilunya katpung nakitan niya kanda larawan sa manga lingub. Inda pag manga takinan pari-parihu kay rutay maragang, may manga hagkus sa awak, ag may manga taung.

¹⁶ Dahil magkaibug siya sa kanda, nagpasugu siya sa Babilunya hampay ban-awan inda pag manga takinan atabug sa kanya.

¹⁷ Nakan nag-atag sida sa kanya ag nag-ulid sa kanya. Sa kanda pag-ulid sa kanya, inuringan nida siya. Dapat pagka sa uryan nasawaan siya ag tinayakan niya sida ag dinayu yi.

¹⁸ “Kinadat-an ag pinatlikudan niku si Uhuliba ag dinayu yi niku, parihu sa kang binwat sa kay patar-ari dahil magparargu siya sa pagpabili sa kay bilug.

¹⁹ Dapat una katida, parargu di gid siya nagpabili kay bilug parihu sa kay binwat ati sa Ihiptu katpung kalay-awan waya siya.

²⁰ Maglagas gid siya sa kay manga katagbu kanda kinatawu parihu kay ka daka sa magkaapu manga asnu ag kanda parihu kay kayamu magkaapu manga kabayu.

²¹ Nakan Uhuliba, nagbalik kawu sa kanmu mahalay pag buruwatun kanmu binwat kaybi sa Ihiptu katpung kalay-awan waya kawu. Ati nagpasawa-sawa ti manga lalaki sa kanmu bilug.

²² “Nakan aku, ti Panginuun Diyus, magbagaw sa kanmu, Uhuliba, ipagira niku kawu una naan katpung baliwa sa kanmu manga katagbu kanmu tinayakan ag dinayu yi pagka magkasawaan yi kawu sa kanda.

²³ Sida ti manga taga Babilunya ag ti manga Kaldiyu ginan sa Pikud, Suwa, Kuwa, ag ti manga taga Asirya. Inda sida manga marinu ag kalay-awan pag manga lalaki. Manga kapitan sida, manga kumandir, manga manugkalisa pag manga manugpamahala, ag iba waya abwat kay katungkulan. Manga manugkabayu waya sida tanan.

²⁴ Man-gira sida sa kanmu ginan sa salatan kaibahan ti mayamu pag manga sundalu, manga kabayu, ag manga kalisa. May manga panangga sida ag manga kalu, ag palibutan kawu nida. Ipakaun niku kawu sa kanda hampay parusahan, ag parusahan kawu nida parusa angay sa kanda pamantay sa kanmu.

²⁵ Sa kang masyadu pag pangagalit sa kanmu, paparusahan niku kawu sa kanda. Ag sa kanda pangagalit puldun nida kanmu irung ag manga tuli. Bihagun nida kanmu manga anak, ag ti masawad panmatyun nida baladaw ngatay sunugun.

²⁶ Ubahan diman nida kawu ag bul-un kanmu manga pamarinu.

²⁷ Umapas yi kanmu mahalay pag buruwatun ti pagpabili kanmu bilug, kanmu inumpisahan sa Ihiptu. Balaw yi nimu alalahanun inda, ag kalimtan yi nimu ti Ihiptu.

²⁸ Dahil aku, ti Panginuun Diyus, magbagaw ipahintulut niku kawu sa kamang manga tawu kanmu pagdayuun; ati pag manga tinayakan nimu ag dinayu yi pagka nasawaan yi kawu sa kanda.

²⁹ Parusahan kawu nida sa kanda kahigpitan, ag bul-un nida ti tanan nimu manga pinanbudlayan. Tayakan kawu nida uba, ag makitan manga tawu ti makakaray-a pag kahamtangan nimu dahil sa kanmu mahalay pag buruwatun ti pagpabili sa kanmu bilug.

³⁰ Imaw inda ti nagdara sa kanmu sa kadamhakan, dahil nag-ulid kawu sa manga taga iba pag manga nasyun ag inuringan nimu kanmu sadili sa pagsamba sa kanda manga diyus-diyusan.

³¹ Sinunud nimu ti binwat nimu patar-ari babayi, nakan parusahan diman niku kawu parihu sa kang pagparusa sa kanya.

³² “Hu, aku, ti Panginuun Diyus, magbagaw parusahan niku kawu parihu sa kang pagparusa sa kanmu patar-ari babayi. Kang parusa parihu sa irinmun sa ungut daka ag abasad. Bag-u nu mainum yi nimu inda pag ungut punu kang pangagalit, puyaan bag-u surugun kawu.

³³ Malangu kawu bag-u manrukuan, dahil ti ungut inda punu kadamhakan. Inda ti ungut pag-agwanta ininum nimu patar-ari Samarya.

³⁴ Siputun gid nimu inda inum, ag buk-un nimu ti ungut, bag-u taptapun nimu kanmu dubdub sa karukuan. Mangyari gid inda, dahil aku, ti Panginuun Diyus, ti magbagaw inda.

³⁵ Ag dahil kinalimtan nimu aku ag pinatlikudan, aku, ti Panginuun Diyus, magbagaw mangagwanta gid kawu dahil sa kanmu mahalay pag buruwatun ti pagpabili sa kanmu bilug.”

³⁶ Magkun maan ti Panginuun sa kangku, “Anak tawu, pihuun si Uhula bag-u si Uhuliba. Paalaman sa kanda ti mayagting nida pag manga binwat.

³⁷ Dahil nanguragin sida ag nanpanmatay. Nanguragin sida sa pagsamba sa manga diyus-diyusan, ag kanda manga anak, ipinablag nida sa kangku katpung iinanak sida, ihinandug nida sa manga diyus-diyusan bilang karan-unun inda.

^38-39 Purya sitay, inuringan waya nida kang Balay Diyus ag ti manga Sirang Pamahari kang pag-ipatupad sa kanda. Pagka sirang ihinandug nida kanda manga anak sa kanda diyus-diyusan, nagsulud sida sa kang Balay, ag sa Sirang Pamahari waya tunda. Sa katida pag inuringan nida kang Balay.

⁴⁰ Nagpasulang waya ngani sida sa manga lalaki ginan sa arayu pag manga rugar. Pagka rinmas-ug ti manga lalaki, narigus sida ag nanparinu, bag-u nansulung manga pamarinu.

⁴¹ Tinmukaw sida sa marinu pag tukawan, sa sarangwan lamisa. May ipinauli sida ati sa lamisa kamangyan hanggan lana ihandug mana sa kangku.

⁴² Masaydan sa kanda sulud-sulud ti iringayan manga langu ag masalimpayaan pag manga tawu, inmighit sa pangawakawaan. Pinasulungan sida inda manga tawu unu sa kamang ag pinaulian marinu pag kuruna.

⁴³ Bag-u magkun aku sa kang sadili, ‘Pagustu sida sa inda pag manga babayi nanggurangun lang sa pagpabili sa kanda bilug.’

⁴⁴ Tunda ngani kanda binwat. Nag-ulid sida sa kan Uhula ag sa kan Uhuliba, ti duwa ka mahalay pag manga babayi magpabili sa kanda bilug.

⁴⁵ Dapat inda pag manga babayi parusahan matadlung pag manga tawu parusa angay sa kanda buwat pagpanguragin ag pagpanmatay.

⁴⁶ “Aku, ti Panginuun Diyus, mansugu sa manga tawu man-gira sa kanda. Inda pag manga tawu manpadala sa kanda, man-agaw sa kanda manga kasiyunan,

⁴⁷ manbintuk sa kanda, ag manmatay sa kanda sa baladaw. Panmatyun diman kanda manga anak ag sunugun kanda manga balay.

⁴⁸ Sa panab-anan inda maampara niku ti mahalay pag buruwatun sa inda pag nasyun. Ag inda bumaliw paandam diman sa iba unman gid magsunud sa kanda binwat.

⁴⁹ Ag kamu pag duwa ka magtar-ari, mangagwanta gid kamu dahil sa kanyu mahalay pag buruwatun ag pagsamba sa manga diyus-diyusan. Bag-u maalaman niyu aku ti Panginuun Diyus.”