Isikil 22 - Hanunuu

Ti manga Kasalanan Hirusalim

¹ Magkun ti Panginuun sa kangku,

² “Anak tawu, alistu yi aw kawu sa pagpihu sa Hirusalim? Alistu yi aw kawu kainda sa pagpihu sa inda pag banwa manga manmamatay? Paalami siya sa tanan niya mayagting pag binwat,

³ ag sabihi siya aku, ti Panginuun Diyus, magbagaw: Daka banwa manga manmamatay, rumas-ug sa kanmu ti kadamhakan. Pagdagtaan nimu kanmu sadili sa pagbuwat manga diyus-diyusan.

⁴ May saragtun kawu dahil sa kanmu pagpanmatay ag dahil sa pagdagta nimu sa kanmu sadili sa pagbuwat manga diyus-diyusan. Nagras-ug yi kanmu katapusan. Nakan kasarin-an kawu ag puyaan manga nasyun.

⁵ Daka banwa bantug sa kadautan ag masyadu pag kaguluhan, puyaan gid kawu manga nasyun ginan sa arayu man ngatay sa arani.

⁶ Malu bantayi ti kada takinan Israil mag-ulian sa kanmu, paggamitun nida kanda kapangyarihan sa pagpanmatay.

⁷ Sitay sa kanmu unman yi paggalangun ti manga gurang. Ti manga day-uhan mag-uli sa kanmu pagkuwartahan, ag ti manga ulila ag manga balu pag babayi balaw pag-itaratu mayad.

⁸ Unman nimu paggalangun kang banal pag manga bagay ag unman nimu pag-igalang ti manga Sirang Pamahari kang pag-ipatupad.

⁹ May manga tawu asan sa kanmu magpamudil hampay ipamatay ti iba. May imaw diman magkaun manga handug sa manga diyus-diyusan sa manga simbahan sa manga bantud hanggan mahalay pag buwat.

¹⁰ May imaw diman asan mag-ulid sa asawa nida ama ngatay magpan-gahus sa babayi magkadugu.

¹¹ May imaw diman mag-ulid sa asawa iba, ngatay sa kay umagad babayi, ngatay sa kay patar-ari babayi, anak sa kay ama.

¹² Ti iba magtanggap suhul hampay manmatay tawu, ti iba magpatubu labis-labis, hanggan magyaman dahil sa maramuun sa kuwarta. Nalimtan yi gid nida aku. Aku, ti Panginuun Diyus, ti magbagaw inda.

¹³ “Manga taga Hirusalim, ipalakpak niku kang kamang sa pangagalit dahil sa kanyu maramuun sa kuwarta ag pagpanmatay.

¹⁴ Unu, pumarargu aw nguna kanyu isug ag bisug kamang sa udas parusahan niku kamu? Aku, ti Panginuun, ti magbagaw parusahan gid niku kamu, ag buwatun gid niku inda.

¹⁵ Wayakun niku kamu sa tuhay-tuhay pag manga nasyun, ag ipatigil niku kanyu manga pagbuwatun magpauring sa kanyu.

¹⁶ Pakay-ahun kamu iba manga nasyun, bag-u maalaman niyu aku ti Panginuun.”

¹⁷ Magkun maan ti Panginuun sa kangku,

¹⁸ “Anak tawu, ti nasakupan Israil nagbaliw unman may pulus para sa kangku. Parihu sida sa galang, lata, baul, ngatay timga nasawad sa hurnuhan matapus matunaw ti pilak.

¹⁹ Nakan aku, ti Panginuun Diyus, magbagaw: Dahil nagbaliw unman kamu may pulus, tipunun niku kamu sa Hirusalim,

^20-21 parihu sa tawu magtipun pilak, galang, baul, timga ngatay lata hampay tunawun sa maglabdaban hurnuhan. Hu, tipunun niku kamu sa Hirusalim sa kang masyadu pag pangagalit, ag ati parusahan niku kamu ga sa manga baul pagtunawun.

²² Nu kabitay ti pilak pagtunawun sa hurnuhan, parihu diman ga inda kang buwatun sa Hirusalim, bag-u maalaman niyu aku, ti Panginuun, ipaagum niku sa kanyu kang pangagalit.”

²³ Magkun maan ti Panginuun sa kangku,

²⁴ “Anak tawu, sabihi ti manga Israilita dahil unman sida magpasnu linisun niku sida unman gid niku sida kaawaan sa sirang ipakakit niku sa kanda kang pangagalit.

²⁵ Kanda manga takinan maggayak daut. Parihu sida sa mag-ngurub liyun magduksul sa kay bulay. Magpanmatay sida manga tawu, magbuul kayamanan hanggan mahalaga pag manga bagay, bag-u mayamu pag manga babayi ti nabalu dahil sa kanda pagpanmatay.

²⁶ Kanda manga manughandug unman magtupad sa kang kasuguan, ag inuringan nida kang banal manga bagay. Para sa kanda, parihu lang ti banal ag ti balaw banal, ti malinis ag ti mauring, hanggan unman nida pagsundun kang manga pag-ipatupad sa manga Sirang Pamahari. Nakan unman nida aku paggalangun.

²⁷ Kanda manga takinan parihu sa manga talun idu magduksul sa kanda manga bulay. Magpanmatay sida hampay lang maramuun sa kuwarta.

²⁸ Kanda manga purupita magtabun waya kanda manga kasalanan sa balaw tutuu pag manga pangakakitun ag manga panhula. Magkun sida, ‘Imaw kunu tunda ti sinabi Panginuun Diyus,’ una unman magsabi ti Panginuun.

²⁹ Ti manga tawu maramuun sa kuwarta ag magtakaw. Pag-apihun nida ti manga pugri ag ti manga balaw Israilita mag-uli kaibahan nida. Unman nida sida pagpakan-an katadlungan.

³⁰ “Nanhanap aku usa ka tawu mamauli alad batu banwa ag makaapin sa banwa hanggan makatindug sa tab-anan niku ag sa manga tawu hampay balaw niku dautun inda pag banwa, dapat unman aku may nakitan.

³¹ Nakan ipaagum niku sa kanda kang masyadu pag pangagalit. Ipadamhak niku sida dahil sa kanda manga binwat. Aku, ti Panginuun Diyus, ti magbagaw inda.”