Isikil 21 - Hanunuu

Ti Babilunya Gamitun Diyus Bilang Baladaw sa Pagparusa sa Israil

¹ Magkun ti Panginuun sa kangku,

² “Anak tawu, pagpasrangu kawu sa Hirusalim ag pagbagaw laban sa Israil ag sa manga simbahan inda.

³ Sabihi sida aku, ti Panginuun Diyus, magkun: Kalaban niku kamu! Ayitun niku kang baladaw ag panmatyun niku kamu tanan, mayad man ngatay daut.

⁴ Hu, panmatyun niku kamu tanan niku baladaw ginan sa kanaway tugka sa salatan.

⁵ Bag-u maalaman tanan aku ti Panginuun. Ginabut niku kang baladaw, ag unman niku inda isuul sa kay kaluban tugka sa unman matapus ti pagpanmatay inda.

⁶ “Nakan anak tawu, pag-arunghung kawu sa masyadu pag karukuan ag kabuyatan sa tagipusuun. Pag-arunghung kawu sa kanda atubangan.

⁷ Nu mamaingana sida nu hayga kawu mag-arunghung, sabihi sida dahil sa barita makapalumuy nalub-anan, makapadala sa tanan tawu, makarilipung sa isip, ag makapatakig tuud sa kanda. Mangyari gid inda pag manga bagay udyi dumugay. Aku, ti Panginuun Diyus, ti magbagaw inda.”

⁸ Magkun waya gid ti Panginuun sa kangku,

^9-10 “Anak tawu, tultulan kang pagsabihun sa manga tawu. Sabihi sida aku, ti Panginuun Diyus, magkun: Inasa niku kang baladaw para mumatay sa kanyu. Pinakinis gid niku inda hampay kumislap parihu sa kilat. Malu makabaya aw waya kamu? Puyaan aw waya nguna niyu kang manga pagtamyaw sa kanyu?

¹¹ Inasa niku kang baladaw ag pinakinis, ag alistu yi inda gamitun sa pagpanmatay.

¹² “Anak tawu, paglumi kawu mabisug ag taptapa kanmu dubdub sa karukuan dahil inda pag baladaw manmatay sa kang nasakupan manga Israilita ag sa kanda manga takinan.

¹³ Inda usa ka pagsubuk sa kang nasakupan. Danga sida mag-isip unman niku iparargu kang pagtamyaw sa kanda pagpuya. Aku, ti Panginuun Diyus, ti magbagaw inda.

¹⁴ Nakan anak tawu, tultulan kang pagsabihun. Suntukan kanmu kamang sa pangagalit, ag pagbuul kawu baladaw ag tigbasan inda duwa ngatay tulu ka bisis bilang pagpakakit mayamu ti magkaramatay sa kanda sa girahan.

¹⁵ Takigan sida sa kadalaan ag mayamu ti midamhak sa kanda. Ipinauli yi niku ti baladaw sa manga sabian nida banwa hampay mumatay sa kanda. Magsiak inda parihu sa kilat ag alistu sa pagpanmatay.

¹⁶ Baladaw, pagtigbas kawu wala sikun. Pagtigbas kawu una naan tag pagpumalisud.

¹⁷ Isuntuk diman niku kang kamang sa pangagalit, hampay madura kang pangagalit. Aku, ti Panginuun, ti magbagaw inda.”

¹⁸ Magkun ti Panginuun sa kangku,

¹⁹ “Anak tawu, pagbuwat kawu mapa ag tandai inda pag duwa ka dalan lalawyan hari Babilunya may dara baladaw. Inda pag duwa ka dalan umpisa sa Babilunya. Pagpauli kawu karatula sa pagsalakan duwa ka dalan hampay maalaman nu naan tabug inda pag duwa ka dalan.

²⁰ Ti usa ka dalan atabug sa Raba, ti kapital Amun, ag kay usa atabug sa Hirusalim, ti kapital Huda may alad batu.

²¹ Dahil ti hari Babilunya tumindug sa pagsangahan dalan, alamun niya nu naan siya pag lumakaw pag dalan sa panab-anan lunggungan sa ugyung, sa pagpaingana sa manga diyus-diyusan, ag sa pag-usisa mayad sa ihinandug pag atay hayup.

²² Ti mabunut niya pag ugyung imaw ti may marka Hirusalim. Bag-u manringgit siya sa pagsalakay sa Hirusalim ag panmatayun ti manga mag-uli siyun. Mamauli siya daraka pag manga batang panrup-ag sa sabian Hirusalim. Mamuwat siya daraykan ag mantumpuk daga sa habig alad batu banwa hampay madayik inda.

²³ Unman makapaniwala ti manga taga Hirusalim mangyari inda sa kanda dahil may kasunduan sida sa Babilunya. Dapat ipaalaala hari Babilunya kanda manga kasalanan, bag-u susun bihagun niya sida.

²⁴ “Nakan aku, ti Panginuun Diyus, magbagaw sa kanda: Kanyu manga kasalanan nibunyag, ag pag-ipakakit gid niyu nu kabitay kanyu paglaban ag pagbuwat daut. Dahil sa pagbuwatun niyu inda, ipabihag niku kamu.

²⁵ “Kawu pag daut ag makasalanan pag takinan Israil, rinmas-ug yi ti udas parusahan kawu!

²⁶ Aku, ti Panginuun Diyus, magkun: Ubaha kanmu sangbaw ag kuruna, dahil tumuhay yi ti tanan. Ti manga pugri bumaliw may kapangyarihan, ag ti manga may kapangyarihan bumaliw makuri.

²⁷ Ipadamhak gid niku ti Hirusalim! Balaw inda ipatindug uman tugka sa rumas-ug kang pinili manughusay sa inda pag banwa; dahil siya kang kinatiwalaan inda.

²⁸ “Kawu pag anak tawu, sabihi ti manga Amunita magpuya sa Israil aku, ti Panginuun Diyus, magbagaw sa kanda: Handa yi ti baladaw sa pagpanmatay. Pinakinis gid inda hampay kumislap parihu sa kilat.

²⁹ Balaw tutuu ti manga ipinakakit ag manga hula kanyu nasaydan tungkul sa baladaw. Kay tutuu, alistu yi ti baladaw sa pagpulud liug manga daut pag tawu. Ti udas pagparusa sa kanda nagras-ug yi.

³⁰ Taynguna, ibalik dapu niku ti baladaw sa kay kaluban. Pihuun niku kamu sa kanyu sadili pag nasyun, sa rugar nu naan kamu iinanak.

³¹ Ipasamit niku sa kanyu kang masyadu pag pangagalit, ag ipahintulut niku kamu sa maraisug pag manga tawu, anad sa pagpanmatay.

³² Bumaliw pamagba kamu, ag kanyu dugu mabuhus sa kanyu daga. Unman may makaalala sa kanyu. Mangyari gid inda, dahil aku, ti Panginuun, ti magbagaw inda.”