Isikil 2 - Hanunuu

Ti Pagtawag sa kan Isikil

¹ Magkun ti busis sa kangku, “Anak tawu, pagtindug kawu dahil may sabihun aku sa kanmu.”

² Pagka nagbagaw siya sa kangku sinuldan aku Ispiritu ag ipinatindug. Namatingi aku sa magbagaw sa kangku.

³ Magkun siya, “Anak tawu, ipadara niku kawu sa nasakupan Israil, sa nasyun maglaban sa kangku. Kanda manga ginurang naglaban sa kangku kaybi, ag tugka kainda maglaban waya sida sa kangku.

⁴ Manga maganit kanda ulu ag manga lapastangan. Pag-ipadara niku kawu tag sa kanda hampay sabihun sa kanda ti tultulanun ginan sa kangku, ti Panginuun Diyus.

⁵ Mamatingi ag sa unman inda pag manga maglaban, maalaman nida may purupita maaw asan sa kanda.

⁶ Ag kawu, anak tawu, danga kawu magkadala sa kanda. Danga kawu magkadala una waya kanda manga pagbagawun masakit ga dugi ngatay kagat alutatip. Danga gid kawu magkadala sa kanda hanggan sa kanda manga pagsabihun, una manga maglaban sida pag nasakupan.

⁷ Tultulan gid nimu kang tultulanun sa kanda, mamatingi man ngatay unman inda pag manga maglaban.

⁸ “Dapat kawu, anak tawu, patingihi kang pagsabihun sa kanmu. Danga kawu maglaban sa kangku parihu sa kanda. Pagnganga kawu ag kan-a kang pag-ipakaun sa kanmu.”

⁹ Bag-u nakitan niku ti usa ka kamang magpatugut sa kangku usa ka linuhut pag kasuratan.

¹⁰ Linadlad niya inda sa kang atubangan, may surat inda manga bagaw may karukuan ag manga hirinangbitun sa sarangwan hanggan sa dayu.