Isikil 19 - Hanunuu

Ti Hirinambitun tungkul sa manga Takinan Israil

¹ Magkun ti Panginuun sa kangku, “Kantaha inda pag hirinambitun tungkul sa manga takinan Israil:

² “Kanmu ina parihu sa usa ka liyun pag-alagaan kay manga anak kaibahan sa iba manga liyun.

³ Inalagaan niya kay usa niya ka anak ag nagbaliw mabaskug pag liyun. Madunung inda magtukub, ag magkaun tawu.

⁴ Pagka naalaman inda iba manga nasyun dinakup nida siya sa kali padaya ag dinara sa Ihiptu may higut taga.

^5-6 “Pagka naalaman ina liyun nibuyu kay gustu para sa kay anak, pinadaka maan niya kay usa ka anak ag nagbaliw mabaskug diman inda pag liyun. Nagkuyug inda sa iba manga liyun, madunung inda magtukub ag magkaun tawu.

⁷ Pinandaut niya ti matibay pag manga rugar manga kalaban ag ipinadamhak kanda manga banwa. Magkadala ti manga mag-ulian siyun nu mag-adnugan nida kay mag-ngurub.

⁸ “Nagkarausa ti manga nasyun agud labanan siya bag-u pinalibutan nida siya. Linapad nida kanda lambat ag dinakup nida siya.

⁹ Hinigtan nida siya taga ag ginuyud pasulud sa hawla, ag dinara sa hari Babilunya. Ipinirisu nida siya, nakan balaw yi madnugan kay mag-ngurub sa kabantudan Israil.

¹⁰ “Kanmu ina parihu diman sa tanum ubas itinanum sa saruy danum. Mayamu inda sanga ag burak dahil abunda ti danum.

¹¹ Matibay kay manga sanga inda ag ga mahimu buwatun bastun hari. Nag-abwat gid ti ubas, higit waya kaysa maraybung pag manga halaman. Mag-akitan inda dahil sa kay kaabwatun ag sa kayamuun niya manga sanga.

¹² Dapat dahil sa pangagalit inayit inda, ag iyinmut sa daga. Nabaug kay manga burak dahil sa mainit pag durus ginan sa butlakan. Nalayung kay matibay pag manga sanga ag tinutdan.

¹³ Taynguna itinanum maan inda sa pangawakawaan, sa rugar mamara ag unman may danum.

¹⁴ Nasunug kay usa ka sanga ag dinmakit ti apuy sa iba waya pag manga sanga, ag nasunug diman kay manga burak. Nakan unman yi may matibay pag manga sanga ti nasawad mahimu buwatun bastun hari. “Inda pag hirinambitun kailangan kantahun.”