Isikil 18 - Hanunuu

Mamatay ti Magpakadaut

¹ Magkun ti Panginuun sa kangku,

² “Hayga nguna pagbagawun niyu inda pag kabagawan sa Israil: ‘Nagkaun kay gurang maaslum pag ubas, ag kay aslum inda masamitan hanggan nida manga anak?’

³ “Aku, ti Panginuun Diyus buhi, magsumpa kuntay balaw yi niyu banggitun inda pag kabagawan sa Israil.

⁴ Patingihi niyu inda! Ti tanan buhi tawu kangku — ti buhi gurang ag anak. Ti nagkasala pag tawu imaw ti mamatay.

⁵ Halimbawa, may usa ka tawu matadlung ag hustu kay manga pagbuwatun.

⁶ Unman siya magsamba sa manga diyus-diyusan Israil ngatay magkaun manga handug para sa inda pag manga diyus-diyusan sa manga simbahan sa manga bantud. Unman siya mag-ulid sa asawa iba ngatay sa babayi magkadugu.

⁷ Unman siya mag-api, ag pag-iuli niya ti garantiya manga nakautang sa kanya. Unman siya magtakaw, nu unman pagpakaunun niya ti manga magkalun-us ag pagpakan-an rutay ti manga unman may rutay.

⁸ Unman siya magpatubu nu magpautang siya. Unman siya magbuwat daut, ag unman siya may pagkampihan sa kay pagpihu.

⁹ Pagsundun niya mayad kang manga surundanun ag manga sugu. Matadlung inda pag tawu ag parargu siya mabuhi. Aku, ti Panginuun Diyus, ti magbagaw inda.

¹⁰ “Dapat halimbawa, inda pag tawu may anak lalaki maisug ag magpanmatay ngatay pagbuwatun niya inda pag manga bagay

¹¹ balaw pagbuwatun niya ama: Magkaun siya manga handug para sa manga diyus-diyusan sa manga simbahan sa manga bantud, ag mag-ulid siya sa asawa iba.

¹² Pag-apihun niya ti manga makuri hanggan manga pugri. Magtakaw siya, ag unman niya pag-iuli ti garantiya manga nakautang sa kanya. Magsamba siya sa manga diyus-diyusan, ag magbuwat mayagting pag manga bagay.

¹³ Magpautang siya may patubu. Mabuhi aw nguna siya? Unman! Mamatay gid inda pag tawu dahil sa tanan mayagting pag manga bagay niya binwat. Siya ti sisihun sa kay kamatayan.

¹⁴ “Dapat halimbawa, inda pag daut tawu may anak lalaki, ag nakitan inda anak ti tanan kasalanan binwat niya ama, dapat unman niya sinunud.

¹⁵ Unman siya magsamba sa manga diyus-diyusan Israil ngatay magkaun manga handug para sa inda pag manga diyus-diyusan sa manga simbahan sa manga bantud. Unman siya mag-ulid sa asawa iba.

¹⁶ Unman siya mag-api, ag unman siya magbuul pilinda manga nakautang sa kanya. Unman siya magtakaw nu unman pagpakaunun niya ti manga magkalun-us ag pagpakan-an rutay ti manga unman may rutay.

¹⁷ Unman siya magbuwat daut, ag unman siya magpatubu nu magpautang siya. Pagtupadun niya kang manga sugu ag manga surundanun. Inda pag tawu balaw mamatay dahil sa kasalanan niya ama nu unman parargu siya mabuhi.

¹⁸ Dapat kay ama mamatay dahil sa kay kasalanan, dahil nanguwarta siya, nanakaw ag nagbuwat daut sa kay kasimanwa.

¹⁹ “Dapat barang mamaingana kamu, ‘Hayga nguna balaw dapat parusahan ti anak dahil sa kasalanan niya ama?’ Nu ti anak magbuwat matadlung, hustu, ag pagsundun niya mayad kang manga surundanun, parargu siya mabuhi.

²⁰ Ti nagkasala lang pag tawu ti mamatay. Ti anak balaw dapat parusahan dahil sa kasalanan niya ama, ag ti ama balaw dapat parusahan dahil sa kasalanan niya anak. Ti matadlung pag tawu papaladan sa kay matadlung pag manga pagbuwatun, ag ti daut pag tawu parusahan sa kay daut pag manga pagbuwatun.

²¹ “Dapat nu ti daut pag tawu mag-ampu sa tanan niya nabwat kasalanan ag sumunud sa kang surundanun hanggan bumuwat matadlung ag hustu, balaw siya mamatay nu unman parargu mabuhi.

²² Balaw yi siya suktun sa tanan niya kasalanan nabwat, ag dahil sa kay matadlung pag pagbuwatun, parargu siya mabuhi.

²³ Aku, ti Panginuun Diyus, unman magbaya nu mamatay ti usa ka daut pag tawu. Makabaya aku nu mansisi siya ag parargu mangabuhi.

²⁴ “Dapat nu ti usa ka matadlung pag tawu manpakarayu sa kay matadlung pag buhi ag bumuwat daut, hanggan bumwat mayagting pag manga bagay pagbuwatun manga daut, parargu aw nguna siya mabuhi? Unman! Kalimtan yi kay matadlung pag manga binwat. Ag dahil sa kay nagdayu sa kangku ag sa manga kasalanan niya nabwat, mamatay siya.

²⁵ “Dapat barang sumabi kamu, ‘Balaw matadlung ti palakaw Panginuun.’ Pagpatingi kamu, nasakupan Israil: Kangku aw nguna pagpalakaw ti balaw matadlung ngatay kanyu?

²⁶ Nu ti usa ka matadlung pag tawu manpakarayu sa kay matadlung pag buhi ag bumuwat daut, mamatay siya dahil sa kay kasalanan.

²⁷ Dapat nu ti usa ka daut pag tawu manpakarayu sa kay daut pag buhi ag bumwat katadlungan ag hustu, miribri niya kay buhi.

²⁸ Balaw siya mamatay nu unman parargu siya mabuhi dahil inampu niya ti tanan niya pag kasalanan ag tinayakan niya inda.

²⁹ Dapat barang sumabi kamu nasakupan Israil, ‘Balaw matadlung ti palakaw Panginuun.’ Nasakupan Israil, kangku aw nguna pag manga palakaw ti balaw matadlung ngatay kanyu?

³⁰ “Nakan magbagaw aku sa kanyu, nasakupan Israil, aku, ti Panginuun Diyus, sumintinsiya sa kada usa sa kanyu angay sa kay binwat. Taynguna, pagsisi yi kamu ag tayaki yi ti tanan niyu pag manga kasalanan hampay balaw kamu midamhak.

³¹ Nasakupan Israil, hayga gustu niyu mamatay? Apasi yi niyu ti pagbuwat daut ag bag-uha yi niyu kanyu buhi.

³² Balaw aku magbaya nu may mamatay. Nakan pagsisi yi kamu hampay parargu kamu mabuhi. Aku, ti Panginuun Diyus, ti magbagaw inda.”