Isikil 17 - Hanunuu

Ti Pahalimbawa tungkul sa manga Agila ag sa Halaman Magwakat

¹ Magkun ti Panginuun sa kangku,

² “Anak tawu, tultulan inda pag pahalimbawa sa nasakupan Israil,

³ ag sabihi sida aku, ti Panginuun Diyus, ti magpatultul inda: May usa ka daka pag agila linmayang atabug sa Libanun. Malapad kay manga pakpak ag madamul kay manga bulbul tuhay-tuhay kay kulay. Inmapun inda sa tungud kayu sidru,

⁴ ag pinlud niya ti suput sa kay suru sanga. Bag-u dinara niya inda sa rugar manga manugnigusyu ag itinanum ati.

⁵ “Pagkatapus nagbuul ti agila binhi sa daga Israil ag itinanum inda sa abunda pag daga sa saruy sapa nu naan tumubu inda madali.

⁶ Tinmubu inda usa ka ababa pag halaman magwakat. Kay manga sanga inda magyapang atabug sa agila, ag abasad kay gamut inda. Nagsanga waya gid inda ag nansalingsing.

⁷ “Dapat may usa ka daka pag agila ti rinmas-ug. Malapad diman kay manga pakpak ag madamul kay bulbul. Kay manga gamut ag manga sanga tunda pag halaman yinmapang atabug sa inda pag agila hampay mapadanuman siya agila higit waya sa danum daga nagtanuman sa kanya.

⁸ Binwat inda halaman una nitanum yi siya sa mayad pag daga, nu naan may abunda danum makapatubu, makapaburak, ag makaparinu sa kanya.

⁹ “Taynguna, aku, ti Panginuun Diyus magpaingana: Parargu aw nguna inda tumubu? Unman! Ayitun inda ag panbul-un kay manga burak, ag pabay-anan malayung. Madali lang inda ayitun, balaw yi kailangan ti mabaskug pag tawu ngatay ti mayamu pag manga tawu hampay ayitun inda.

¹⁰ Una itanum waya maan inda sa tuhay pag rugar balaw yi inda tumubu. Malayung inda lubus nu huypun mainit pag bagyu ginan sa butlakan. Hu, malayung inda sa kay pagtubuan.”

Kay Ibug Sabihun Pahalimbawa

¹¹ Bag-u magkun ti Panginuun sa kangku,

¹² “Paingan-a inda pag maglaban pag nasakupan Israil nu alam nida nu unu kay ibug sabihun tunda pag pahalimbawa. Sabihi sida imaw inda kay ibug sabihun: Nag-atag ti hari Babilunya sa Hirusalim ag binihag niya ti hari nida hanggan ti manga manugpamahala, ag dinara sida atabug sa Babilunya.

¹³ Nagpili siya usa ka linahi hari sa Huda ag nagbuwat siya kasunduan sa kanya ag ipinasumpa niya siya kuntay sumirbi sa kanya. Binihag diman niya ti manga kilala pag manga tawu sa Huda

¹⁴ hampay inda pag kaharian balaw yi bumangun uman ag balaw yi lumaban sa kanya. Pumirmaminti lang inda pag kaharian nu iparargu niya kay kasunduan sa Babilunya.

¹⁵ Dapat naglaban ti hari Huda sa hari Babilunya sa panab-anan pagpadara manga tawu sa Ihiptu sa pagbuul manga kabayu ag mayamu manga sundalu. Manalu aw nguna siya? Makapalagiw aw nguna siya ag makaribri sa parusa sa paglabag niya sa kay kasunduan sa Babilunya?

¹⁶ Unman! Dahil aku, ti Panginuun Diyus buhi, magsumpa kuntay inda pag hari Huda pihu gid mamatay sa Babilunya, dahil linabag niya ti kasunduan kay sinumpaan sa hari Babilunya ti nagbuwat hari sa kanya.

¹⁷ Unman makaawat sa kanya sa girahan ti hari Ihiptu, hanggan kay kapangyarihan ag mayamu pag manga sundalu nu girahun yi ti manga taga Babilunya sa pagpanmatay mayamu pag buhi.

¹⁸ Linabag hari Huda ti kasunduan kay sinumpaan tupadun sa hari Babilunya, nakan balaw gid siya makaribri.

¹⁹ “Aku, ti Panginuun Diyus buhi, magsumpa kuntay parusahan gid niku siya dahil linabag niya kang kasunduan kay sinumpaan sa kang ngaran.

²⁰ Lambatun niku siya ag darahun sa Babilunya, ag ati pag parusahan niku siya dahil balaw siya matapat sa kangku.

²¹ Magkaramatay kay manga sundalu magpalalagiwan, ag ti manga masawad sa kanda mawayak sa una naan pag rugar. Bag-u maalaman niyu aku, ti Panginuun, ti magbagaw inda.”

Ti Mayad pag Patabgan Ipinangaku Diyus

^22-23 Magkun waya gid ti Panginuun Diyus, “Mam-ul aku suput sa kay pinakasuru pag sanga sidru, itanum niku inda sa abwat pag bantud Israil. Umabunda inda, mamurak ag bumaliw usa ka marinu pag sidru. Mamugad sa inda pag kayu ti tanan kalasi manuk, ag makapasirung sida sa kay manga sanga.

²⁴ Ti tanan kayu sa daga makaalam kuntay aku ti Panginuun magpulud sa arabwat pag manga kayu hanggan magpaabwat sa ababa pag manga kayu. Aku ti magpalayung sa malangba pag manga kayu hanggan ti magbuhi sa manga layung pag kayu. Aku, ti Panginuun, ti nagtaratu inda, ag tupadun gid niku inda.”