Isikil 16 - Hanunuu

Ti Hirusalim Parihu sa Babayi Magpanguragin

¹ Magkun ti Panginuun sa kangku,

² “Anak tawu, paalami ti Hirusalim sa kay mayagting pag manga binwat.

³ Sabihi siya aku, ti Panginuun Diyus, magbagaw sa kanya: ‘Usa kawu ka Kananiyu! Kanmu ama usa ka Amuriyu, ag kanmu ina usa ka Hitiyu.

⁴ Ag katpung kanmu pagkalusad unman may nag-alaga sa kanmu. Unman may nagpulud sa kanmu pusud, unman may nagparigus sa kanmu, ngatay naghaplas asin sa kanmu, ngatay nagsaput sa kanmu sa pansuhi.

⁵ Unman gid may magpasunaid sa pagbuwat inda pag manga bagay sa kanmu; unman gid may naawa sa kanmu. Bagkus ngap, iyinmut kawu sa karatagan, ag kinadat-an kawu ginan sa sirang nimu pagkalusad.

⁶ “ ‘Dapat pagka nalakawan niku kawu malilidan sa kanmu dugu, sinabihan niku kawu mabuhi gid kawu.

⁷ Pinadaka niku kawu parihu sa usa ka halaman sa tanman. Nagdaka kawu ag nagbaliw daraga. Naglaun kanmu dubdub ag nagtubu kanmu buhuk, dapat uba diman kawu.

⁸ “ ‘Pagka nalakawan maan niku kawu, nakitan niku mahimu yi kawu asawan-un. Nakan itinabun niku kang kulimpay sa kanmu bilug uba, ag nagtaratu aku sa kanmu mahalun kawu niku. Nagbuwat aku kasunduan sa kanmu, ag nagbaliw kangku kawu. Aku, ti Panginuun Diyus, ti magbagaw inda.

⁹ “ ‘Bag-u inugasan niku ti manga dugu sa kanmu bilug, ag pinayidan niku kawu lana ulibu.

¹⁰ Bag-u pinarutayan niku kawu mahalaga pag rutay linu ag sida binurdahan, ag pinasulungan paknul pag lapak.

¹¹ Pinasulungan niku kawu manga pamarinu: manga ugsung sa kamang ag unu sa liug.

¹² Pinasulungan diman niku kawu singsing para sa irung, manga aritus, hanggan kuruna.

¹³ Nakan pinarinuan niku kawu gintu ag pilak. Kanmu rutay linu ag binurdahan katsa, ag kanmu karan-unun ginan sa marinu pag kalasi arina, daykut, ag lana ulibu. Masyadu kawu marinu, ga rayna kawu.

¹⁴ Nagbaliw bantug kawu sa manga nasyun dahil sa kanmu masyadu pag karinuan kang ipinakaun sa kanmu. Aku, ti Panginuun Diyus, ti magbagaw inda.

¹⁵ “ ‘Dapat nagsarig kawu sa kanmu karinuan, ag ginamit nimu kanmu pagkabantug sa kahalayan pagpanguragin. Nagpagamit kawu una lang sa kantapu pag lalaki maglawuy, ag nagpasawa-sawa sida sa kanmu.

¹⁶ Ginamit nimu ti iba nimu ka manga rutay sa pagparinu sa manga simbahan sa abwat pag manga rugar, nu naan pagbuwatun nimu kanmu kahalayan magpanguragin. Balaw mana inda dapat mangyari.

¹⁷ Ginamit diman nimu ti manga gintu ag pilak pag manga pamarinu ipinakaun niku sa kanmu sa pagpabuwat manga diyus-diyusan lalaki ag sinamba nimu inda. Parihu lang sa nanguragin kawu!

¹⁸ Pinarutayan nimu inda pag manga diyus-diyusan nimu manga rutay binurdahan, ag ihinandug nimu sa kanda kang lana ag kamangyan.

¹⁹ Isinagda diman nimu sa kanda ti karan-unun ipinakaun niku sa kanmu ginan sa marinu pag kalasi arina, daykut, ag lana ulibu. Isinagda nimu inda bilang handug pamanglu. Hu, imaw gid inda ti nangyari. Aku, ti Panginuun Diyus, ti magbagaw inda.

²⁰ “ ‘Bin-ul diman nimu kanmu manga anak lalaki ag babayi kanmu anak sa kangku ag ihinandug nimu bilang karan-unun sa manga diyus-diyusan. Unman aw waya lugud kawu magkasulung sa kanmu magpanguragin?

²¹ Pinanmatay nimu kang manga anak ag ihinandug sa manga diyus-diyusan.

²² Sa tanan mayagting nimu pagbuwatun ag pagpanguragin unman gid nimu inisip nu kabitay niku kawu inalagaan katpung kalay-awan waya kawu, katpung uba waya kawu ag magpalisud-lisud sa kanmu dugu.

²³ “ ‘Aku, ti Panginuun Diyus, magbagaw magkun kaawaawa gid kawu! Bukud sitay pag kadautan kanmu binwat,

²⁴ nagpatindug waya kawu manga simbahan para sa kanmu manga diyus-diyusan sa manga buruybuyahan

²⁵ ag sa manga pagsalakan manga dalan. Ag ati inuringan nimu kanmu karinuan, ag nagpagamit kawu una lang sa kantapu pag lalaki maglawuy ati. Mag-amat di magdugang kanmu pagpanguragin.

²⁶ Nagpakiusa ag nagpagamit kawu sa manga taga Ihiptu, kanmu kaarani pag nasyun mapanguragin. Nakapagalit gid sa kangku kanmu parargu pagpanguragin.

²⁷ Nakan pinarusahan niku kawu ag pinadiit kanmu nasakupan. Ipinakaun niku kawu sa kanmu manga kalaban manga Pilistiyu, ag una sida nadulaw sa kanmu mahalay pag buruwatun.

²⁸ “ ‘Nagpakiusa diman kawu sa manga taga Asirya, dahil unman waya gid kawu magkasulung. Pagkatapus, unman waya gid kawu masulung.

²⁹ Nagdugang waya gid kanmu pagpanguragin dahil nagpakiusa diman kawu sa manga taga Babilunya, ti rugar manga manugnigusyu, dapat unman waya gid kawu masulung.

³⁰ “ ‘Aku, ti Panginuun Diyus, magbagaw magkun madali kawu makagarya. Imaw ngani nakan nabwat nimu tunda pag manga bagay ga sa usa ka uragin pag babayi magpabili kay bilug.

³¹ Nagpatindug kawu manga simbahan para sa kanmu manga diyus-diyusan, sa manga pagsalakan manga dalan ag sa manga buruybuyahan. Mas subra waya kawu daut kaysa manga babayi magpabili kanda bilug dahil unman kawu magpabayad sa pag-ulid sa kanmu.

³² Usa kawu ka babayi magpauragin! Mas gustu waya nimu mangulid sa iba lalaki kaysa kanmu asawa.

³³ Magpabayad ti manga babayi magpabili kanda bilug, dapat kawu inda imaw waya ti magpakaun pamakaun sa kanmu manga katagbu hampay magarya nimu sida pumakarani sa kanmu sa pag-ululidan.

³⁴ Tuhay kawu sa manga babayi magpabili kanda bilug. Unman may magtaban sa kanmu hampay man-ululidan; kawu ngap mismu ti magtaban. Unman kawu magpabayad; kawu waya ngap ti magbayad. Nakan tuhay gid kawu.

³⁵ “ ‘Nakan kawu pag uragin, patingihi kang paanyu.

³⁶ Aku, ti Panginuun Diyus, magbagaw magkun: Ipinakakit nimu kanmu bilug uba ag ipinakaun nimu kanmu bilug sa kanmu manga katagbu dahil sa kanmu pagpanguragin. Sinamba nimu kanmu mayagting pag manga diyus-diyusan, ag pinanmatay nimu kanmu manga anak bilang handug sa kanda.

³⁷ Dahil sa inda pag manga binwat nimu, tipunun niku ti tanan nimu manga katagbu kanmu kinawilyan — kanmu minahal hanggan diman kanmu pagkagalitan. Tipunun niku sida una naan ginan sa paglaban sa kanmu, ag ubahan niku kawu sa kanda atubangan ag makitan nida kanmu bilug uba.

³⁸ Parusahan niku kawu sa kanmu pagpanguragin ag pagpanmatay. Ag sa kang masyadu pag pangagalit ag imun, matyun niku kawu.

³⁹ Ipakaun niku kawu sa manga kamang nimu manga katagbu, ag pandautun nida kanmu manga simbahan para sa kanmu manga diyus-diyusan. Ubahan nida kawu ag panbul-un ti marinu nimu pag manga pamarinu, ag tayakan nida kawu uba.

⁴⁰ Ipagira nida kawu sa kaban manga tawu bumintuk sa kanmu ag manpulud-pulud sa kanmu bilug sa panab-anan baladaw.

⁴¹ Sunugun nida kanmu manga balay ag parusahan nida kawu sa atubangan mayamu manga babayi. Amparahun niku kanmu kahalayan pagpanguragin ag kanmu magbayad sa kanmu manga katagbu.

⁴² Bag-u mahungpawan yi aku sa kang masyadu pag pangagalit ag kang imun sa kanmu, ag balaw yi aku magalit sa kanmu.

⁴³ “ ‘Kinalimtan nimu nu kabitay kang pag-alaga sa kanmu katpung kalay-awan waya kawu. Bagkus ngap, ginalit nimu aku sa kanmu manga binwat. Nakan aku, ti Panginuun Diyus, magbagaw magkun parusahan gid niku kawu angay sa kanmu manga binwat. Unman aw lugud nagbuwat kawu mahalay pag buwat dugang sa tanan nimu mayagting pag manga binwat?

⁴⁴ “ ‘May manga tawu magbagaw inda pag kabagawan sa kanmu: “Nu kabitay kay ina katunda diman kay anak.”

⁴⁵ Parihu gid kawu sa kanmu ina magpamuya sa kay asawa ag manga anak. Ag parihu diman kawu sa kanmu manga patar-ari babayi magpamuya sa kanda manga asawa ag manga anak. Kanmu ina usa ka Hitiyu ag kanmu ama usa ka Amuriyu.

⁴⁶ Ti aka nimu babayi imaw ti Samarya ati pag mag-uli sa salatan kaibahan kay manga anak babayi. Kanmu arian babayi imaw ti Suduma, ati mag-uli sa kanaway kaibahan kay manga anak babayi.

⁴⁷ Sinunud nimu kanda buruwatun ag kanda mayagting pag manga buwat. Ag sa dag-ud lang pag udas subra waya kanmu binwat kaysa kanda.

⁴⁸ Aku, ti Panginuun Diyus buhi, magsabi kay tutuu ti Suduma kanmu patar-ari ag kay manga anak babayi unman nakabwat parihu sa kanmu binwat ag nimu manga anak babayi.

⁴⁹ Ti kasalanan Suduma kanmu patar-ari imaw ti magpalabaw-labaw. Siya ag kay manga anak babayi abunda sa karan-unun ag maalwan kay pagpangabuhi, dapat unman gid sida nan-awat sa manga pugri.

⁵⁰ Sa kanda pagpalabaw-labaw nagbuwat sida mayagting pag manga bagay sa kang pamantay, nakan ipinadamhak niku sida pagka nakitan niku kanda binwat.

⁵¹ “ ‘Una ti Samarya unman nakabuwat una di katunga kanmu manga kasalanan. Mas mayamu mayagting pag manga bagay kanmu binwat kaysa kanmu manga patar-ari babayi, nakan ga mas matadlung waya sida kaysa kanmu dahil sa tanan kadautan nimu binwat.

⁵² Dapat mangay-a kawu dahil kanmu kasalanan masyadu daut kaysa kasalanan nimu patar-ari babayi. Nu ipaparihu, ga mas matadlung waya sida kaysa kanmu.

⁵³ Dapat rumas-ug ti udas ibalik niku ti mayad pag kahamtangan Suduma ag Samarya, hanggan kanda manga anak babayi. Ibalik diman niku kanmu mayad pag kahamtangan, dapat kaibahan nida,

⁵⁴ hampay mangay-a kawu sa tanan nimu binwat, dahil sa manga daut pag buwat nimu mas mayad waya sida kaysa kanmu.

⁵⁵ Hu, ibalik niku ti mayad pag kahamtangan nimu manga patar-ari babayi — ti Suduma ag Samarya, hanggan kanda manga anak babayi. Ag imaw diman inda ti mangyari sa kanmu ag sa kanmu manga anak babayi.

⁵⁶ Pinuyaan nimu kaybi ti Suduma katpung marapadayaw waya kawu

⁵⁷ ag katpung unman waya niburayhaw kanmu kadautan. Dapat taynguna parihu yi kawu sa kanya; pagpuyaan diman kawu manga taga Idum hanggan manga rugar sa palibut, hanggan diman ti manga Pilistiya. Inda sida asan sa kanmu palibut magpuya sa kanmu.

⁵⁸ Agwantahun nimu ti parusa dahil sa kanmu mahalay ag mayagting pag manga binwat. Aku, ti Panginuun, ti magbagaw inda.’ ”

⁵⁹ Inda waya gid ti pagsabihun Panginuun Diyus: “Parusahan niku kawu nu hintay ti dapat sa kanmu, dahil binul-an nimu halaga kang taratu sa panab-anan paglabag sa kanta kasunduan.

⁶⁰ Dapat tupadun di niku kang binwat kasunduan sa kanmu katpung kalay-awan waya kawu, ag mamwat aku sa kanmu kasunduan pumarargu sa unman may katapusan.

⁶¹ Bag-u maalala nimu nu kabitay kanmu buruwatun sa kabag-u ag mangay-a kawu, lalu yi nu buwatun niku kanmu manga patar-ari babayi, ti Samarya ag Suduma, bumaliw kanmu manga anak, una balaw sida kaibahan sa kang kasunduan sa kanmu.

⁶² Parig-unun niku kang kasunduan sa kanmu, ag maalaman nimu aku ti Panginuun.

⁶³ Alalahanun nimu kanmu manga kasalanan ag mangay-a kawu, ag ga udyi kawu makabagaw sa masyadu pag kakay-ahan nu patawadun yi niku ti tanan nimu binwat. Aku, ti Panginuun Diyus, ti magbagaw inda.”