Isikil 14 - Hanunuu

Ti Pagsamba manga Paggurangunun sa Israil sa manga Diyus-diyusan

¹ Kas-a ginan, nag-atag sa kangku ti manga paggurangunun sa Israil ag nagtukaw sa kang atubangan hampay manhagad paanyu ginan sa Panginuun.

² Magkun ti Panginuun sa kangku,

³ “Anak tawu, inda sida magmahal sa kanda manga diyus-diyusan imaw ti magdara sa kanda sa pagbuwat daut, hayga pahintulutan niku sida manhagad paanyu ginan sa kangku?

⁴ Taynguna, sabihi sida aku, ti Panginuun Diyus, magkun: Una si unu pag Israilita ti magmahal sa kay diyus-diyusan dumara sa kanya sa pagbuwat kadautan ag manhagad paanyu sa purupita, aku, ti Panginuun, ti managut sa kanya sa panab-anan parusa dapat sa kanya angay sa kayamuun niya diyus-diyusan.

⁵ Buwatun niku inda hampay bumalik sa kangku ti tanan Israilita nagpakarayu sa kangku dahil sa kanda manga diyus-diyusan.

⁶ “Nakan taynguna, sabihi ti nasakupan Israil aku, ti Panginuun Diyus, magkun: Pag-ampu kamu ag bugyahi kanyu manga diyus-diyusan, ag tayaki ti tanan niyu mayagting pag manga buwat.

⁷ Una si unu pag Israilita ngatay day-uhan ti mag-uli sa Israil, ti manpakarayu sa kangku ag manmahal sa kay diyus-diyusan dumara sa kanya sa pagbuwat kadautan, ag manhagad siya payu sa kangku sa panab-anan purupita, aku, ti Panginuun, ti managut sa kanya.

⁸ Labanan niku siya ag buwatun usa ka paandam sa manga tawu, ag libakun nida siya. Ipasaman niku siya sa kang nasakupan. Bag-u maalaman niyu aku ti Panginuun.

⁹ “Dapat nu ti usa ka purupita naibug pumakaun sa inda pag tawu paanyu ginan sa kangku, inda dahil aku, ti Panginuun, imaw ti nagdaya sa kanya. Parusahan niku siya ag ipasaman sa kang nasakupan manga Israilita.

¹⁰ Parihu parusahan inda pag purupita ag ti tawu maghagad sa kanya paanyu.

¹¹ Buwatun niku inda hampay balaw yi manpakarayu sa kangku ti manga Israilita, ag balaw yi nida uringan kanda sadili sa panab-anan pagbuwat daut. Bumaliw kang nasakupan sida, ag aku bumaliw kanda Diyus. Aku, ti Panginuun Diyus, ti magbagaw inda.”

¹² Magkun ti Panginuun sa kangku,

¹³ “Anak tawu, nu magkasala ag balaw matinupadun sa kangku ti usa ka nasyun, parusahan niku sida, ag bul-un niku kanda bulul-an karan-unun. Padarahan niku sida lun-us hampay magkaramatay sida ag kanda manga hayup.

¹⁴ Una kaibahan waya nida asan si Nuwi, si Danyil, ag si Hub, sida lang ti maribri dahil sa kanda pagkamatadlung. Aku, ti Panginuun Diyus, ti magbagaw inda.

¹⁵ “Ngatay halimbawa, padaran-an niku maraisug pag manga hayup inda pag nasyun hampay panmatyun kay manga kasimanwa, ag bumaliw mapung-aw inda pag rugar ag unman yi may manlakaw siyun dahil sa kadalaan sa maisug pag manga hayup.

¹⁶ Una kaibahan waya asan ati pag tulu ka tawu, aku, ti Panginuun Diyus buhi, magsumpa balaw nida mairibri una kanda manga anak, nu unman kanda lang sadili. Ag tunda pag nasyun bumaliw mapung-aw.

¹⁷ “Ngatay nangus, padaran-an niku gira inda pag nasyun hampay panmatyun kay manga nasakupan hanggan manga hayup.

¹⁸ Una kaibahan waya asan ati pag tulu ka tawu, aku, ti Panginuun Diyus buhi, magsumpa balaw gid nida mairibri una kanda manga anak, nu unman kanda lang sadili.

¹⁹ “Ngatay nangus, sa kang pangagalit padaran-an niku panakitun inda pag nasyun hampay panmatyun kay manga nasakupan ag manga hayup.

²⁰ Una kaibahan waya nida si Nuwi, si Danyil ag si Hub, aku, ti Panginuun Diyus buhi, magsumpa unman gid nida mairibri una kanda manga anak, nu unman kanda lang sadili dahil sa kanda pagkamatadlung.

²¹ “Sa ungud, aku, ti Panginuun Diyus, magkun kaawaawa ti Hirusalim nu ipadara yi niku inda pag upat ka mabuyat pag parusa: manga girahan, lun-us, maisug pag manga hayup, ag manga sakit — manmatay sa kay manga nasakupan hanggan manga hayup.

²² Dapat may masawad buhi sa kanda, ag darahun sida siyun sa Babilunya hampay ipaamut sa kanyu bilang manga bihag. Makitan niyu nu kabitay kay ka daut kanda ugali hanggan kanda manga pagbuwatun, ag madura ti kadautan niyu naisipan sa kang pagparusa sa Hirusalim.

²³ Hu, madura ti kadautan niyu naisipan nu makitan niyu kanda pag-ugaliun ag kanda manga pagbuwatun, ag maisip niyu may dahilan maaw nu hayga binwat niku tunda sa Hirusalim. Aku, ti Panginuun Diyus, ti magbagaw inda.”