Isikil 13 - Hanunuu

Parusahan ti Balaw Tutuu pag manga Purupita

¹ Magkun ti Panginuun sa kangku,

² “Anak tawu, pagtultul kawu laban sa pudilun pag manga purupita Israil magpanhula ginan lang sa kanda sadili naisipan. Sabihi sida pagpatingi sa inda pag tultulanun niku:

³ Aku, ti Panginuun Diyus, magkun: kaawaawa kanda kahamtangan manga purupita unman may intindi magbuwat-buwat lang kanda manga hula, ag balaw diman sida may nakitan pangakakitun.

⁴ Israil, kanyu manga purupita parihu sa manga talun idu asan sa guba pag manga rugar.

⁵ Unman nida pagpaandaman ti manga tawu. Ga parihu lang sa unman nida pagkaayadun ti nadaut pag manga alad batu Israil hampay tumibay inda pagras-ug girahan, sa sirang pumarusa ti Panginuun.

⁶ Balaw tutuu kanda pangakakitun ag kapudilan kanda manga hula. Magkun sida ginan sa Panginuun kanda pagsabihun, dapat kay tutuu balaw niku sida ipinadara. Ag pag-alagdun waya nida matupad kanda pagsabihun.

⁷ Balaw tutuu kanda pangakakitun ag kapudilan kanda manga hula. Magkun sida, ‘Magkun ti Panginuun’, dapat balaw aku nagbagaw tunda.

⁸ “Nakan aku, ti Panginuun Diyus, magkun labanan niku sida, dahil kapudilan kanda manga hula ag balaw tutuu kanda pangakakitun.

⁹ Parusahan niku inda pag manga purupita kanda pangakakitun balaw tutuu ag kanda pag-ihula kapudilan. Balaw sida kilalan-un sakup sa kang nasakupan ag kanda manga ngaran balaw isurat sa listahan nasakupan Israil, ag balaw diman sida makasulud sa daga Israil. Bag-u maalaman niyu aku ti Panginuun Diyus.

¹⁰ “Inda pag manga purupita magpatalang sa kang nasakupan sa panab-anan pagsabi, ‘Mayad ti tanan’, dapat balaw maaw mayad. Ga parihu lang sa magpatindug ti manga tawu matpuk pag alad batu, ag paglitisun lang inda manga purupita.

¹¹ Sabihi inda pag manga maglitis kanda alad batu marup-ag, dahil manpadara aku mabaskug pag uran. Ti uran yilu ga manga batu pumadna sa inda pag alad batu, ag huypun inda mabaskug pag bagyu.

¹² Ag nu marup-ag yi inda mamaingana ti manga tawu sa kanda, ‘Unu nguna ti niawat niyu ilinitis?’

¹³ “Nakan aku, ti Panginuun Diyus, magkun: Sa kang masyadu pag pangagalit, rup-agun niku ti manga alad batu sa panab-anan mabaskug pag bagyu, uran yilu ga manga batu, ag mabaskug pag uran.

¹⁴ Hu, rup-agun niku ti alad batu niyu litisun. Rup-agun gid niku inda tugka sa maglinuwang kay patakinan inda. Ag nu marup-ag yi, madugsakan kamu ag magkaramatay. Bag-u maalaman niyu aku ti Panginuun.

¹⁵ Iparanas niku kang pangagalit sa alad batu ag sa manga maglitis inda. Bag-u ipaalam niku nadura yi ti alad batu hanggan kay manga maglitis inda,

¹⁶ ti manga purupita Israil magpanhula bumaliw kunu mayad ti kahamtangan Hirusalim, una unman maaw. Aku, ti Panginuun Diyus, ti magsabi inda.

¹⁷ “Taynguna, kawu anak tawu, pagtultul diman kawu laban sa manga babayi maghula ginan sa kanda sadili lang.

¹⁸ Sabihi sida aku, ti Panginuun Diyus, magbagaw magkun: Kaawaawa kamu pag manga babayi magpandaya sa kang nasakupan, anak man ngatay gurangun, sa panab-anan manga anting-anting. Pagpaulian niyu sida bugkus sa kanda manga kamang ag taung sa kanda manga ulu bilang manga anting-anting. Gustu niyu dayaun ti buhi niku nasakupan para sa kanyu sadili pag kaayadan.

¹⁹ Paglabagun niyu aku sa atubangan niku nasakupan dahil lang sa pira ka akup sibada ag pira ka bilug tinapay. Sa panab-anan niyu pamudil, pagkumnun niyu mamatay ti balaw dapat mamatay, ag pagkumnun diman niyu balaw mamatay ti dapat mamatay. Ag magpaniwala kang nasakupan sa kanyu kapudilan.

²⁰ “Nakan aku, ti Panginuun Diyus, magkun galit gid aku sa kanyu manga anting-anting kanyu paggamitun sa pagdaya sa manga tawu, ga manga manuk sinuduk. Lanitun niku inda pag manga anting-anting sa kanyu manga kamang, ag palpasan niku ti manga tawu ga sa manga manuk sinuduk niyu.

²¹ Gisiun diman niku kanyu manga taung, ag iribri niku kang nasakupan ginan sa kanyu manga kamang, ag balaw yi niyu sida madaya maan. Bag-u maalaman niyu aku ti Panginuun.

²² “Pagparukuun niyu ti manga matadlung sa panab-anan niyu kapudilan, una aku ngani mismu unman nagparuku sa kanda. Paggaryahun niyu ti manga daut danga sida mag-apas sa kanda daut pag buruwatun sa panab-anan pagtaratu sa kanda kuntay maribri sida sa kamatayan.

²³ Nakan madura yi kanyu balaw tutuu pag pangakakitun ag kanyu pagpanhula. Iribri niku kang nasakupan ginan sa kanyu manga kamang. Bag-u maalaman niyu aku ti Panginuun.”