Isikil 10 - Hanunuu

Ti Kamaskihan Kadayawan Diyus Nighit sa Balay Diyus

¹ Habang magbantay aku, may nakitan aku ga usa ka tukawan hari binwat ginan sa batu sapiru. Asan inda sa tungud tabun salamin sa tungud ulu manga kirubin.

² Magkun ti Panginuun sa tawu nakarutay linu, “Pag-ati kawu sa karaw-an manga gulung sa sirung manga kirubin, pag-akup kawu ati manga baga bag-u sarwagan inda sa banwa.” Nakitan niku nag-ati ngani siya.

³ Ti manga kirubin matindugan baliwa sa kanaway Balay Diyus katpung nagsulud ti tawu, may rurum tinmakip sa sulud pag sugkadan Balay Diyus.

⁴ Bag-u inmighit ti kadayawan Panginuun sa tungud manga kirubin ag sinmalyu sa sabian Balay Diyus. Pinatakipan rurum ti Balay Diyus, ag ti sugkadan nagrayaw dahil sa kadayawan Panginuun.

⁵ Ti tunug manga pakpak manga kirubin parihu sa busis Makamaskihan Diyus, madnugan inda tugka sa luwas sugkadan.

⁶ Pagka sinugu Panginuun ti tawu nakarutay linu pagbuul apuy sa karaw-an manga gulung sa sirung manga kirubin, nag-ati ngani siya, nagtindug sa saruy usa ka gulung.

⁷ Nagbuul apuy ginan sa kanda karaw-an ti usa sa manga kirubin ag ipinauli inda sa kamang tawu nakarutay linu, tinanggap niya inda ag linmuwas.

⁸ Ti kada kirubin may imaw ga kamang tawu sa sirung nida manga pakpak.

⁹ May nakitan diman aku upat ka gulung sa habig manga kirubin, usa sa kada kirubin. Magsinglaw inda parihu sa mahalaga pag batu kirisulitu,

¹⁰ ag pararihu kanda histuda. Ti kada gulung may imaw waya gid usa ka gulung masulungan,

¹¹ nakan makaatag inda hanggan ti kirubin sa una naan tag baliwa balaw yi kailangan manpalisud waya.

¹² Ti buu bilug manga kirubin, kanda dayu, hanggan kamang, ag pakpak punu mata. Katunda diman ti manga gulung punu mata.

¹³ Bag-u nadnugan niku tunda pag manga gulung pag-ingarnan “magbuyung pag manga gulung.”

¹⁴ Ti kada kirubin may upat ka uyahun. Kay histuda un-an uyahun kirubin, kay ikadwa tawu, kay ikatlu liyun, ag kay ikap-at agila.

¹⁵ Bag-u napatungud ti manga kirubin. Inda sida ti manga buhi pag linalang kang nakitan sa Sapa Kibar.

¹⁶ Nu maglakaw ti manga kirubin, magkuyug diman sa kanda ti manga gulung, katida diman nu maglayang sida, magkuyug diman ti manga gulung.

¹⁷ Nu magpat-ung sida, magpat-ung diman ti manga gulung, ag nu magpatungud sida, magpatungud diman ti manga gulung, dahil kanda ispiritu asan sa manga gulung.

¹⁸ Bag-u ti kadayawan Panginuun inmighit sa sabian Balay Diyus ag sinmalyu sa tungud manga kirubin.

¹⁹ Habang magbantay aku, linmayang ti manga kirubin, kinmuyug diman sa kanda ti manga gulung. Nagpat-ung sida sa butlakan baliwa sabian Balay Diyus Panginuun, ag ti kadayawan Diyus Israil asan sa tungud nida.

²⁰ Imaw tunda ti buhi pag manga linalang nakitan niku sa sirung kamaskihan Diyus Israil ati sa Sapa Kibar. Ag nasalman niku inda pag manga linalang manga kirubin.

²¹ Ti kada usa sa kanda may upat ka uyahun ag upat ka pakpak, ag sa sirung nida pakpak may ga kamang tawu.

²² Kanda histuda parihu diman sa histuda buhi pag manga linalang kang nakitan sa Sapa Kibar. Ti kada usa maglakaw diritsu.