Isikil 1 - Hanunuu

Ti Un-an Ipinakakit sa kan Isikil

^1-3 Aku si Isikil ti manughandug, kan Busi anak, ag usa aku sa manga binihag sa Babilunya. Usa ka sirang, katpung ati aku mag-uli sa saruy Sapa Kibar kaibahan ti iba manga bihag, binmukas ti langit ag sinuldan aku kamaskihan Panginuun, ag may manga ipinakakit siya sa kangku manga pangakakitun. Nangyari inda sa ikalima pag sirang katpung ikap-at pag bulan katpung ika-30 pag timpu. Ikalima inda pag timpu pagkabihag sa kan Hari Hihuyakin.

⁴ Habang magbantay aku, may nakitan aku bagyu ginan sa kanaway. Magkilat ginan sa madamul pag rurum, nakan nagrayaw ti palibut. Ti apuy sa karaw-an rurum magduag ga sulu, ag magsinglaw ga galang.

⁵ May nakitan diman aku sa karaw-an rurum upat ka buhi pag manga linalang parihu sa manga tawu,

^6-8 dapat ti kada usa sa kanda may upat ka uyahun ag upat ka pakpak. Tul-id kanda manga kapusgan, kanda manga lulud parihu sa lulud baka, magsinglaw parihu sa pinakinis galang. May imaw kamang tawu sa kada sirung nida pakpak,

⁹ ag kanda manga pakpak magdurut-an. Maglayang sida durunganan una naan tag baliwa, unman magpalisud-lisud.

¹⁰ Inda kay histuda kanda manga uyahun: kay sarangwan, histuda tawu; kay sikun, histuda liyun; kay wala, histuda tudu baka; ag kay dayu, histuda agila.

¹¹ Kay duwa nida ka pakpak malapadan ag magdurut-an, ag kay duwa waya gid nida ka pakpak matabunan sa kanda manga bilug.

¹² Maglayang sida durunganan una naan tag baliwa, unman magpalisud. Nu naan tag sida darahun ispiritu ati diman waydi sida tabug.

¹³ Kanda histuda parihu sa maglabdab baga, ag may magpasalyu-salyu sa kanda karaw-an ga magduag sulu. Inda pag sulu masyadu gid marayaw, ginan sa inda pag sulu may magkislap kilat.

¹⁴ Inda pag manga linalang buhi paatabug-paataytag ga kilat.

¹⁵ Habang magbantay aku sa upat ka buhi pag manga linalang, may nakitan aku sa kanda sirung upat ka gulung — tigus-a ka gulung ti kada usa sa kanda. Ag inda pag manga gulung mapadnaan sa daga.

¹⁶ Kaindaay ti histuda manga gulung: magsinglaw ga mahalaga pag batu kirisulitu, ag pararihu kanda histuda. Ti kada gulung may imaw waya gid usa ka gulung sa sulud masulungan,

¹⁷ nakan makaatag inda hanggan ti buhi pag manga linalang una naan tag baliwa balaw yi kailangan magpalisud waya.

¹⁸ Ti palibut kada gulung malapad ag maradala, dahil punu inda manga mata.

¹⁹ Kaibahan diman upat ka buhi pag manga linalang ti manga gulung una naan tabug sida, ag nu magpatungud sida ati diman waydi ti manga gulung.

²⁰ Ti ispiritu buhi pag manga linalang asan sa manga gulung. Nakan nu naan tag ti ispiritu, ati diman pag mag-atag ti buhi pag manga linalang hanggan ti manga gulung.

²¹ Nu maglakaw ngani ti buhi pag manga linalang, magkuyug diman sa kanda ti manga gulung, ag nu pumat-ung ngani sida, magpat-ung diman ti manga gulung. Ag nu pumatungud sida, magpatungud diman ti manga gulung, dahil kanda ispiritu asan sa manga gulung.

²² May matabunan sa tungud buhi pag manga linalang ga manga salamin magsinglaw, ag makadululaw inda bantayun.

²³ Sa kay sirung malapadan ti duwa ka pakpak kada buhi pag linalang, magdurut-an kay manga suru pakpak. Ti duwa waya gid nida ka pakpak matabunan sa kanda manga bilug.

²⁴ Nu maglakaw ngani ti buhi pag manga linalang, kay ingay kanda manga pakpak parihu sa paywas danum, ngatay parihu sa busis Makamaskihan Diyus, ngatay parihu sa iringayan mayamu manga sundalu. Ag nu magpat-ung sida, pag-ikiyum nida kanda manga pakpak.

²⁵ Habang makiyuman kanda manga pakpak, may busis ginan sa tungud sa tunda pag matabunan sa kanda.

²⁶ May imaw ati ga tukawan hari binwat ginan sa batu sapiru, ag may matukawan ga tawu sa inda pag tukawan hari.

²⁷ Ginan sa kay awak tag tungud, parihu siya sa magsinglaw pag galang ga magduag apuy. Ag ginan sa kay awak tag sirung, parihu siya sa maglabdaban apuy, magkasangputan siya rayaw masyadu masilaw.

²⁸ Ti rayaw sa kay palibut ga balangaw sa udas mag-anitay. Katida ti kadayawan Panginuun. Pagka nakitan niku tida nanluhud aku ag may nadnugan aku busis magbagaw sa kangku.