Isayas 8 - Hanunuu

Inanak kay Anak Lalaki ni Isayas

¹ Magkun ti Panginuun sa kangku, “Pagbuul kawu usa ka malapad pag sururatan, ag isurat nimu inda pag manga bagaw: ‘Mahir Salal Has Bas.’ ”

² Nam-ul aku duwa ka makatiwalaan pag kastigus imaw ti puruyba kuntay isinurat ngani niku inda. Kay usa si Uryas ti manughandug, ag si Sakaryas kay anak ni Hibirikyas.

³ Bag-u nangulid aku sa kang asawa. Balaw nadugay, namuduy siya ag nanganak lalaki. Magkun ti Panginuun sa kangku, “Paingarnan nimu siya Mahir Salal Has Bas.

⁴ Ag dumunung ti anak umingaran ‘amang’ aw ngatay ‘inang,’ ti kayamanan Damasku ag ti manga inagaw Samarya bul-un di hari Asirya.”

⁵ Magkun waya ti Panginuun sa kangku,

⁶ “Dahil binugyahan manga tawu ti danum Silua magbulus malway, ag magbaya sida sa kan Hari Risin hanggan sa kan Hari Pika,

⁷ ipagira niku sida sa hari Asirya hanggan sa kay manga sundalu ga sapa Iyupratis magbaha ag maglapwas sa kay manga pangpang.

⁸ Manras-ug sida sa Huda parihu sa baha kay danum mag-abwat tugka sa liug, maglapwas sa buu daga.” Dapat kaibahan nimi ti Diyus!

⁹ Kamu pag manga nasyun, una waya manmirinsanan kamu, manwayak-wayak di kamu. Pagpatingi kamu ti manga sa arayu! Una waya mangalistu kamu sa paggira, matalu di kamu.

¹⁰ Una hintay ti paggayakun niyu laban sa kanmi balaw manalu, dahil kaibahan nimi ti Diyus.

Panawagan sa Magsarig sa Diyus

¹¹ Mahigpit aku pinasandaman Panginuun kuntay danga niku paghuwada ti palakaw manga kasimanwa niku.

¹² Magkun diman siya, “Danga kamu magkadala sa gayak iba manga tawu. Danga kamu magkadala sa pagkadalaan nida, ag danga diman kamu kulbaan.

¹³ Aku, ti Panginuun Makamaskihan, kailangan niyu kilalan-un banal. Aku ti dapat niyu kadalaan ag galangun.

¹⁴ Aku ti kanyu palalan-iban. Dapat sa manga taga Israil ag taga Huda, parihu aku sa usa ka batu karadayaanan makapatalakpa sa kanda. Ag para sa manga taga Hirusalim, parihu aku sa usa ka suduk.

¹⁵ Mayamu sa kanda ti madayaan, mitalakpa ag midamhak. Masduk sida ag mablay.”

¹⁶ Kamu kang manga manugsunud, alagaan niyu ti manga adal niku.

¹⁷ Magpaniwala aku sa Panginuun una waya pinatlikudan niya ti linahi ni Hakub. Sa kanya di aku pag magsarig.

¹⁸ Aku hanggan kang manga anak ipinakaun Panginuun imaw ti manga palatandaan para sa Israil ginan sa Panginuun Makamaskihan mag-uli sa Bantud Siun.

¹⁹ Nu may magsabi sa kanyu paghagad kamu pasandam ginan sa manga namatay sa panab-anan manga panhirian ag manga pandaniwan magbudung-budung, danga niyu pagbuwata tida. Unman aw kailangan sa Diyus kamu paghumagad pasandam? Hayga sa manga namatay kamu pag mamaingana para sa buhi?

²⁰ Ti kasuguan ag ti itinudlu Panginuun ti kailangan niyu patingihan. Nu may magsabi manga bagay salumpang sa manga pag-itudlu Panginuun, magkadluman waya kay naisipan tunda pag tawu.

²¹ Lumakaw sida magkagasa ag magkalun-us. Ag dahil sa lun-us, mangisug sida ag saadan ti hari nida hanggan kanda Diyus. Una manangda sida sa langit

²² aw ngatay mangusdung sa daga ud may makitan nu ud kakurian ag kadudulman. Ati sida pagdarahun sa masyadu pag kadudulman.