Isayas 7 - Hanunuu

Ti Pagsabihun tungkul sa kan Hari Akas

¹ Katpung si Akas anak ni Hutam laki ni Usyas ti Hari sa Huda, ginira duy ti Hirusalim. Ginira duy tunda ni Hari Risin taga Aram hanggan ni Hari Pika taga Israil, anak ni Rimalya. Dapat balaw nida naagaw ti Hirusalim.

² Pagka nabaritaan hari Huda kuntay magkarampihan ti Aram ag ti Israil, tinakigan siya sa dala hanggan kay manga nasakupan. Tinakigan sida ga puun kayu paghaluun durus.

³ Magkun ti Panginuun sa kan Isayas, “Ibaha nimu kanmu anak si Siar Hasub ag sulanga niyu si Akas ati sa may katugkaan bululusan danum baliwa sa abwat pag rugar sa may tipunan danum, arani sa dalan atabug sa may piripian.

⁴ Inda kanmu sabihun sa kanya, ‘Pag-alistu kawu! Pagmaariwaya kawu ag danga magkadala. Danga kawu magkakulbaan sa masyadu pag pangagalit nida ni Hari Risin taga Aram ag ni Hari Pika kay anak ni Rimalya. Inda pag duwa ga tuud kayu mag-anus dapat unman may apuy.

⁵ Maggayak sida daut laban sa kanmu. Nagkarausa sida ag magkun,

⁶ “Girahun nita ti Huda ag sakupun. Bag-u huray-hurayun nita kay daga ag buwatun hari ati kay anak ni Tabiil.”

⁷ “ ‘Dapat sinabi Panginuun Diyus balaw mangyari tunda.

^8-9 Dahil ti Damasku takinan lang banwa Aram, ag si Risin sa Damasku lang pag hari. Ag ti Samarya takinan lang banwa Israil, si Pika kay anak ni Rimalya sa Samarya lang pag hari. Tungkul waydi sa Israil, mawayak inda sa sulud 65 ka timpu, ag balaw yi inda ingarnan nasyun. Nu balaw marig-un kanyu pagsarig sa Diyus, pihu midamhak kamu.’ ”

¹⁰ Utru naghampang ti Panginuun sa kan Akas,

¹¹ “Aku ti Panginuun kanmu Diyus. Paghagad kawu sa kangku palatandaan bilang puruyba kuntay buwatun niku kang manga itinaratu. Una ginan waya inda sa sirung, ati sa rugar manga namatay, ngatay sa tungud, ati sa langit.”

¹² Dapat sinmagut si Akas, “Balaw aku manhagad palatandaan. Balaw niku subukun ti Panginuun.”

¹³ Magkun si Isayas: Pagpatingi kamu manga linahi ni Dabid. Udwaya aw lugud kang-ud kanyu mag-alukayu sa manga tawu? Taynguna, kang Diyus aw maan ti kanyu pag-alukayuhun?

¹⁴ Nakan ngani, ti Panginuun yi ngapu ti pumakaun palatandaan sa kanyu: Mamuduy ti usa ka daraga, manganak siya usa ka anak lalaki. Ingarnan niya ti anak “Imanwil.”

¹⁵ Sa udas dumunung siya magkilala sa mayad ag sa daut, makakaun siya kisu hanggan daykut.

¹⁶ Dapat bag-u siya dumunung magkilala sa mayad ag sa daut, ti rugar duwa ka hari kanmu pagkadalaan, Akas, pihu gid madaut ag pabay-anan yi lang.

¹⁷ Dapat rumas-ug ti sirang kawu ag kanmu manga nasakupan, hanggan kanmu magtal-anakan, ipagira Panginuun sa hari Asirya. Malakawan niyu ti kakurian udwaya niyu nalakawan ginan sa napablag ti Israil sa Huda.

¹⁸ Sa ati pag sirang, paniplan Panginuun ti manga taga Ihiptu ag Asirya. Bag-u rumas-ug ti manga taga Ihiptu ga manga langaw ginan sa ararayu pag sapa Ihiptu. Ag rumas-ug diman ti manga taga Asirya ga manga putyukan.

¹⁹ Ag inda sida mangulian una naan baliwa: sa matukadun pag manga luung, sa manga lukib manga tunu, sa manga tanum madugi, ag sa manga pasturan.

²⁰ Ati katpung pag sirang, gamitun Panginuun ti hari Asirya hampay wayakun lubus kanyu daga. Bumaliw siya ga manug-uguy ginan sa baliw dipay Sapa Iyupratis binayadan hampay kidkidun kanyu buhuk, hanggan bulbul, ag bungut.

²¹ Sa ati pag udas, ti maalagaan lang kada tawu tig-usa ka dumaraga baka ag duwa ka kambing,

²² imaw ti mabul-an nida abunda pag gatas. Kisu ag daykut ti karan-un tanan manga nasawad sa Huda.

²³ Sa ati diman pag udas, ti ubasan may 1,000 puun, kay halaga 1,000 pulud pilak bumaliw marikut ag mapnu tanum madugi.

²⁴ Mangidu ti manga tawu ati dara kanda manga bayi hanggan bangkaw dahil marikut yi ag punu tanum madugi.

²⁵ Udyi may mangatag sa tagudtud dati pagtanuman nida, dahil marikut yi ag napnu tanum madugi. Bumaliw wadi inda pasturan manga baka, hanggan karanidu ag kambing.