Isayas 66 - Hanunuu

Sintinsiyahan Panginuun ti manga Nasyun

¹ Inda ti pagsabihun Panginuun, “Ti langit kang tukawan hari, ag ti daga kang tarat-an lulud. Nakan hintay pag kalasi balay ti ipatindug niyu para sa kangku? Naan niyu aku pag-ipahari pag rugar?

² Unman aw aku ti nagbuwat sa tanan bagay. Aku ti Panginuun ti magsabi inda. “Pagpahalgaan niku ti manga tawu mapinakumbabaun, marapatawad, ag magkadala sa kang manga bagaw.

³ Dapat ay kaindaay kang kundisyun sa manga tawu magsunud sa kanda sadili kagustuhan ag magbaya sa kanda pagbuwatun subra daut laban sa kangku: Nu manmatay sida baka hampay ihandug, kilalan-un niku sida ga nakamatay tawu. Nu manhandug sida karanidu kilalan-un niku sida ga nakamatay idu. Nu mangayaw sida handug bilang pakaun, kilalan-un niku ga nanagda sida dugu babuy. Ag nu magtuub sida kamangyan bilang pag-alaala sa kangku, kilalan-un niku magdayaw sida sa diyus-diyusan.

⁴ Bukud waya siyun, padarahan niku sida kaparusahan subra gid nida kadalaan. Dahil katpung aku nagtawag unman sida nagsagut; katpung aku nagbagaw balaw sida namatingi. Nagbuwat sida daut sa kang pamantay ag nu hintay kang pagdayuun, imaw ngap kanda pagbuwatun.”

⁵ Kamu manga may dala sa bagaw Panginuun, patingihi niyu kay padakit, “Dahil kamu matinupadun sa kangku, kinadat-an ag binugyahan kamu manga iba niyu manga kasimanwa. Pag-aringun nida kamu magkun, ‘Ipakakit yi mana Panginuun kay kamaskihan hampay makitan nimi kanmu kabayaan!’ ” Dapat mangay-a sida.

⁶ Mag-asaydan aw niyu ti ingay sa banwa hanggan sa Balay Diyus? Ingay tunda Panginuun habang pagbalusan niya kay manga kalaban.

⁷ Magkun waya ti Panginuun, “Miparihu ti Hirusalim sa usa ka babayi manganak balaw waya magsakit kay tiyan inmanak yi.

⁸ Si unu ti nakadnug ag nakakit parihu sa inda? May nasyun aw ngatay rugar ti kadaka lang ilinusad sa dag-ud pag udas? Dapat nu magdungug yi kakurian ti Hirusalim, ilusad yi kay manga nasakupan.

⁹ Pinahintulutan niku arani yi sida milusad. Ag taynguna yi pag udas hampay siya ilusad, balaw aw waya lugud niku pasnuan ilusad sida? Pihu pasnuan diman niku. Balaw amparahun sida milusad yi. Aku, kanyu Diyus, ti magsabi inda.”

¹⁰ Kamu tanan manga magmahal sa Hirusalim, pagmasulung kamu kaibahan nida. Hanggan kamu pag manga maglumi sa kanda, pagbaya kamu sa kanya,

¹¹ hampay malakawan niyu ti kaabundahan parihu sa lapsag magsusu sa kay ina magkabsug.

¹² Dahil magkun ti Panginuun, “Paunladun niku ti Hirusalim. Darahun tag sa kanya ti kasiyunan ginan sa iba nasyun ga maglapwas pag bululusan danum. Miparihu kamu sa lapsag asikasuhun mayad, hiyaptan, ipasusu, ag sapupwun niya ina.

¹³ Libangun niku kamu parihu sa usa ka ina maglibang sa kay anak.”

¹⁴ Nu makitan niyu inda kang pagbuwatun, makabaya kamu, lumangba ga tanum. Ipakakit Panginuun kay kamaskihan sa kay manga manugsirbi, dapat ipakakit niya kay pangagalit sa kay manga kalaban.

¹⁵ Pagpatingi kamu! Rumas-ug ti Panginuun may dara apuy. Sumakay siya sa kay kalisa pan-gira parihu sa buhawi. Ipakakit niya kay galit sa kay manga kalaban, ag parusahan niya sida maglabdaban pag apuy.

¹⁶ Dahil sa panab-anan apuy hanggan baladaw, sintinsiyahan Panginuun ti tanan tawu makasalanan, ag mayamu kay matyun.

¹⁷ Magkun ti Panginuun, “Mirinsan mamatay ti tanan magpakabanal ag maglumpiyu kay sadili sa magsamba sa kanda manga diyus-diyusan sa halamanan. Mamatay sida magkaun babuy hanggan angbu, ag tuhay waya pag manga pagbugyahan pag karan-unun.

¹⁸ Alam niku kanda pagbuwatun ag pag-isipun. Nakan rumas-ug aku tipunun niku kang manga nasakupan sa tanan nasyun, bag-u makitan nida kang kadayawan.

¹⁹ Mamakakit aku makadululaw sa kanda. Ag ti manga masawad sa kanda ipadara niku atag sa nasyun Tarsis, Pul, Lud (kay manga nasakupan bantug sa paggamit ugyung), Tubal, Grisya, ag iba waya pag manga ararayu rugar udwaya nakadnug sa kang kadayawan ag balaw nakakit sa kang kamaskihan. Itultul nida kang kamaskihan sa manga nasyun.

²⁰ Ag darahun nida pauli ginan sa manga nasyun ti tanan niyu manga kasimanwa masakyan sa manga kabayu, manga mula, sa manga kamilyu, sa manga kalisa, ag sa manga karitun. Darahun nida sida sa kang banal pag bantud sa Hirusalim bilang handug sa kangku parihu sa pagbuwatun manga Israilita maghandug sa kangku sa Balay Diyus manga handug karan-unun, mapaulian sa manga malumpiyu pag sukadan.

²¹ Ag ti iba sa kanda buwatun niku manughandug ag manga Libita. Aku ti Panginuun ti magsabi inda.”

²² Magkun waya ti Panginuun, “Nu kabitay ti bag-u pag langit ag ti bag-u pag daga kang buwatun pumirmaminti hanggan aban, kanyu linahi pumirmaminti diman hanggan aban, ag balaw niku kamu malimtan.

²³ Sa kada umpisa bulan ag sa kada Sirang Pamahari ti tanan tawu sumamba sa kangku. Aku, ti Panginuun, ti magsabi inda.

²⁴ Sa pagluwas manga nagsamba sa kangku sa Hirusalim, makitan nida ti manga bangkay manga tawu naglaban sa kangku. Ti magkaun sa kanda pag manga sapat balaw magkamatay hanggan ti sumunug pag apuy sa kanda ud magkapsa. Ag kurim-udan sida tanan tawu.”