Isayas 65 - Hanunuu

Parusa ag Karibrihan

¹ Nagsagut ti Panginuun, “Nagpakilala aku sa manga tawu balaw magpaingana tungkul sa kangku. Nasampakan nida aku una unman nida aku paghanapun. Ipinakilala niku kang sadili sa kanda una unman sida magtawag sa kangku.

² “Magpakaalagad aku sa kang manga nasakupan maganit kay ulu ag unman magsunud sa mayad pag-ugali. Kanda pagsundun kanda lang sadili naisipan.

³ Paggalitun nida aku. Pag-ipakakit nida sa kangku ti parargu nida pagsamba sa kanda diyus-diyusan sa panab-anan pagsagda sa manga tanum ag pagsunug manga kamangyan sa harandugan buwat sa daga pinaganit.

⁴ Magtukaw sida nu yabi sa manga kalubngan ag sa manga lihim pag rugar hampay manhampang sa karadwa manga namatay. Magkaun sida taguban babuy ag tuhay waya pag manga pag-ibawal kan-un pag karan-unun.

⁵ Magkun sida tag sa iba, ‘Danga kawu magpakarani sa kangku barang aku mayagtingan. Mas banal aku kaysa kanmu!’ Magkasamuk aku sa katunda pag manga tawu. Ag kang pangagalit sa kanda ga apuy maglabdaban sa buu malambung.”

^6-7 Magkun waya ti Panginuun, “Pagpatingi kamu, nisurat yi ti sintinsiya para sa kang manga nasakupan. Balaw mahimu mamatidung lang aku; bumalus aku. Balusan niku sida angay sa kanda manga kasalanan hanggan ti manga kasalanan nida kaumputan. Dahil magtuub sida manga kamangyan ag linabag aku una sa bantud hanggan sa manga tagudtud. Nakan balusan niku sida angay sa kanda binwat.”

⁸ Magkun waya ti Panginuun “Balaw pagdautun ti kaway ubas may manga daut pag burak, dahil kay mayad pag burak mapakinabangan waya. Katida diman kang buwatun sa kang manga nasakupan, balaw niku sida rurisun tanan. Iribri di niku ti manga magsirbi sa kangku.

⁹ May sawadan di aku buhi sa manga linahi ni Hakub hanggan sa lahi ni Huda bag-u sida ti mumana kang rugar may mayamu pag kabantudan. Sida kang manga pinili ag manga manugsirbi ti mangulian sa inda pag daga.

¹⁰ Papaladan niku sida ti manga magpakarani sa kangku. Ti manga karatagan Sarun hanggan Akur buwatun paraharaban nida manga hayup.

¹¹ Dapat pakurianan niku kamu pag manga nagbugya sa kangku hanggan balaw nagpahalaga sa banal pag bantud niku. Nansagda kamu sa pagpaniwalaan niyu pag manga diyus-diyusan imaw tig pakaun papalad sa kanyu ag mayad pag kapaladun.

¹² Nakan iinalistu niku sa kanyu tanan ti kapaladun mamatay. Dahil pagka nagtawag aku, balaw kamu nagsagut; katpung nagbagaw aku balaw kamu namatingi. Nagbuwat kamu daut sa kang atubangan; nu naan kang pagbugyahan imaw ngap kanyu pagbuwatun.

¹³ Nakan aku ti Panginuun Diyus magkun, kang manga manugsirbi mangaun ag manginum, dapat kamu lun-usun ag uwawun. Magbaya sida dapat kamu mangay-a.

¹⁴ Manganta sida sa kabayaan, dapat kamu lumumi sa karukuan hanggan sa daut pag nalub-anan.

¹⁵ Kanyu manga ngaran saadan niku manga ipinasaman, ag aku, ti Panginuun Diyus ti mumatay sa kanyu. Dapat kang manga manugsirbi pakan-an niku bag-u pag ngaran.

¹⁶ Una si unu sa daga Israil ti mamagaw papalad ngatay saad mabuwat inda sa kang ngaran — ti Diyus matinupadun. Dahil kalimtan yi niku ti manga nalawyan pag kakurian, bul-un yi niku sa kang naisipan.

¹⁷ “Pagpatingi kamu! Mamuwat aku bag-u pag langit ag bag-u pag daga. Ti daan pag langit hanggan daga kalimtan yi.

¹⁸ Nakan pagbaya kamu ag pag-alaala hanggan aban sa kang buwatun. Dahil ti Hirusalim buwatun niku kabayaan manga tawu, ag kay manga nasakupan magpakaun diman kabayaan.

¹⁹ Makabaya aku sa Hirusalim hanggan sa kay manga nasakupan. Balaw yi ati may masaydan lulumian ngatay maghagad awat hanggan magpakabitay.

²⁰ Ati unman may mamatay lapsag ngatay anak waya. Una si unu ti mamatay sa idad 100 ka timpu kilalan-un anak waya, ag ti mamatay udwaya aput sa 100 ka timpu kilalan-un sinintinsiyahan niku.

²¹ Sa ati katpung pag manga panahun, mamatindug balay kang manga nasakupan ag ulianan nida inda. Mantanum sida manga ubas ag sida diman waydi ti pumakinabang kay manga burak tunda.

²² Balaw yi kanda manga kalaban ti pumakinabang sa kanda manga balay hanggan manga tanum. Dahil nu kabitay ti puun kayu magkabuhi dugay, katunda diman kang manga nasakupan, pihu pakinabangan gid nida lubus kanda binudlayan.

²³ Balaw sida manarabahu sa ud may makinabang hanggan kanda manga anak balaw may malakawan kamalasan. Dahil sida manga tawu pagpapaladan Panginuun. Hanggan kanda manga anak kaibahan nida papaladan diman.

²⁴ Bag-u di sida mandarangin ngatay sa udas di waya magdarangin, sagtun yi niku sida.

²⁵ Sa tunda katpung pag sirang, mirinsanan mangaun ti manga maisug pag simarun ag ti manga karanidu, hanggan ti liyun ag manga baka manharab manga ilamnun. Ti ulay balaw yi mangagat nuud mangaun lang galbuk. Balaw yi may mandaut ngatay may manwayak sa kang banal pag bantud Siun. Aku, ti Panginuun ti magsabi inda.”