Isayas 64 - Hanunuu

¹ Panginuun, bukasi duy nimu ti kalangitan. Pagdugsun kawu, matandug ti manga bantud nu kumakit sa kanmu.

² Nu kabitay ti apuy maglabdab sa layung pag sanga kayu ag magpakulkulu sa danum, ti pagras-ug nimu makapakirkirug diman manga kalaban nimu pag nasyun, ag maalaman nida nu si unu kawu.

³ Katpung nagdugsun kawu ag nagbuwat manga makadululaw pag manga bagay balaw nimi pagsarigan, natandug ti manga bantud sa atubangan nimu.

⁴ Ginan kaybi hanggan taynguna unman may nakadnug ngatay nakakit sa Diyus parihu sa kanmu mag-awat sa manga magsarig sa kanya.

⁵ Pagtanggapun nimu ti manga magbaya magbuwat matadlung ag magsunud sa kanmu manga palakaw. Dapat nangisug kawu sa kanmi dahil parargu nimi paglabagun kanmu manga palakaw. Nakan kabitay kami maribri?

⁶ Kami tanan nagbaliw ga mauring pag bagay, ag ti tanan nimi mayad buwat bilang ga mauring pag tarapu. Kami tanan nagbaliw ga labung magkalayung, ag parihu sa durus, ipinayag kami nimi kadautan.

⁷ Unman una di usa sa kanmi ti maghagad ag maghingbut makahiyaput sa kanmu. Dahil napakarayu kawu sa kanmi, ag pinabay-anan nimu kami sa kanmi manga kasalanan.

⁸ Dapat Panginuun, kawu di gid kanmi Ama. Parihu kawu sa manugbuwat anglit, ag kami waydi parihu sa lutuk. Kawu ti nagbuwat sa kanmi tanan.

⁹ Panginuun, danga waydi nimu paglubusan kanmu pangagalit sa kanmi ngatay alalahanun kanmi manga kasalanan hanggan aban. Magpakihampang duy kami sa kanmu pakidnugi nimu kami, dahil kami tanan kanmu nasakupan.

¹⁰ Ti manga banal pag banwa nimu hanggan ti Hirusalim nagbaliw ga pangawakawaan unman may mag-ulian.

¹¹ Nairub ti banal ag marinu pag Balay Diyus nimi, nu naan kawu pagsambahun nimi manga ginurang. Nawayak ti tanan mahalaga pag bagay sa kanmi.

¹² Sa inda pag kahamtangan nimi, Panginuun, kami aw dayu waya nimu awatan? Kawu aw pumabungul yi lang, ag parusahan kami lubus?