Isayas 63 - Hanunuu

Ti Pagbalus Panginuun

¹ Si unu tunda tig patangad ginan sa Busra sa sakup Idum, kay marinu pag rutay nadagtaan maragang? Magras-ug siya may dara kapangyarihan. Siya ti Panginuun magpaburayhaw kapanaluhan niya manga nasakupan ag may kamaskihan magribri.

² Hayga masyadu maragang kay rutay, maragang kay rutay parihu sa tawu magpigis ubas?

³ Sinmagut ti Panginuun, “Sa kang pangagalit, pin-gis niku ga ubas ti manga nasyun. Usa-usa di aku nagpigis; unman aku may iba. Kanda dugu tinmarupsik sa kang rutay; nakan nadagtaan kang rutay.

⁴ Binwat niku inda dahil rinmas-ug yi ti sirang pagbalus niku sa kang manga kalaban ag iribri niku kang manga nasakupan.

⁵ Naglingut aku dahil nakitan niku unman may nangawat sa kangku una di usa. Nakan aku lang ti nagribri sa kang manga nasakupan sa panab-anan niku kamaskihan. Kang pangagalit imaw ti nagsugu sa kangku hampay parusahan kang manga kalaban.

⁶ Sa kang pangagalit, tinat-an niku ti manga nasyun ag pinadampiray sida ga manga langu. Inuyang niku sa daga kanda dugu.”

Ti Kaayadan Panginuun

⁷ Ipaburayhaw niku ti pagmahal Panginuun. Dayawun niku siya sa tanan niya pag binwat sa kanta. Pagkayamu kay binwat sa kanta sa kay nasakupan Israil dahil sa daka niya pag pangaawa ag pagmahal.

⁸ Magkun ti Panginuun, “Tutuu gid sida ngani kang nasakupan; manga anak niku sida balaw mamudil sa kangku.” Nakan ngani, kay irinibri sida.

⁹ Sa tanan nida karukuan, magkaruku diman siya, ag irinibri niya sida sa panab-anan anghil nagpaburayhaw sa kay uyahun. Dahil sa kay pagmahal ag pangaawa irinibri niya sida. Kaybi di waya ginan, inalagaan niya sida sa tanan pag sirang.

¹⁰ Lang madi katida, naglaban sida ag pinaruku nida ti Banal Ispiritu. Nakan ngani, linabanan sida Panginuun, ag kalaban yi ngap niya sida.

¹¹ Dapat sa uryan naala-ala nida ti manga nakalawuy pag panahun, katpung ipinalwas ni Muysis kay manga nasakupan sa Ihiptu. Nagpaingana sida, “Naan yi ti Panginuun, ti nagpadipay sa kanta sa dagat kaibahan kanta takinan si Muysis parihu sa usa ka manug-alaga manga karanidu? Naan yi ti Panginuun nagpadara sa kanta kay Ispiritu Banal?

¹² Naan yi ti Panginuun nagpakaun kay kapangyarihan sa kan Muysis, ag nagtunga dagat sa kanta atubangan, hampay mibantug siya hanggan aban?

¹³ Naan yi siya ti naggiya sa kanta katpung nagdipay kita sa dagat? Unman ngani kita nidayaan parihu sa manga kabayu maglakaw sa marayaw pag rugar.

¹⁴ Pinakan-an kita Ispiritu Panginuun kapaharian, parihu sa manga baka mag-atag sa kay hararaban sa karatagan.” Panginuun, giniyahan duy nimu kami kanmu manga nasakupan agud madayaw kawu.

¹⁵ Bantayan duy nimu kami ginan sa langit, imaw kanmu banal ag abwat pag ulian. Naan yi kanmu pasunaid sa kanmi hanggan kanmu ipinakakit pag kamaskihan kaybi sa kanmi? Naan yi kanmu pagmahal ag pangaawa sa kanmi?

¹⁶ Dahil kawu kanmi Ama, una unman kami kilalahun ni Abraham ag ni Hakub kanda linahi. Tutuu, Panginuun, kawu ti kanmi Ama, kanmi Manugribri kaybi ginan.

¹⁷ Panginuun, hayga kami kanmu pinahintulutan pumakarayu sa kanmu manga palakaw? Hayga pagpaganitun nimu kanmi tagipusuun imaw ti nagtiklud sa kanmi hampay balaw kami gumalang sa kanmu? Pagbalik duy kawu sa kanmi, dahil kami kanmu manugsirbi ag para lang sa kanmu.

¹⁸ Sa dag-ud pag panahun, ti manga nasakupan nimu ti nag-apu kanmu Balay. Ag taynguna, dinaut yi inda nimi manga kalaban.

¹⁹ Kanmu kami ginan di waya kaybi, dapat ipinurya nimu kami balaw kanmu, ag bilang ga balaw nimu pag panguluhan.