Isayas 62 - Hanunuu

¹ Dahil pagmahalun niku ti Hirusalim, balaw umapas kang darangin tugka sa ud rumas-ug kay kapanaluhan hanggan katuwiran ga magbadbad sirang, ag tugka sa mapasa-kanya ti karibrihan ga maglabdaban sulul-an.

² Hirusalim, makitan manga nasyun hanggan nida manga hari kanyu kadayawan, ag katuwiran. Pakan-an kawu Panginuun bag-u pag ngaran.

³ Bumaliw kawu parihu sa usa ka marinu pag kuruna sa kamang Panginuun nimu Diyus.

⁴ Balaw yi kawu ingarnan, “Binugyahan” ngatay “Pinabay-anan”. Ingarnan kawu, “Kabayaan Diyus” ngatay “Ipinaasawa sa Diyus”, dahil magbaya ti Diyus sa kanmu ag bilang kawu ga ipaasawa sa kanya.

⁵ Siya ti naglalang sa kanmu mangasawa sa kanmu bilang ga usa ka kan-akan ipaasawa sa usa ka tugnaw pag daraga. Ag nu abitay ti aguman lalaki magbaya sa kay aguman babayi, ti Diyus magbaya diman sa kanmu.

⁶ Hirusalim, nagpauli aku manga taga bantay sa kanmu manga alad batu. Unman sida umapas sirang yabi sa pagpakaun pasandam sa manga nasakupan nimu. Kamu pag manga magdarangin sa Panginuun, danga kamu mag-apas sa kanyu magdarangin.

⁷ Danga niyu siya pag-apasi tugka sa maipatindug uman niya ti Hirusalim ag buwatun rugar kadayaw-dayaw sa buu kalibutan.

⁸ Nangaku ti Panginuun buwatun niya tunda sa panab-anan niya kamaskihan. Magkun siya, “Balaw yi niku ipakaun kanyu manga tirigu sa kanyu manga kalaban day-uhan. Udyi hanggan nida mainum ti manga binudlayan niyu pag irinmun ubas.

⁹ Kamu ngap ti manug-ani tirigu ti kumaun tunda, ag dayawun niyu aku. Kamu ngap ti manugputi ubas ti uminum kay pinigis tunda ati sa kang Balay.”

¹⁰ Manga taga Hirusalim, pagluwas kamu sa kanyu puwirtahan banwa, ialistu niyu ti lakawan niyu iba waya pag manga kakilala. Rayawa niyu kanda lakawan. Bul-a niyu kay manga batu, pagpatindug kamu bandira magpakilala sa manga tawu pinauli yi Panginuun kay manga nasakupan.

¹¹ Pagpatingi kamu! Nagpadara tultulanun ti Panginuun sa buu kalibutan, magkumun, “Sabiha niyu sa tanan taga Israil kanda Manugribri rinmas-ug yi may dara pirimyu, ti irinibri sa pagkabihag!

¹² Ingarnan sida ‘Banal’ ag ‘Irinibri Panginuun.’ Bag-u ti Hirusalim waydi ingarnan, ‘Banwa Pagkaibgan’ ag ‘Banwa balaw Pinabay-anan.’ ”