Isayas 61 - Hanunuu

Iribri Panginuun Kay manga Nasakupan

¹ Ti Ispiritu Panginuun Diyus sa kangku. Dahil pinili niya aku hampay manudlu mayad pag barita sa manga makuri. Sinugu niya aku hampay libangun ti manga nabiyagan kay tagipusuun ag para ibarita sa manga bihag hanggan sa manga pirisu sida malaya yi.

^2-3 Sinugu diman niya aku hampay ibarita kuntay taynguna yi pag panahun pag-iribri Panginuun kay manga nasakupan ag parusahan kanda manga kalaban. Sinugu diman niya aku hampay libangun ti manga maruku sa Siun, sa halip mamauli sida dapug, kurunahan ngap ngatay paulian lana kanda ulu tanda nida kabayaan. Bumaliw sida ga puun kayu matibay itinanum Panginuun. Kilalan-un sida matadlung pag tawu para sa ikadayaw Panginuun.

⁴ Ipatindug uman kanda manga banwa dugay yi nagba.

⁵ Manga nasakupan Diyus, sumirbi sa kanyu ti manga day-uhan. Alagaan nida kanyu manga hayup, manarabahu sida sa kanyu manga tanman hanggan manga ubasan.

⁶ Ingarnan kamu manga manughandug Panginuun, manga manugsirbi sa kanta Diyus. Manginabang kamu sa kayaman manga nasyun ag makabaya kamu. Tunda tanan mapasa-kanyu.

⁷ Sa halip kakay-ahan, dubli ngap ti matanggap niyu pag papalad sa kanyu daga ag makabaya gid kamu sa matanggap niyu. Magmasulung gid kamu hanggan aban.

⁸ “Dahil aku, ti Panginuun, magbaya sa katadlungan. Magkagalit aku sa manga mananakaw ag sa iba pag kadautan. Sa kang katapatan, pirimyuhan niku kang manga nasakupan ag mamwat aku usa ka kasunduan unman may katapusan sa kanda.

⁹ Kanda linahi mibantug sa manga nasyun. Ti tanan makakit sa kanda sumabi sida pag manga tawu pinapaladan Panginuun.”

¹⁰ Magbaya aku sa kang Panginuun Diyus, dahil aku ga kay pinasulungan karibrihan hanggan kapanaluhan. Parihu aku sa lalaki ikasal may sulung rutay marinu panmanughandug, ngatay parihu sa babayi ikasal may pamarinu.

¹¹ Nu kabitay ti binhi magtubu sa daga, katunda diman, pag-iribri Panginuun Diyus kay pinili pag nasyun. Dahil siyun ti tanan nasyun dumayaw sa kanya.