Isayas 60 - Hanunuu

Ti Kadayawan Hirusalim sa Aratubangun

¹ “Pagbangun kawu, Hirusalim, ag pagrayaw parihu sa sirang, dahil rinmas-ug yi kanmu karibrihan. Marayawan kawu kadayawan Panginuun.

² Masaput masyadu pag kadudulman ti manga nasyun sa kalibutan, dapat kawu marayawan kadayawan Panginuun.

³ Pumakarani sa kanmu rayaw ti manga nasyun hanggan kanda manga hari.

⁴ Bantayi nimu kanmu libut; magtipun yi kanmu manga nasakupan sa arayu hampay muli. Ga manga anak sida pagbabahun.

⁵ Nu makitan yi nimu tunda, makabaya kawu ag subra-subra gid kanmu kabayaan, dahil ti kayamanan nasyun darahun tabug sa kanmu.

⁶ Mapnu kanmu daga manga kamilyu manga taga Midyan hanggan manga taga Ipa. Rumas-ug sida sa kanmu ginan sa Shiba may dara manga gintu hanggan manga kamangyan para sambahun ti Panginuun.

⁷ Daran-un manga taga Kidar hanggan manga taga Nibayut kanda manga karanidu tabug sa kanmu, bag-u ihandug tunda sa harandugan Panginuun hampay makabaya siya. Lalu waya pahalgaan Panginuun kay Balay.

^8-9 Magbiyahi ti manga barku ga manga rurum maglayang ag ga manga kalapati atabug sa kanda itlugan. Tunda pag manga barku kay apu ginan sa arayu rugar, magsarig sa Panginuun. Pangunahan sida manga barku Tarsis hampay itibu kanmu manga nasakupan pauli ginan sa arayu pag rugar. Mandara sida manga gintu ag pilak para sa Panginuun niyu Diyus, ti Banal pag Diyus Israil, dahil kawu kay pagkilalahun.”

¹⁰ Magkun ti Panginuun sa Hirusalim: “Ipatindug manga day-uhan kanmu manga alad batu, ag kanda manga hari mansirbi sa kanmu. Una pagparusahan niku kawu dahil sa galit niku sa kanmu, kaawaan di kawu niku dahil mayad aku.

¹¹ Pagpirmi mabukasan kanmu sabian una yabi una sirang para tumanggap manga kayamanan manga nasyun. Nakaparada ti manga hari pasulud sa kanmu.

¹² Dahil lubus mawayak ti manga nasyun hanggan kaharian balaw sumirbi sa kanmu.

¹³ Ti kayamanan Libanun mapasa-kanmu — kanda manga puun kayu pinu, manga inibru hanggan sipris, hampay maparinu ti Balay Diyus kang pag-ulian.

¹⁴ Ti manga anak manga nag-api sa kanmu pumakarani sa kanmu ag gumalang. Manluhud sa kanmu atubangan ti manga magpuya sa kanmu, ag kawu ingarnan nida, ‘Banwa Panginuun’ ngatay ‘Siun, ti Banal pag Banwa Diyus Israil.’

¹⁵ Una pagdayuun kawu ag pag-unuunuhun, ag unman may magpahalga sa kanmu, buwatun niku kawu may kadayawan hanggan aban ag ikabaya inda tanan sinulput.

¹⁶ Alagaan kawu manga nasyun hanggan nida manga hari parihu sa lapsag pag-ipasusu niya ina. Ag maalaman nimu aku ti Panginuun, kanmu Manugribri ag Manugtubus, ti Makamaskihan pag Diyus ni Hakub.

¹⁷ Tulsan niku ti manga kagamitan sa kanmu Balay. Ti manga galang tulsan niku gintu, ti manga batu tulsan niku baul. Suma-kanmu gid ti kahusayan ag ti katadlungan.

¹⁸ Unman yi may mabaritaan kahigpitan sa kanmu daga. Unman diman may rumas-ug kadamhakan sa kanmu. Palibutan kawu karibrihan ga alad batu, ag dumayaw sa kangku ti manga magsulud sa kanmu sabian.

¹⁹ “Balaw yi init ti rumayaw sa kanmu sa surip ag balaw yi bulan ti rumayaw sa kanmu sa yabi, dahil aku, ti Panginuun, kanmu rayaw unman may katapusan. Aku, kanmu Diyus, ti marinu pag karayawan nimu.

²⁰ Aku kanmu pinagka-init hanggan bulan balaw misalup hanggan aban. Ag madura yi kanmu manga aragwantahun.

²¹ Ti tanan nimu nasakupan bumaliw matadlung, ag sida yi ti umapu daga Israil hanggan aban. Binwat niku sida ga halaman kang itinanum para sa kang kadayawan.

²² Pira-pira sida, dapat yumamu di. Manga pugri sida, dapat ingarnan sida makapangyarihan pag nasyun. Aku, ti Panginuun, ti bumuwat inda sa pagras-ug hustu pag kaudasan.”